سەناتور «اقتاۋ تەڭىز پورتى اەا» اق-دا بولعان كەزدە ارنايى ەكونوميكالىق ايماقتىڭ جۇمىسىمەن جانە ونى ودان ءارى دامىتۋ جوسپارىمەن تانىستى. دەپۋتات ەكونوميكا سالالارىنداعى قولداۋ شارالارىنا تۇسىنىكتەمە بەرىپ وڭدەۋ ونەركاسىبىن ودان ءارى دامىتۋعا باعىتتالعان نەگىزگى تەتىكتەرگە توقتالدى.
«اقتاۋ تەڭىز پورتى» ارنايى ەكونوميكالىق ايماعى وڭىردەگى ونەركاسىپ درايۆەرى. ايماققا جىل سايىن شەتەلدەن ينۆەستورلار كوبىرەك كەلۋدە جانە جاڭا جۇمىس ورىندارىن اشۋعا قوسىمشا سەرپىن بەرەدى», دەپ اتاپ ءوتتى ورىنباساروۆ.
دەپۋتات ساپار بارىسىندا «اتامەكەن» وڭىرلىك كاسىپكەرلەر پالاتاسىنىڭ باسشىلىعىمەن دە كەزدەستى. كەزدەسۋدە كاسىپكەرلىك سالاسىن دامىتۋ, وتاندىق جانە شەتەلدىك ينۆەستورلاردى تارتۋ ماسەلەلەرى تالقىلاندى. سەناتور سونداي-اق ءارتۇرلى پروبلەمالىق ماسەلە بويىنشا تۇرعىنداردى دا قابىلدادى.
دەپۋتات «كاسپي تۇششىلاندىرۋ زاۋىتى» جشس-دە بولىپ, تۇششىلاندىرۋ زاۋىتىن كەڭەيتۋ جوباسىمەن تانىستى. زاۋىتتا جاڭعىرتۋ جۇمىستارى اياقتالعاننان كەيىن تاۋلىگىنە 40 مىڭ تەكشە مەتر تەڭىز سۋىن تۇششىتۋعا مۇمكىندىك بەرەتىنى ايتىلدى. بەكبول ورىنباساروۆ اتالعان كاسىپورىننىڭ ماڭىزدىلىعىن اتاپ ءوتىپ, جوندەۋ-ورناتۋ جۇمىستارىنىڭ جاقىن ارادا ءساتتى اياقتالاتىنىنا سەنىم بىلدىرەتىنىن جەتكىزدى.
* * *
سەنات دەپۋتاتتارى نۇرلان بەكنازاروۆ پەن ايگۇل قاپباروۆا شىمكەنت قالاسىنداعى جۇرەك اۋرۋلارىن ەمدەيتىن ورتالىقتا بولدى. بۇل ۇيىم ەلدىڭ وڭتۇستىك ايماعىنداعى جەتەكشى كلينيكا سانالادى جانە 20 جىلدان استام ۋاقىت جۇمىس ىستەپ كەلەدى.
كەزدەسۋ بارىسىندا مەديتسينالىق مەكەمە وكىلدەرى سەناتورلارعا كلينيكانىڭ قىزمەتى تۋرالى ايتىپ, وتاندىق مەديتسينانىڭ قازىرگى دەڭگەيى بۇيرەك, باۋىر, جۇرەك, وكپە, ۇيقى بەزىن ترانسپلانتاتسيالاۋعا مۇمكىندىك بەرەتىنىن اتاپ ءوتتى.
سونىمەن قاتار دارىگەرلەر قازاقستانداعى دونورلاردىڭ ازدىعى مەديتسينالىق ترانسپلانتاتسيانى دامىتۋ مەن ادامداردىڭ ءومىرىن ساقتاپ قالۋعا كەدەرگى بولىپ كەلە جاتقانىنىنا نازار اۋداردى. بۇل ماسەلەنىڭ سىندارلى جانە زاڭنامالىق تۇرعىدا شەشىمى تابىلۋى كەرەك.
سەناتور ايگۇل قاپباروۆا دونورلار تاپشىلىعى شىن مانىندە, كۇردەلى جاعداي ەكەنىنە توقتالا كەلىپ, مۇنداي ماڭىزدى ماسەلەلەر پارلامەنت سەناتىندا دا جان-جاقتى زەردەلەنەتىنىن اتاپ ءوتتى. ال نۇرلان بەكنازاروۆ مەديتسينا سالاسىنداعى وزەكتى ماسەلەلەر ارقاشان پارلامەنتشىلەردىڭ ەرەكشە باقىلاۋىندا ەكەنىن ايتتى.
