قازاقستان رەسپۋبليكاسى ۇقك شەكارا قىزمەتى ۇيىمداستىرعان ماڭىزدى كەزدەسۋگە ءۇندىستان, يران, قىتاي, قىرعىزستان, پاكىستان, رەسەي, تاجىكستان جانە وزبەكستان شەكارالىق قىزمەتتەرىنىڭ وكىلدەرى, بەلارۋس جانە موڭعوليا ەلدەرىنەن باقىلاۋشىلار, سونىمەن قاتار شىۇ ايماقتىق تەرروريزمگە قارسى قۇرىلىمى مەن تمد-عا قاتىسۋشى مەملەكەتتەردىڭ شەكارا اسكەرلەرى قولباسشىلارىنىڭ كەڭەسى قاتىستى.
قر ۇقك توراعاسىنىڭ ورىنباسارى – شەكارا قىزمەتىنىڭ ديرەكتورى گەنەرال-مايور ە.الداجۇمانوۆ شىۇ-نا مۇشە ەلدەردىڭ شەكارا قىزمەتى مەن قۇزىرەتتى ورگاندارى باسشىلارىنىڭ 9-شى وتىرىسىنا قاتىسۋشىلارىنىڭ الدىندا قر ۇقك توراعاسىنىڭ قۇتتىقتاۋىن وقىدى.
ۇقك توراعاسى ءوزىنىڭ قۇتتىقتاۋىندا, كۇنى كەشە عانا نيۋ-دەلي قالاسىندا وتكەن شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىندا ماڭىزدى شەشىمدەر قابىلدانعانىن ايتا كەلىپ, توراعالىق ءۇندىستاننان قازاقستانعا بەرىلگەنىن, سونىمەن قاتار, يران شىۇ-عا تولىققاندى مۇشە مەملەكەت مارتەبەسىن يەلەنگەنىن جەتكىزدى. «بۇگىنگى فورۋم ەۋرازيانىڭ گەوگرافيالىق قيىلىسىندا عانا ەمەس شىۇ كەڭىستىگى بولىپ تابىلاتىن قازاقستان اۋماعىندا وتكىزىلەدى. قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ 2022 جىلدىڭ قىركۇيەگىندە وتكەن سامارقاند سامميتىندە شىۇ-نىڭ حالىقارالىق بەدەلى جوعارى ەكەنىن, بۇگىندە تابىستى ءارى كوپجاقتى ۇيىمعا اينالعانىن باسا ايتقان بولاتىن. جەر شارى حالقىنىڭ شامامەن جارتىسىن قامتيتىن شىۇ – كۇن تارتىبىندە اۋقىمدى ماسەلەلەردى قاراستىرادى. ەندەشە, 9-شى وتىرىستىڭ ءداستۇرلى دوستىق پەن سەنىم اتموسفەراسىندا وتەتىنىنە سەنىمدىمىن, ال شەكارالار ءبىزدىڭ ەلدەرىمىز بەن حالىقتاردى اجىراتپايدى, بىرىكتىرەدى!» دەلىنگەن.
شىۇ-نىڭ شەكارا قىزمەتى مەن قۇزىرەتتى ورگاندارى باسشىلارىنىڭ 9-شى وتىرىسىندا قاتىسۋشى-ەلدەردىڭ مەملەكەتتىك شەكارالارىنداعى جاعدايلار بويىنشا ماسەلەلەر كوتەرىلدى. شەكارا قىزمەتىنىڭ باسشىلارى ءوز ەلدەرىندە بولىپ جاتقان جاعدايلارعا توقتالىپ, تەرروريزم جانە ەكسترەميزم, ەسىرتكى تاسىمالدارى, زاڭسىز كوشى-قونعا قارسى ءىس-قيمىلدار تۋرالى شارالار تۋرالى بايانداما جاسادى. بۇل ءوز كەزەگىندە قاتىسۋشىلاردىڭ شىۇ-عا مۇشە مەملەكەتتەردىڭ مەملەكەتتىك شەكارالارىنداعى جاعدايدى جانە ونىڭ دامۋ بولجامدارىن باعالاۋعا مۇمكىندىك بەردى.
قازاقستان رەسپۋبليكاسىنىڭ باستاماسى بويىنشا جۇرگىزىلگەن «دوستىق شەكاراسى – 2022» بىرلەسكەن شەكارالىق وپەراتسياسىنىڭ قورىتىندىسى شىعارىلدى. وسى مەرزىمدە 226 شەكارا بۇزۋشى قۇرىقتالىپ, شەكارا رەجيمى مەن كوشى-قون زاڭناماسىن بۇزعان 2 مىڭنان استام ادام ۇستالدى. زاڭسىز اينالىمنان 68 دانا قارۋ, 52 مىڭ وق-ءدارى, 590 كەلى ءتۇرلى ەسىرتكى جانە قۇرامىندا ەسىرتكى بار زاتتار تاركىلەندى. ءتۇرلى زاتتار مەن تاۋارلاردى, ونىڭ ىشىندە 456 كەلى باعالى بۇيىم, جاريالانباعان 1 ميلليوننان استام اقش دوللارى, شەكارادان وتكىزۋگە قاتاڭ تىيىم سالىنعان ادەبيەتتەردى جانە ءدىني تاۋارلاردىڭ باسپا ونىمدەرىن كونتراباندالىق جولمەن تاسىمالداۋدىڭ 113 دەرەگىنىڭ الدىن الدى.
وتىرىس سوڭىندا شىۇ-عا مۇشە مەملەكەتتەردىڭ قۇزىرەتتى ورگاندارى جانە شەكارا قىزمەتتەرى ساراپشىلارىنىڭ 2024 جىلعا ارنالعان جۇمىس جوسپارى قارالىپ, قازىرگى تاڭداعى تەرروريزممەن, قارۋ جانە ەسىرتكى كونترابانداسىمەن, زاڭسىز كوشى-قونعا بايلانىستى جانە وزگە دە قاتەرلەر مەن قاۋىپتەرگە قارسى ءىس-قيمىل بويىنشا شارالاردى قامتيتىن بىرقاتار ماڭىزدى قۇجاتتارعا قول قويىلدى.
