«ۇلتىمىزدىڭ تاريحي سانا-سەزىمىن جاڭعىرتۋ وتە ماڭىزدى. دامىعان مەملەكەتتىڭ ءبارى تولىق زەرتتەلگەن ءتول شەجىرەسىن دارىپتەۋگە ايرىقشا ءمان بەرەدى. بۇل ىستە ەل تاريحىنىڭ كوپ تومدىق جيناعى باستى ءرول اتقارادى. قازاقستان تاريحىنىڭ جاڭا عىلىمي ۇستانىمدارعا ساي ازىرلەنگەن كوپ تومدىق جيناعى ءالى كۇنگە دەيىن جارىققا شىققان جوق. وكىنىشكە قاراي, ستراتەگيالىق ماڭىزى بار وسى ماسەلە تاۋەلسىزدىك جىلدارىندا تولىق شەشىمىن تاپپادى. سوندىقتان, مەن «تاۋەلسىزدىك بارىنەن قىمبات» اتتى ماقالامدا وسىعان ارنايى توقتالدىم. قازاقستاننىڭ اكادەميالىق ۇلگىدەگى جاڭا تاريحىن جازۋ تۋرالى باستاما كوتەردىم. بۇل جۇمىسقا ەلىمىزدىڭ جانە شەتەلدىڭ ءبىر توپ عالىمدارى جۇمىلا كىرىستى. ەجەلگى زاماننان بۇگىنگە دەيىنگى ارالىقتى قامتيتىن جەتى تومدىق جيناقتى ازىرلەۋ ءۇشىن ءبىراز شارۋا اتقارىلدى. جينالعان ماتەريالعا ەندى ستيليستيكالىق جانە عىلىمي رەداكتسيا جاسالۋى كەرەك. سونداي-اق جيناقتى بىرىڭعاي ۇلگىدە بەزەندىرگەن ءجون. ەڭبەكتە وسىعان دەيىن جىبەرىلگەن تۇجىرىمدامالىق قاتەلىكتەر مەن كەمشىلىكتەر قايتالانباۋى قاجەت. وعان سوڭعى كەزدە اشىلعان تاريحي جاڭالىقتار تۇگەل ەنگىزىلۋى كەرەك. قاراما-قايشى مالىمەتتەر بولماۋعا ءتيىس. قازاقستان اۋماعىندا وتكەن تاريحي وقيعالاردىڭ الەمدىك ۇدەرىستەرمەن تىعىز بايلانىستا سيپاتتالۋى ماڭىزدى. ءبىر سوزبەن ايتساق, جەتى تومدىق ەڭبەكتە ەلىمىزدىڭ شىنايى شەجىرەسى تولىعىمەن جازىلۋى قاجەت», دەدى پرەزيدەنت.
وسى رەتتە ول كوپتومدىقتىڭ ءتىلى – جەڭىل, ءماتىنى – كەز كەلگەن جاستاعى وقىرمانعا تۇسىنىكتى بولۋى كەرەك ەكەنىن ايتتى. مەملەكەت باسشىسى قازاقستان تاريحىنىڭ كوپتومدىق جيناعىن كەلەسى جىلدىڭ ورتاسىنا دەيىن ازىرلەۋدى تاپسىردى. سودان سوڭ ول عىلىمي ورتادا كەڭىنەن تالقىلانادى.
«بۇل ەڭبەك ۇلتتىڭ تاريحي سانا-سەزىمىن جاڭعىرتۋعا, مەملەكەتتىلىگىمىزدى نىعايتۋعا زور ۇلەس قوسارى ءسوزسىز. ءبىز سان عاسىرلىق تاريحىمىزدى ماقتان ەتەمىز. تامىرى تەرەڭ ءتول شەجىرەمىز – حالقىمىزدىڭ مادەني كودىنىڭ وزەگى. ونى جان-جاقتى زەرتتەپ, وي ەلەگىنەن وتكىزۋگە جانە بارىنشا دارىپتەۋگە قاجەتتى جاعداي جاساۋىمىز كەرەك. بۇل – مەملەكەتتىڭ نەگىزگى مىندەتىنىڭ ءبىرى. تاريحي تانىمدى كەڭەيتۋگە زور ۇلەس قوساتىن تاعى ءبىر ماڭىزدى سالا – ارحەولوگيا. الماتىداعى ارحەولوگيا ينستيتۋتى – ەلىمىزدىڭ بىرەگەي تاريحي مۇراسىن جۇيەلى زەرتتەۋمەن اينالىساتىن باستى عىلىمي مەكەمە. وكىنىشكە قاراي, ونىڭ قازىرگى جاعدايى مۇشكىل. مەكەمەنى جاڭعىرتىپ, ونىڭ جۇمىسىنا تىڭ سەرپىن بەرۋ ءۇشىن ينستيتۋتقا بارىنشا جاعداي جاساۋ قاجەت. ونى ءتيىستى رەسۋرستارمەن قامتاماسىز ەتۋ كەرەك. ينستيتۋت جانىنان تاريحي جادىگەرلەردىڭ ارنايى قورىن جاساقتاعان ءجون. مۇنداي تاجىريبە الەم ەلدەرىندە كەڭىنەن تارالعان», دەدى مەملەكەت باسشىسى.
سونىمەن قاتار پرەزيدەنت ءتول تاريحىمىزدا ەرەكشە ورنى بار تۇلعالاردىڭ بىرىڭعاي ءتىزىمىن ازىرلەۋ قاجەت ەكەنىن ايتتى. بۇل ءتىزىم ەلىمىزدىڭ ىشىندە جانە شەتەلدە جالپىۇلتتىق بىرەگەيلىگىمىزدى ايشىقتايتىن باستى ۇستىنعا اينالماق.
سونداي-اق مەملەكەت باسشىسى ونوماستيكا سالاسىنا دا توقتالىپ ءوتتى. بۇل سالا تاريحي سانا-سەزىمدى جاڭعىرتۋدىڭ ماڭىزدى يدەولوگيالىق قۇرالى. قاسىم-جومارت كەمەل ۇلى كەيبىر ادامداردىڭ قالاۋىمەن جالعان ءومىربايانى ادەيى قولدان جازىلعان كەڭەس ءداۋىرىنىڭ قايراتكەرلەرى بار ەكەنىن ايتتى. بۇنداي جاساندى تۇلعالاردىڭ ەسىمىن ءتۇرلى نىساندارعا بەرۋدى دوعارۋ قاجەتتىگىن ەسكەرتتى.
پرەزيدەنت ونوماستيكا سالاسىن تارتىپكە كەلتىرۋ كەرەكتىگىن اتاپ ءوتتى. بۇل شارۋا كەشەندى جانە دايەكتى تۇردە ءبىر ورتالىقتان اتقارىلۋعا ءتيىس ەكەندىگىن ايتتى. ونوماستيكا بۇل – اتا-بابالارىمىزعا بايلانىستى يا بەلگىلى تۇلعالاردىڭ تۋىسقاندارىنىڭ ءىسى ەمەس. بۇل – مەملەكەتتىڭ شارۋاسى ەكەندىگىن مەملەكەت باسشىسى قاداپ ايتتى. وسى سالاداعى بارلىق راسىمدەردى ءىس جۇزىندە رەتتەۋدىڭ ماڭىزدىلىعىن, وندا ايماقتاردىڭ ەرەكشەلىگىمەن قاتار, جالپىۇلتتىق باسىمدىقتار دا ەسكەرىلۋى كەرەكتىگىن قاسىم-جومارت كەمەل ۇلى ايتىپ ءوتتى.
