ء«بىرىنشى قۇرىلتاي جالپىۇلتتىق رەفەرەندۋمنان كەيىن شاقىرىلدى. سودان بەرى, مىنە, ءبىر جىل ءوتتى. بۇل ادىلەتتى قازاقستاندى قۇرۋ جولىندا ايرىقشا ماڭىزى بار تاريحي كەزەڭ بولدى. ءبىز اتا زاڭىمىزعا ادىلدىك رۋحىن سىڭىرە وتىرىپ, كونستيتۋتسيالىق رەفورما جاسادىق. بۇل وزگەرىستەر مەملەكەتتىگىمىزدىڭ تۇعىرىن بەكىتە ءتۇستى. سونىمەن قاتار ەلىمىزدىڭ ۇزاق مەرزىمگە ارنالعان دەموكراتيالىق باعدارىن ايقىنداپ بەردى.
بيلىكتىڭ باستى ينستيتۋتتارى قىسقا مەرزىم ىشىندە مۇلدە باسقاشا سيپاتقا يە بولدى. شەشىم قابىلداۋ ۇدەرىسىنە ازاماتتاردىڭ قاتىسۋ مۇمكىندىگى ەداۋىر كەڭەيدى. ادام قۇقىقتارى مەن بوستاندىقتارىن قورعاۋ جۇيەسى نىعايدى. وسىنىڭ ءبارى ەلىمىزدىڭ ساياسي قۇرىلىمىن ورنىقتى جانە ءتيىمدى ەتىپ قايتا قۇرۋعا سەپتىگىن تيگىزدى. بارىنشا ءادىل, اشىق ءارى باسەكەگە لايىق جۇيە قالىپتاستى. كەيبىر ادامدار رەفورمالاردىڭ تابىستى بولارىنا كۇمانمەن قاراعان ەدى», دەدى مەملەكەت باسشىسى.
سونىمەن قاتار پرەزيدەنت اۋقىمدى ساياسي جاڭعىرۋ جوسپارى رەت-رەتىمەن جۇزەگە اسىرىلىپ, ءبىراز جۇمىس اتقارىلعانىن ايتتى. ەلىمىزدىڭ 2-3 جىل بۇرىنعى, ءتىپتى, ءبىر جىل بۇرىنعى قالپىنان ايتارلىقتاي وزگەرگەنىن اتاپ ءوتتى. بۇعان ىنتىماق-بىرلىكتىڭ جانە سىندارلى قوعامدىق ديالوگتىڭ ارقاسىندا قول جەتكىزىلگەنىن ءسوز ەتتى.
