ۇلىبريتانيانىڭ كورتتارىندا ءوتىپ جاتقان جارىستىڭ شيرەك فينالىندا الەمنىڭ ءۇشىنشى, ەلىمىزدىڭ ءبىرىنشى راكەتكاسى ايگىلى تۋنيستىك تەننيسشى ونس جابەرمەن شەبەرلىك بايقاستى. الەمدىك رەيتينگتە التىنشى ورىندا تۇرعان جابەر وسى ءتۋرنيردىڭ بىلتىرعى فينالىندا وتانداسىمىزعا جول بەرىپ قويعان ەدى. اراعا ءبىر جىل سالىپ ەكى سپورتشىنىڭ جولى شيرەك فينالدا ءتۇيىستى.
تەننيس ماماندارى مەن جانكۇيەرلەرىنىڭ قىزىعۋشىلىعىن تۋدىرعان باسەكەدە ونس جابەردىڭ مەرەيى ۇستەم بولدى. ءبىرىنشى پارتيادا ەكى تەننيسشى دە ەكى-ەكىدەن برەيك جاساعانىمەن, بار ماسەلە تاي-برەيكتە شەشىلدى. قوسىمشا گەيمدە ەلەنا رىباكينا مىقتىلىق تانىتىپ, العاشقى سەتتى ءوز پايداسىنا اياقتادى – 7:6 (7:5). الايدا ەكىنشى سەتتىڭ سوڭىندا رىباكينا دوپتى ويىنعا قوسقان گەيمدە برەيك جاساپ, تارازى باسىن تەڭەستىرىپ كەتتى. ال ءۇشىنشى, شەشۋشى پارتيادا ونس جابەر قارقىنىن ارتتىرىپ, وتانداسىمىزعا ەش مۇمكىندىك قالدىرمادى – 6:1. ەكى ساعاتقا جۋىق ۋاقىتقا سوزىلعان ماتچتا رىباكينا 7 ەيس جاساپ, 9 برەيك-پوينتتىڭ ەكەۋىن عانا پايدالاندى.
