«قازاقستان گەرمانيانىڭ, ءتىپتى بۇكىل ەۋروپا ەلدەرىنىڭ يندۋسترياسىنا قاجەت تابيعي رەسۋرستاردى يگەرۋدە سەنىمدى سەرىكتەس بولۋعا دايىن. بۇگىن تاڭەرتەڭ شتاينمايەر مىرزامەن كەزدەسۋ بارىسىندا تابيعي رەسۋرستاردى بىرلەسىپ بارلاۋ جانە يگەرۋ ىسىندەگى ىنتىماقتاستىعىمىزدى نىعايتۋعا كەلىستىك. بۇل شيكىزات, ونەركاسىپ جانە تەحنولوگيا سالالارىنداعى سەرىكتەستىك تۋرالى ۇكىمەتارالىق كەلىسىمگە تىڭ سەرپىن بەرەدى», دەدى پرەزيدەنت.
سونداي-اق ول كولىك جانە لوگيستيكا سالالارىندا مۇمكىندىكتىڭ مول ەكەنىن ايتتى.
«قازاقستان ەۋرازيانىڭ جۇرەگىندە ورنالاسقان. مۇنىڭ ستراتەگيالىق ءمانى زور. قىتاي مەن ەۋروپا اراسىنداعى بارلىق قۇرلىقتىق جۇك تاسىمالىنىڭ 80 پايىزى ءبىزدىڭ ەلىمىزدىڭ اۋماعى ارقىلى وتەدى. قازىرگى جاڭا گەوساياسي جاعدايدا «ورتا ءدالىزدىڭ» ماڭىزى ارتا ءتۇستى. بۇل – ورتالىق جانە شىعىس ازيادان ەۋروپاعا جۇك تاسىمالداۋدىڭ ەڭ قىسقا ءارى تۇراقتى باعىتى.
2022 جىلدان باستاپ كاسپي ءدالىزى ارقىلى ەۋروپالىق وداققا مۇشە ەلدەرگە تاسىمالداناتىن جۇك كولەمى ەكى ەسە ارتتى. شىعىس پەن باتىس اراسىنداعى ۇلعايىپ كەلە جاتقان ساۋدا كولەمىنە قولداۋ كورسەتۋ ءۇشىن ءبىز ينفراقۇرىلىمدى جاڭارتۋ جانە كەدەرگىلەردى جويۋ جۇمىستارىن جۇرگىزىپ جاتىرمىز», دەدى مەملەكەت باسشىسى.
ونىڭ ايتۋىنشا, قازاقستاندىق پورتتاردىڭ وتكىزۋ مۇمكىندىگى الداعى ۋاقىتتا 30 ميلليون تونناعا دەيىن ارتادى.
ء«بىز ەۋرووداقتىڭ «جاھاندىق قاقپا» باستاماسى مەن ءبىزدىڭ ۇلتتىق دەڭگەيدەگى كۇش-جىگەرىمىزدىڭ سينەرگياسىنا سەنەمىز. ءبىزدىڭ رەسۋرسىمىزدان بولەك, ناقتى جوبالار ەقدب, ەيب جانە KfW نەمىس دامۋ بانكى ارقىلى دا قارجىلاندىرىلۋى مۇمكىن. ەرتەڭ شتاينمايەر مىرزا كاسپي تەڭىزىنىڭ جاعاسىنداعى ماڭعىستاۋ وبلىسىنا بارىپ, وسى ترانسكاسپي حالىقارالىق كولىك باعىتىنىڭ زور الەۋەتىن ءوز كوزىمەن كورەدى», دەدى ول.
