سۋرەتتى تۇسىرگەن ەرلان ومار, «EQ»
استانا – بايقوڭىر – تۇركىستان – الماتى – بۋراباي – استانا باعىتىمەن ساپارعا اتتانعان بالالاردىڭ العاشقى لەگىن شىعارىپ سالۋ راسىمىنە «سامۇرىق-قازىنا» قورىنىڭ باسقارما توراعاسى نۇرلان جاقىپوۆ, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن, قور قۇرامىنداعى پورتفەلدىك كومپانيالار باسشىلارى, بالالار جانە ولاردىڭ اتا-انالارى قاتىستى.
«بۇگىن – ءبىز ءۇشىن دە, بالالار ءۇشىن دە تاريحي كۇن. ويتكەنى ەلىمىزدىڭ بولاشاعى سانالعان جاس جەتكىنشەكتەرىمىز العاش رەت ۇلكەن ساپارعا اتتانىپ بارا جاتىر. ولار تابيعاتى تاڭعاجايىپ جەرلەردى ارالاپ, ەلىمىزدىڭ كورىكتى مەكەندەرىن كوزبەن كورىپ قايتادى. سوندىقتان بالالارعا بۇل ساپاردان ۇلكەن اسەر الىپ, دەمالىستان كوپ كۇش-جىگەر جيناپ قايتىڭىزدار دەپ تىلەك ايتقىم كەلەدى. ساپارلارىڭىز ءساتتى بولسىن!», دەدى نۇرلان جاقىپوۆ.
ءلاززات سۇلەيمەن ەلىمىزدە تاريحي ورىندار مەن زاماناۋي ساۋلەتپەن ۇيلەستىرىلگەن تابيعاتتىڭ بىرەگەي ەسكەرتكىشتەرى كوپ ەكەنىن ايتا كەلىپ: «ۇشسا قۇستىڭ قاناتى تالاتىن كەڭ-بايتاق وتانىمىزدىڭ كورنەكتى ورىندارىنا بارۋ سىزدەر ءۇشىن تاريحي جانە ساۋلەتتىك ەسكەرتكىشتەردى زەرتتەۋدىڭ جاڭا باستاماسى بولاتىنىنا سەنىمدىمىن», دەدى.
ساياحاتقا اتتانعاندار اراسىندا قازاقستاننىڭ تۇكپىر-تۇكپىرىنەن ء«وز ءوڭىرىمدى وركەندەتكىم كەلەدى» شىعارماشىلىق بايقاۋىنىڭ جەڭىمپازدارى, سونداي-اق «سامۇرىق-قازىنا» اق كومپانيالار توبىنىڭ وندىرىستىك كاسىپورىندارى قىزمەتكەرلەرىنىڭ بالالارى بار.
جوبانىڭ باستى ماقساتى – بالالاردىڭ تانىمىن ارتتىرىپ, بولاشاق ماماندىقتى تاڭداۋعا باعدارلاۋ, ءوز حالقىنىڭ مادەنيەتىنە, قورشاعان ورتاعا قۇرمەتىن كۇشەيتۋ دەيدى ۇيىمداستىرۋشىلار.
ماسەلەن, بايقوڭىر قالاسىندا بالالار «قورقىت اتا» مەموريالدىق كەشەنىنە بارىپ, عارىش ايلاعىنىڭ مۇراجايىمەن تانىسىپ, زىمىران ماكەتىن ۇشىرىپ كورەدى. ورەندەردىڭ تانىمدىق ساياحاتى ەل كولەمىندە ارنايى باعدارلاما بويىنشا جالعاسادى.
