ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا بۇكىل ەگىندىك سۋدىڭ 97%-ىن تۇتىنىپ وتىرعان الماتى, جامبىل, قىزىلوردا جانە تۇركىستان وبلىستارىنداعى ۆەگەتاتسيالىق كەزەڭ سۋ تاپشىلىعى جاعدايىندا ءوتىپ جاتقانىن باياندادى.
الماتى جانە جەتىسۋ وڭىرلەرىندە سۋ شارۋاشىلىعىنىڭ جاعدايى تۇراقتى. سونىمەن قاتار تۇركىستان, قىزىلوردا جانە جامبىل وبلىستارىندا سۋ قويمالارىنا كەلىپ جاتقان سۋدىڭ دەڭگەيى جەتكىلىكسىز. سونىڭ سالدارىنان سۋمەن قامتاماسىز ەتۋدە كۇردەلى جاعداي قالىپتاسىپ وتىر.
ماسەلەنى شەشۋ ءۇشىن ەكولوگيا مينيسترلىگى تاراپىنان قىرعىزستان مەن وزبەكستاننىڭ ۋاكىلەتتى ۆەدومستۆولارىمەن مەملەكەتارالىق نىسانداردى سۋمەن قامتاماسىز ەتۋ كەستەسىن ساقتاۋ بويىنشا جۇمىس جۇرگىزىلىپ جاتىر.
سونداي-اق جامبىل وبلىسىنىڭ اكىمى نۇرجان نۇرجىگىتوۆ قازىرگى جاعداي مەن ۇسىنىلعان شارالار تۋرالى بايانداما جاسادى.
پرەمەر-مينيستر مەملەكەتارالىق نىسانداردى سۋمەن قامتاماسىز ەتۋ بويىنشا كەلىسىلگەن كەستەلەردى ساقتاۋدىڭ, سونداي-اق سۋ رەسۋرستارىن پايدالانۋ بويىنشا كورشىلەس ەلدەرمەن بىرلەسكەن ۇيلەسىمدى جۇمىستىڭ ماڭىزدىلىعىن اتاپ ءوتتى.
سونىمەن قاتار ءاليحان سمايىلوۆ سۋدى ىسىراپ ەتپەي, جالپى اوك-كە سۋ ۇنەمدەۋ تەحنولوگيالارىن ەنگىزۋ ءۇشىن ەلىمىزدەگى گيدروتەحنيكالىق قۇرىلىستاردى رەكونسترۋكتسيالاۋ, جاڭعىرتۋ جانە تسيفرلاندىرۋ جۇمىستارىن كۇشەيتۋدى تاپسىردى.
سونداي-اق مەملەكەتارالىق كانالدار ارقىلى كەلەتىن سۋدىڭ كولەمىن ارتتىرۋ ماسەلەسىن جەدەل پىسىقتاۋ قاجەتتىگىن اتاپ ءوتتى.
