سۇحبات بارىسىندا پارلامەنتارالىق ىنتىماقتاستىقتى ودان ءارى نىعايتۋ جانە ەلدەر اراسىنداعى سەرىكتەستىكتى كەڭەيتۋ ماسەلەلەرى تالقىلاندى.
سەنات توراعاسى قىرعىزستان قازاقستان ءۇشىن ورتالىق ازياداعى نەگىزگى سەرىكتەس جانە وداقتاس مەملەكەتتىڭ ءبىرى ەكەنىن اتاپ ءوتتى. بۇگىندە ەكى ەل اراسىندا ديپلوماتيالىق بايلانىس ورناعانىنا 30 جىل تولدى. وسى ۋاقىت ارالىعىندا ءارتۇرلى سالادا 150-دەن استام شارت پەن كەلىسىمدى قامتيتىن بەرىك قۇقىقتىق بازا قالىپتاستى.
«قازىرگى تاڭدا ەلدەرىمىز اراسىندا ءوزارا سىيلاستىق پەن تاتۋ كورشىلىككە نەگىزدەلگەن قارىم-قاتىناس قالىپتاسقان. مەملەكەتتەرىمىزدىڭ باسشىلارى ورناتقان تىعىز ىنتىماقتاستىقتى ءبىزدىڭ پارلامەنتتەرىمىز دە جوعارى دەڭگەيدە جالعاستىرىپ وتىر. سەناتتا قىرعىز رەسپۋبليكاسىنىڭ جوگوركۋ كەنەشىمەن ىنتىماقتاستىق توبى قۇرىلدى. الداعى ۋاقىتتا دا سەنات باۋىرلاس قىرعىز ەلىمەن پارلامەنتارالىق بايلانىستى نىعايتۋ باعىتىنداعى جۇمىستى دايەكتى تۇردە جالعاستىرا بەرەدى», دەگەن ماۋلەن اشىمىباەۆ مەملەكەت باسشىسىنىڭ باستاماسىمەن ەلىمىزدە ىسكە اسىرىلىپ جاتقان رەفورمالاردىڭ ماڭىزىنا توقتالىپ ءوتتى.
ءوز كەزەگىندە نۇرلانبەك شاكيەۆ قازاقستانداعى ساياسي جانە ەكونوميكالىق وزگەرىستەردى جوعارى باعالاپ, ەكى مەملەكەت اراسىنداعى بايلانىستى ءارى قاراي دامىتۋدىڭ ماڭىزىنا توقتالدى.
«قىرعىزستان مەن قازاقستان اراسىندا قانداي دا ءبىر ەكونوميكالىق جانە ساياسي قاراما-قايشىلىق جوق. ءبىز ەجەلدەن ىرگەلەس قونعان باۋىرلاس حالىقتار رەتىندە ۇنەمى ءبىر-ءبىرىمىزدى قولداپ كەلەمىز. مەملەكەتتەرىمىزدىڭ باسشىلارى سادىر جاپاروۆ پەن قاسىم-جومارت توقاەۆ ەكى ەل اراسىنداعى, ونىڭ ىشىندە پارلامەنتارالىق دەڭگەيدەگى ءوزارا قارىم-قاتىناستى ودان ءارى نىعايتۋعا بەلسەندى ىقپال ەتىپ كەلەدى», دەدى جوگوركۋ كەنەش توراعاسى.
سونىمەن قاتار كەزدەسۋ بارىسىندا سۋ رەسۋرستارىن باسقارۋعا قاتىستى ىنتىماقتاستىقتى نىعايتۋ ىسىنە پارلامەنت دەپۋتاتتارىنىڭ قاتىسۋ ماسەلەسى ءسوز بولدى. استانا حالىقارالىق فورۋمىندا قىرعىزستان پرەزيدەنتى سادىر جاپاروۆ تا وسى جايتتىڭ وزەكتىلىگىن تىلگە تيەك ەتكەن بولاتىن.
سەنات توراعاسى قىرعىزستاندا سۋ كودەكسى قابىلدانعانىن ەسكەرە وتىرىپ, زاڭ شىعارۋ جۇمىسىندا وسى باعىتتا تاجىريبە الماسۋعا قىزىعۋشىلىق تانىتتى. سوعان بايلانىستى ول سۋ رەسۋرستارىن باسقارۋ جوبالارىن تالقىلاۋ ءۇشىن ەكىجاقتى جۇمىس توبىن قۇرۋدى ۇسىندى.
ء«بىزدىڭ ايماقتا سۋ ماسەلەسى وتە وزەكتى ەكەنى بەلگىلى. سوندىقتان بۇل باعىتتاعى پروبلەمالاردى بىرلەسىپ شەشۋدىڭ ماڭىزى زور. ءبىزدىڭ تاتۋ كورشىلىك جانە وداقتاستىق قارىم-قاتىناسىمىزدى ەسكەرە وتىرىپ, وسى ماسەلەلەر بويىنشا اشىق ءارى سىندارلى ديالوگ قۇرامىز دەپ ۇمىتتەنەمىن», دەدى ماۋلەن اشىمباەۆ.
ودان بولەك, سۇحبات كەزىندە ەكى ەل اراسىنداعى وڭىرارالىق ءوزارا ءىس-قيمىلدى ارتتىرۋ, ساۋدا-ەكونوميكالىق جانە مادەني-گۋمانيتارلىق بايلانىستى كەڭەيتۋ ماسەلەلەرى اڭگىمەگە ارقاۋ بولدى.
ايتا كەتەيىك, قىرعىزستان جوگوركۋ كەنەشى دەلەگاتسياسىنىڭ ساپارى اياسىندا ەلىمىزدىڭ باسشىلىعىمەن, قازاقستان حالقى اسسامبلەياسىنىڭ مۇشەلەرىمەن بىرقاتار كەزدەسۋ جانە باسقا دا ءىس-شارالار جوسپارلانعان.