«پارلامەنت سەناتى دەنساۋلىق ساقتاۋ سالاسىن دامىتۋعا ەرەكشە نازار اۋدارىپ وتىرادى. جىل سايىن رەسپۋبليكالىق بيۋدجەتتى جاساقتاۋ كەزىندە دەنساۋلىق ساقتاۋعا بولىنەتىن قارجىنىڭ جەتكىلىكتى كولەمدە ۇلعايتۋدى قاداعالايمىز. مەملەكەت مەديتسينا قىزمەتكەرلەرىن الەۋمەتتىك قورعاۋ مەن قولداۋدى كۇشەيتۋ جونىندە شارالار جۇرگىزىپ كەلەدى. مەملەكەت باسشىسىنىڭ تاپسىرماسى بويىنشا جىل سايىن مەديتسينا قىزمەتكەرلەرىنىڭ جالاقىسى كوتەرىلۋدە», دەدى سەناتور نۇرلان بەكنازاروۆ.
* * *
سەناتور جانبولات جورگەنباەۆ الماتى وبلىسى قاراساي اۋدانىنداعى «ۇشقوڭىريرريگاتسيا» مەملەكەتتىك سۋ شارۋاشىلىعى كوممۋنالدىق كاسىپورنىندا سالا ماماندارىمەن جانە فەرمەر شارۋاشىلىعىنىڭ وكىلدەرىمەن كەزدەستى.
سەناتور كەزدەسۋ بارىسىندا سۋ پايدالانۋشىلاردىڭ جاعدايىمەن تانىسىپ, سالا ساراپشىلارىنىڭ پىكىرىن تىڭدادى. ماماندار اۋدانداعى اگرارلىق سالانىڭ نەگىزگى پروبلەمالىق ماسەلەلەرىن, ونىڭ ىشىندە سۋارۋ جەلىلەرىنىڭ توزۋى مەن ىستەن شىعۋىنا قاتىستى تاقىرىپتاردى كوتەردى.
مۇنان كەيىن سەناتور جامبىل اۋدانىنداعى «سوربۇلاق» سۋارمالى القابىنداعى سۋ شارۋاشىلىعى ماماندارىمەن دە كەزدەستى. فەرمەرلەر دەپۋتاتقا سوربۇلاق كولىندە سۋ جيناۋ ماسەلەسى تۋرالى ايتىپ بەردى. جازعى كەزەڭدە قالانىڭ سارقىندى سۋى «قوس رۋح» ارناسى ارقىلى ىلە اۋدانىنداعى 3,5 مىڭ گا جەرىن سۋارۋ ءۇشىن, سونداي-اق «سوربۇلاق» سۋ قويماسىنان سورعى ستانسالارى ارقىلى جامبىل اۋدانىنداعى 2,5 مىڭ گا جەردى سۋارۋ ءۇشىن پايدالانىلادى. وسىمدىكتەردىڭ ءوسىپ-ءونۋ كەزەڭىندە سۋ قويماسىنا كەلەتىن سۋ كولەمى بۇرىنعى قالپىندا بولادى جانە كولدەگى سۋ كولەمى عانا ازايادى. ساراپشىلاردىڭ پىكىرىنشە, ەگەر سۋ ماسەلەسى شەشىلسە, بۇل ءونىمنىڭ ونىمدىلىگى ارتادى جانە ۋاقىت ۇنەمدەلەدى.
«بۇل اۋقىمدى ماسەلە. وسىعان بايلانىستى ەكولوگيا مينيسترلىگىنىڭ تابيعاتتى قورعاۋ رەتتەۋ كوميتەتى سۋارۋعا سارقىندى سۋدى پايدالانۋدى ەسەپتەۋ ادىستەمەسىن ازىرلەۋ جونىندە جوسپارلى جۇمىس جۇرگىزۋگە ءتيىس. ءبىزدىڭ مىندەتىمىز – سۋارمالى جەرلەردىڭ اۋماعىن ۇلعايتۋ, ىلعال ۇنەمدەيتىن تەحنولوگيانى قارقىندى ەنگىزۋ بولىپ تابىلادى. مەملەكەت فەرمەرلەرگە سۋبسيديالار مەن نەسيەلەۋدىڭ ءتيىمدى شارتتارىن ۇسىنىپ وتىر. بۇل مۇمكىندىكتى ءتيىمدى پايدالانۋىمىز كەرەك», دەدى جانبولات جورگەنباەۆ.
