«وسكەلەڭ ۇرپاقتىڭ تاربيەسى – وتە ماڭىزدى ماسەلە. ءبىز ۇلتتىق بىرەگەيلىگىمىزدى نىعايتۋىمىز قاجەت. جالپى, دۇنيە جۇزىندەگى ءار ۇلت – بىرەگەي. مۇنى دۇرىس ءتۇسىنۋىمىز كەرەك. تابىسقا جەتۋ ءۇشىن جوسپارىمىز قول جەتپەس قيالعا نە بولماسا جالاڭ سوزگە ەمەس, ناقتى ىسكە نەگىزدەلۋى كەرەك. سوندا عانا ونىڭ ءبارى جۇرتقا تۇسىنىكتى, انىق بولادى. ياعني, «قايتسەك تابىستى ەلگە اينالامىز؟» دەگەن سۇراقتىڭ جاۋابى ايقىن بولۋعا ءتيىس», دەدى پرەزيدەنت.
مەملەكەت باسشىسىنىڭ ايتۋىنشا, ادال ازاماتقا ءتان قاسيەتتەر ءاربىر جاستىڭ بويىنان تابىلۋى كەرەك. ۇلتتىڭ جاڭا بولمىسى ءبىلىم, عىلىم جانە مادەنيەت سالاسىن دامىتۋ ارقىلى قالىپتاسادى. وسى ءۇش باعىتتى رۋحاني دامۋ سالاسىنداعى جۇمىستىڭ مىزعىماس ۇشتاعانى دەۋگە بولادى.
ء«بىز ۇرپاق تاربيەسىنە باسا ءمان بەرىپ, جاستاردى جاقسىلىققا جەتەلەۋىمىز كەرەك. بۇگىنگى ينتەرنەت داۋىرىندە بۇل وڭاي شارۋا ەمەس. اشىعىن ايتساق, قازىر جاس ۇرپاق الەۋمەتتىك جەلى ارقىلى تاربيە الىپ جاتىر. بالانى دۇرىس باعىتقا بۇرىپ, جول كورسەتىپ وتىرماساق, بۇل – وتە قاۋىپتى ءۇردىس. عالامتور ارقىلى جات ءدىني اعىمداردىڭ قۇرىعىنا تۇسكەن جاستار دا بار. ۇرپاقتىڭ بويىندا جامان ادەت بولسا, بۇل – ەڭ الدىمەن, ۇلكەندەردىڭ كىناسى. ءبىز جاستاردى جاھاندانۋدىڭ قاتەرلى ىقپالىنان بارىنشا ساقتاۋعا مىندەتتىمىز», دەدى ول.
وسى رەتتە ول ۇرپاق تاربيەسىنە ىقپال ەتەتىن شارالارعا باسا ءمان بەرۋىمىز كەرەك ەكەنىن ايتتى.
«بۇل سالادا كەمشىلىكتەر كوپ ەكەنى جاسىرىن ەمەس. مەكتەپتەگى تاربيە جۇمىسى اقساپ تۇر. سوڭعى كەزدە وقۋشىلاردىڭ ءبىر-بىرىنە قىسىم, زورلىق-زومبىلىق, الىمجەتتىك كورسەتۋى ءجيى بولىپ كەتتى. ونى, ءتىپتى, بەينەتاسپاعا ءتۇسىرىپ, الەۋمەتتىك جەلىگە سالۋ «سانگە» اينالدى. كەيدە بالالاردىڭ قاتىگەزدىگى جان تۇرشىكتىرەدى. وتباسىنداعى زورلىق-زومبىلىق قوعامداعى تاعى ءبىر كەلەڭسىز جانە وزەكتى ماسەلە بولىپ تۇر. مۇنداي زاڭسىز ارەكەت جاساعاندار مىندەتتى تۇردە زاڭ اياسىندا ءتيىستى جازاسىن الۋى كەرەك. ەلىمىزدىڭ بولاشاعى وتباسىندا قالىپتاسادى. ال, وتباسى باقىتتى بولسا, ەلىمىزدىڭ كەلەشەگى دە جارقىن بولادى.
شىعىستىڭ ۇلى عۇلاماسى ءال-فارابي تاربيەسىز بەرىلگەن ءبىلىم – ادامزاتتىڭ قاس جاۋى ەكەنىن ايتقان. بالا تاربيەسى – ەڭ الدىمەن, اتا-انانىڭ مىندەتى. الايدا, كەيدە اتا-انالار دۇرىس تاربيە بەرۋدىڭ ورنىنا وزدەرى جاعىمسىز ۇلگى كورسەتەدى. بالالاردىڭ تارتىبىنە بەيتاراپ, سەلقوس قارايدى, ءتىپتى, جاۋاپكەرشىلىكتىڭ ءبارىن مەكتەپكە, مۇعالىمدەرگە جۇكتەيدى», دەدى ق.توقاەۆ.
وسى رەتتە ول مەملەكەتتىڭ ەڭ باستى بايلىعى – ادام, ياعني ازاماتتار ەكەنىن اتاپ ءوتتى. سونداي-اق اتا-انالار بالانى مەملەكەت, ۇكىمەت نە قوعام ءۇشىن ەمەس, ەڭ الدىمەن, ءوزى ءۇشىن دۇنيەگە اكەلەتىنىن ايتتى. سول سەبەپتى ءاربىر اتا-انا سانالى ۇرپاق وسىرۋگە باسا ءمان بەرۋگە ءتيىس.
«سول سياقتى مەكتەپ تە – ءبىلىمنىڭ عانا ەمەس, ءتالىم-تاربيەنىڭ ورداسى. بالانىڭ بويىنا بىلىممەن قاتار ادامگەرشىلىك قۇندىلىقتاردى ءسىڭىرۋ – ۇستازدىڭ مىندەتى. وسىعان وراي, بالاباقشاداعى جانە مەكتەپتەگى تاربيە ىسىنە ءبارىمىز قوعام بولىپ ءمان بەرۋىمىز كەرەك, سونداي-اق, بەلسەنە اتسالىسۋىمىز قاجەت», دەدى پرەزيدەنت.
