جۋىردا بۇعان دەيىن ءۇش فەدەراتسيا بولىپ جۇمىس ىستەپ, بىلتىردان بەرى ءبىر فەدەراتسيانىڭ استىنا بىرىككەن «Qazaq kuresi» اسسوتسياتسياسىنىڭ پرەزيدەنتى بولىپ مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ تاعايىندالدى. «Qazaq kuresi» اسسوتسياتسياسى قازاق كۇرەسىنىڭ ءارتۇرلى ەرەجەسى بويىنشا جۇمىس ىستەپ كەلگەن ءۇش فەدەراتسياسىنىڭ – «Qazaq kuresi» حالىقارالىق فەدەراتسياسى, «Qazaq kuresi» دۇنيەجۇزىلىك فەدەراتسياسى جانە «Qazaq kuresi» رەسپۋبليكالىق فەدەراتسياسىن بىرىكتىرىپ, 2022 جىلدان جۇمىس ىستەپ كەلەدى.
بۇگىندە اسسوتسياتسيانىڭ باستى ماقساتى – قازاق كۇرەسىن رەسپۋبليكالىق جانە حالىقارالىق ارەنادا دامىتۋ, ونى وليمپيادالىق سپورت تۇرلەرى باعدارلاماسىنا ەنگىزۋ. قازىرگى تاڭدا بارلىق وبلىس پەن رەسپۋبليكالىق ماڭىزى بار قالادا «Qazaq kuresi» اسسوتسياتسياسىنىڭ تىكەلەي باقىلاۋىمەن جۇمىس ىستەيتىن قازاق كۇرەسى فەدەراتسيالارى جۇمىس ىستەپ تۇر. ستاتيستيكالىق دەرەكتەرگە سۇيەنەر بولساق, ەلىمىزدە 122 607 ادام جاتتىعاتىن 3 897 قازاق كۇرەسى ۇيىرمەسى بار. ونىڭ ىشىندەگى 2 735 ۇيىرمە اۋىلدىق جەرلەردە ورنالاسقان, وندا 73 054 ادام جاتتىعادى. جالپى, قازاق كۇرەسىنەن جىلىنا ءتۇرلى دەڭگەيدەگى 700-دەن استام جارىس وتكىزىلەدى. حالىقارالىق ارەنادا الەمنىڭ 40-تان استام ەلىندە قازاق كۇرەسى فەدەراتسيالارى جۇمىس ىستەيدى.
ءبىر اتاپ وتەرلىگى, اسسوتسياتسيانى باسقارۋعا العاش رەت قازاق كۇرەسىنىڭ مامانى كەلىپ وتىر. ەربول مىرزابوسىنوۆ – قازاق كۇرەسىنەن حالىقارالىق دارەجەدەگى سپورت شەبەرى, ەڭبەك سىڭىرگەن جاتتىقتىرۋشى. ول ءبىراز جىل بۇرىن «Qazaq kuresi» اسسوتسياتسياسىنىڭ قۇرىلۋىنىڭ باسى-قاسىندا بولىپ, باس ديرەكتور قىزمەتىن اتقاردى. ونىڭ تىكەلەي باسشىلىعىمەن ەل اۋماعىندا جانە حالىقارالىق ارەنادا قازاق كۇرەسىنىڭ بىرىڭعاي ەرەجەسى بەكىتىلدى. 2022 جىلى «Qazaq kuresi» اسسوتسياتسياسى بىرىككەن كۇرەس الەمى (UWW) ۇيىمىنىڭ قۇرامىنا ەنىپ, UWW اياسىندا تۇڭعىش رەت قازاق كۇرەسىنەن ءۇش جاس توبىن قامتىعان الەم چەمپيوناتى ۇيىمداستىرىلدى. بۇل – قازاق كۇرەسىنىڭ حالىقارالىق كەشەندى جارىستاردىڭ باعدارلاماسىنا ەنۋ جولىنداعى العاشقى ماڭىزدى قادامنىڭ ءبىرى بولدى.
قاۋىمداستىقتىڭ جاڭادان سايلانعان پرەزيدەنتى ەربول مىرزابوسىنوۆ «Qazaq kuresi» اسسوتسياتسياسىنىڭ قازاق كۇرەسى ەرەجەسىن بىرىزدەندىرۋ جانە ءتول كۇرەستىڭ حالىقارالىق ارەناداعى تانىمالدىلىعىن ارتتىرۋ باعىتىنداعى جۇمىستاردى جالعاستىراتىنىن جەتكىزدى. ول مەملەكەت باسشىسى ق.توقاەۆتىڭ كوپ شىعىندى قاجەت ەتپەيتىن جانە بالالاردى تەرىس ادەتتەن الاستاتاتىن سپورت تۇرلەرىنىڭ قاتارىندا قازاق كۇرەسىن دامىتۋ قاجەتتىگىنە نازار اۋدارعانىن اتاپ كورسەتتى. ول ۇلتتىق سپورت تۇرلەرى ارقىلى ەلدىڭ ءيميدجىن كوتەرۋ مۇمكىندىگىنە توقتالىپ, مىسال رەتىندە جاپونيانىڭ ۇلتتىق سپورت ءتۇرى دزيۋدونى كەلتىردى. ە.مىرزابوسىنوۆتىڭ پىكىرىنشە, قازاق كۇرەسى ەلدى حالىقارالىق ارەنادا تانىمال ەتەتىن برەندتەردىڭ بىرىنە اينالۋعا ءتيىس. ول سونىمەن بىرگە قازاق كۇرەسىنىڭ دۇنيەجۇزىلىك كوشپەلىلەر ويىندارىنىڭ باعدارلاماسىنا ەنگىزىلۋى ەل سپورتشىلارىنىڭ مەدال كورسەتكىشتەرىن جاقسارتىپ, ەلدىڭ ءيميدجىن قالىپتاستىرۋعا وڭ اسەر ەتەتىنىن اتاپ ايتتى. سونداي-اق ەربول قۋانتاي ۇلى جيىن قاتىسۋشىلارىنىڭ نازارىن وزبەك وزبەكستاننىڭ «كۋراش» كۇرەسىنىڭ دامۋىنا اۋداردى. ازيا ويىندارىنىڭ باعدارلاماسىنا ەنگىزىلگەن بۇل كۇرەس ءتۇرى وزبەكستانعا 7 سالماق دارەجەسىندە مەدال جەڭىپ الۋعا مۇمكىندىك بەرەدى. قازاق كۇرەسى ءدال وسىلاي ازيا ويىندارىنىڭ باعدارلاماسىنا ەنگىزىلگەن جاعدايدا, جالپىكوماندالىق ەسەپتە جوعارى ورىن الۋ مۇمكىندىگىمىز ارتا تۇسەدى دەپ تۇيىندەدى.
اسسوتسياتسيا پرەزيدەنتى سايلانعان جيىنعا يتاليا, گرۋزيا, ازەربايجان, گرۋزيا جانە ت.ب. ەلدەردەگى قازاق كۇرەسى فەدەراتسيالارىنىڭ باسشىلارى, سونداي-اق UWW بيۋروسىنىڭ مۇشەسى ماريا روديكا ياكشى ونلاين قاتىسىپ, قۇتتىقتاۋ ءبىلدىردى. ماريا روديكا ياكشى قازاق كۇرەسىنىڭ World Combat Games, ياعني بۇكىلالەمدىك جەكپە-جەك ويىندارىنىڭ باعدارلاماسىنا ەنگىزىلگەنىن حابارلادى.
