ەكىنشىدەن, پارلامەنتتە ماجوريتارلى جۇيەدەگى, ياعني ءبىر مانداتتىق وكرۋگتەن سايلانعان دەپۋتاتتار بار. ولار ەڭ الدىمەن وڭىرلەردەگى وزەكتى ماسەلەمەن اينالىسۋى قاجەت. وڭىردەگى ماسەلەلەردى جەرگىلىكتى اۋدان, قالا, وبلىستىق ءماسليحاتتار دەپۋتاتتارىمەن بىرلەسىپ شەشكەنىمىز دۇرىس. ايماقتاعى قوردالانعان سۇراقتاردى بىرلەسە تالقىلاپ, ناقتى ىسكە اسىراتىن بولساق, كوپتەگەن ماسەلەنى شەشۋگە مۇمكىندىك تۋادى. ەگەر قاجەتتىلىك تۋىنداسا, بيۋدجەت ماسەلەسىن زاڭنامالىق تۇرعىدا وزگەرىس ەنگىزۋ كەرەك بولسا, بىلەك سىبانا كىرىسۋگە ءازىرمىز.
مىسالى, ماڭعىستاۋ وبلىسىن الىپ قارايتىن بولساق, جاڭاوزەن, تۇپقاراعان, بەينەۋ, قاراقيا اۋدانىنا قاتىستى ماسەلە وتە كوپ. وسى ورايدا, وڭىردەگى دەپۋتاتتار حات جولداپ, ءبىز ولاردى مينيسترلىكتەرمەن كەزدەستىرىپ, كەيبىر ماسەلەلەردى بيۋدجەتكە ەنگىزىپ, ارالاستىق. وسى سەكىلدى ۇسىنىس-ساۋالدار ءالى دە كەلىپ جاتىر.
سوندىقتان مۇنداي فورماتتاعى فورۋمداردى ءجيى ۇيىمداستىرۋ قاجەت. ويتكەنى كەز كەلگەن ماسەلەنى شەشۋدە سينەرگەتيكالىق بايلانىس كەرەك. ونىڭ ۇستىنە «اmanat» پارتياسىنىڭ قابىلداعان سايلاۋالدى باعدارلامانى جۇيەلى ىسكە اسىرۋدا پارلامەنت پەن جەرگىلىكتى ءماسليحاتتار دەپۋتاتتارى كۇش بىرىكتىرسە, كوپتەگەن ماسەلەنىڭ ساپالى, ۋاقتىلى دەر كەزىندە شەشۋگە كۋا بولامىز.
ەدىل جاڭبىرشين,
ءماجىلىس دەپۋتاتى
