يندۋستريا جانە ينفراقۇرىلىمدىق دامۋ ۆيتسە-ءمينيسترى ءىلياس وسپانوۆتىڭ مالىمەتىنە سۇيەنسەك, جەڭىلدەتىلگەن اۆتونەسيە باعدارلاماسى قايتا فورماتتالادى. ەندى بۇل اۆتوبۋس ساتىپ الۋ ءۇشىن وڭىرلەرگە نەسيە بەرۋ باعدارلاماسى بولماق.
«جەڭىلدەتىلگەن اۆتونەسيەگە بولىنگەن 100 ميلليارد تەڭگەنىڭ بارلىعى يگەرىلدى. جىل باسىنان بەرى الدىمىزدا وسى قارجىنى ودان ءارى دامىتۋ, يگەرۋ مىندەتى تۇر. سوڭعى ۋاقىتتا وڭىرلەردى اۆتوبۋستارمەن قامتۋ ماسەلەسى ءجيى كوتەرىلىپ جاتىر. بۇگىندە قالالارداعى اۆتوبۋستاردىڭ 46 پايىزى ەسكىرگەن. جەرگىلىكتى اتقارۋشى ورگاندارمەن كەزدەسۋلەر وتكىزىپ, بارلىق قاجەتتىلىكتەردى ەسكەردىك. بۇگىن 2 000 اۆتوبۋسقا تاپسىرىس بەرىلدى. ولاردىڭ تەڭ جارتىسى الماتى قالاسىنىڭ اكىمدىگىنەن كەلگەن, بۇل ۇلكەن مەگاپوليستە تاپشىلىق جوعارى ەكەنىن بىلدىرەدى», دەدى ۆيتسە-مينيستر.
ءىلياس وسپانوۆ قازاقستاندا جەڭىلدەتىلگەن اۆتونەسيە بەرۋدىڭ ەكى باعدارلاماسى بار ەكەنىن ەسكە سالدى. ەندى ولاردىڭ تەك بىرەۋى قايتا فورماتتالادى.
«بىزدە اۆتوكولىكتى نەسيەلەندىرۋدىڭ ەكى باعدارلاماسى بار. ءبىرىنشى باعدارلاما - قازاقستاننىڭ دامۋ بانكى ارقىلى, ەكىنشىسى - كاسىپكەرلىكتى دامىتۋ قورى, وكم قارجىسى ەسەبىنەن جۇرگىزىلەدى. ءدال قازىر ول قايتا فورماتتالادى, قاراجات ايماقتارعا باعىتتالدى. ال قازاقستاننىڭ دامۋ بانكى اياسىنداعى باعدارلاما وزگەرىسسىز قالدى», دەدى ۆيتسە-مينيستر.
