يتاليانىڭ پارما قالاسى ەننيو تارديني ستاديونىنداعى كەزدەسۋدە قازاقستان قۇراماسى وسى ىرىكتەۋ كەزەڭىندەگى ەڭ ماڭىزدى ءارى ەڭ قيىن ويىنىن وتكىزدى دەپ ايتۋعا بولادى.
يتالياداعى ماتچتىڭ ءبىرىنشى تايمىندا جەرلەستەرىمىز قاعاز جۇزىندەگى الاڭ قوجايىندارىنىڭ قورعانىس كىلتىن تابا الماي, ءبىراز قارا تەرگە ءتۇستى. ونىڭ ۇستىنە بۇل ماتچتا ماگومەد اديەۆ بىرقاتار كادرلىق قيىندىققا تاپ بولىپ, ءبىر عانا شابۋىلشىمەن ويناۋعا ءماجبۇر بولدى. ۇلتتىق قۇرامانىڭ نەگىزگى شابۋىلشىسىنا اينالعان ابات ايىمبەتوۆ دانيامەن وتكەن ويىنداعى قىزىل قاعازىنىڭ سالدارىنان بۇل ويىندا ارىپتەستەرىنە كومەكتەسە المادى. دەسە دە شابۋىلشىلاردىڭ ورنىن جوقتاتپايتىن قورعاۋشىلارىمىز ەننيو تارديني ستاديونىنداعى ماتچتا دا مەرگەندىگىمەن كوزگە ءتۇستى. ويىننىڭ 37-مينۋتىندا يان ۆوروگوۆسكي ەسەپ اشىپ, ەل قۇراماسىن ەسەپتە العا شىعاردى.
ەكىنشى تايمدا ماگومەد اديەۆ الاڭعا باقتيەر زاينۋتدينوۆ, ەلحان استانوۆ, ارمان كەڭەسوۆ سەكىلدى جاس ءارى كرەاتيۆتى ويىنشىلاردى شىعارىپ, ءبىرىنشى تايمداعى سۇرەڭسىز ويىندى جانداندىرا ءتۇستى. ءسويتىپ, جەرلەستەرىمىز ماتچ اياقتالعانعا دەيىن تاعى ەكى گول سوعىپ, ويىنداعى باسىمدىعىن ۇلعايتتى. الدىمەن 64-مينۋتتا كوماندا كاپيتانى اسحات تاعىبەرگەن پەنالتيدەن ءمۇلت كەتپەسە, ماتچتىڭ سوڭعى سەكۋندىندا ۇلتتىق قۇرامانىڭ كوشباسشىسى باقتيەر زاينۋتدينوۆ دالدىك تانىتىپ, كەزدەسۋدىڭ نۇكتەسىن قويدى. وسى گولىنىڭ ارقاسىندا زاينۋتدينوۆ ۇلتتىق قۇرامادا سوققان گولدار سانىن 12-گە جەتكىزىپ, ايگىلى شابۋىلشى ۆيكتور زۋبارەۆپەن تەڭەستى.
وسىلايشا, ەۋروپا چەمپيوناتىنىڭ ىرىكتەۋ كەزەڭىندەگى ءۇش ويىندا التى ۇپاي جيناعان جەرلەستەرىمىز تۋرنير كەستەسىندە ەكىنشى ورىنعا كوتەرىلدى. بىراق قۋانۋعا ءالى ەرتە. ويتكەنى ن توبىندا دانيا مەن قازاقستاننان بولەك, فينليانديا مەن سلوۆەنيا قۇراماسىنىڭ ەنشىسىندە دە ءۇش ويىننان كەيىن التى ۇپاي بار. بۇل دەگەنىمىز, ءبىر توپتاعى ءتورت قۇرامانىڭ دا جولدامادان ءۇمىتى بار.
توپتاعى وزگە ويىندارعا توقتالار بولساق, ءۇشىنشى تۋردا دانيا قۇراماسى ءوز الاڭىندا سولتۇستىك يرلانديانى قابىلداپ, 1:0 ەسەبىمەن جەڭىسكە جەتسە, فينليانديا فۋتبولشىلارى سلوۆەنيانى تىزە بۇكتىردى – 2:0. ءتورتىنشى تۋردا اديەۆ شاكىرتتەرى بەلفاستتا سولتۇستىك يرلاندييامەن كەزدەسەدى. بۇل ويىن ماۋسىمنىڭ 19-نان 20-نا قاراعان ءتۇنى وتەدى. سونىمەن قاتار ءتورتىنشى تۋردا دانيا سلوۆەنياعا قوناققا بارسا, فينليانديا ءوز الاڭىندا سان-مارينونى قابىلدايدى.
