ەلىمىزدىڭ فۋتبول فەدەراتسياسى 2002 جىلى ۋەفا قۇرامىنا قوسىلعالى بەرى قازاقستان كارى قۇرلىقتىڭ بىرقاتار قۇراماسىمەن جاسىل الاڭدا كەزدەسىپ ۇلگەردى. ەۋروپا چەمپيوناتىنىڭ وسى ىرىكتەۋىندەگى قارسىلاستارىمىزدىڭ ۇشەۋىمەن ءبىزدىڭ جىگىتتەردىڭ بۇعان دەيىن بىرنەشە مارتە ءتۇرلى دەڭگەيدەگى تۋرنيرلەردە جولدارى تۇيىسكەن. ال سولتۇستىك يرلانديا جانە سلوۆەنيا قۇرامالارىمەن العاش رەت ويناماق. ناۋرىز ايىنداعى ىرىكتەۋدىڭ العاشقىسىندا سلوۆەنيا فۋتبولشىلارىمەن «تانىسىپ», وكىنىشكە قاراي, ەلورداداعى «استانا ارەنادا» وتكەن ويىندا 1:2 ەسەبىمەن جەڭىلىپ قالعان بولاتىن. ەندى, مىنە, 19 ماۋسىمدا ەلىمىزدىڭ ۇلتتىق قۇراماسى دا, جانكۇيەرلەر دە سولتۇستىك يرلانديا فۋتبولىنىڭ قارىم-قابىلەتىن بايقاپ كورەدى.
الدىمەن, 16 ماۋسىمداعى قارسىلاسىمىز – سان-مارينو قۇراماسىنا توقتالىپ وتسەك. جەرگىلىكتى مامان فابريتسيو كونستانتيني جاتتىقتىراتىن سان-مارينو قۇراماسىمەن قازاقستان فۋتبولشىلارى بۇعان دەيىن دە توپتىق كەزەڭدە ويناعان. 2020 جىلعى ەۋروپا چەمپيوناتىنىڭ ىرىكتەۋىندە ءبىزدىڭ جىگىتتەر سان-مارينومەن بىرگە I توبىنا ءتۇسىپ, ەكى ماتچتا دا ءىرى ەسەپپەن جەڭىسكە جەتكەن ەدى. استانادا وتكەن العاشقى ويىندا جەرلەستەرىمىز قارسىلاس قۇرامانىڭ قاقپاسىنا جاۋاپسىز ءتورت گول سوققان بولسا, سان-مارينوداعى قارىمتا كەزدەسۋدە 3:1 ەسەبىمەن تىزە بۇكتىرگەن بولاتىن.
فابريتسيو كونستانتينيدىڭ الداعى ەكى ويىنعا شاقىرعان فۋتبولشىلارىنىڭ ءتىزىمىن قارايتىن بولساق, قورعاۋشىلار – فيليپپو فاببري («ولبيا»), سيمونە فرانتسيوزي («ۆالفوگليا»), دانتە روسسي («تروپيكال كوريانو») جانە شابۋىلشىلار – فيليپپو بەراردي («سامماۋرەزە») مەن نيكولا ناننيدەن («ولبيا») باسقالارىنىڭ ءبارى جەرگىلىكتى چەمپيوناتتا وينايدى. ال اتالعان فۋتبولشىلار يتاليا چەمپيوناتىنىڭ تومەنگى ليگالارىندا دوپ تەبەدى ەكەن. سولتۇستىك يرلانديا قۇراماسىنىڭ نەگىزى اعىلشىن چەمپيوناتىندا وينايتىن فۋتبولشىلاردان جاساقتالعان. ياعني الداعى ەكى ويىندا ماگومەد اديەۆ شاكىرتتەرىن ەكى ءتۇرلى ويىن كۇتىپ تۇر دەپ ايتساق تا بولاتىن شىعار.
ويتكەنى سان-مارينو كورشىلەرى يتاليا سياقتى كوبىرەك قورعانىسقا كوڭىل ءبولىپ, «گول سوقپاساق تا ءوز قاقپامىزعا گول وتكىزىپ المايىق» دەگەن تاكتيكانى ۇستانادى. سان-مارينونىڭ كەيىنگى التى ويىنىنا قارايتىن بولساق, ءبىر عانا ماتچتا گول سوعۋعا شامالارى جەتكەن ەكەن. ءوز قاقپاسىنا 10 گول وتكىزىپ العان.
ال سولتۇستىك يرلانديا اعىلشىندار سياقتى ستاندارتتى جاعدايلاردا, اۋەدەگى دوپقا تالاستا باسىمدىق تانىتىپ, گول سوعۋعا تىرىسادى. سونىمەن قاتار ولار الىس پاسپەن ويناپ, قاپتال ارقىلى شابۋىلعا ءجيى شىعادى. مايكل و’نيلل شاكىرتتەرى كەيىنگى ءتورت ويىننىڭ ەكەۋىندە جەڭىسكە جەتىپ, ەكەۋىندە قارسىلاستارىنا جول بەرگەن. اتاپ ايتار بولساق, كوسوۆو (2:1) مەن سان-مارينودان (2:0) باسىم ءتۇسىپ, گرەكيا (3:1) مەن فينليانديادان (1:0) جەڭىلگەن.
وتاندىق بەلگىلى فۋتبول فۋنكتسيونەرى جانە ارداگەر فۋتبولشى بولات ەسماعامبەتوۆ قازاقستان قۇراماسىن الدا وسى ىرىكتەۋدەگى ەڭ قيىن ەكى ماتچ كۇتىپ تۇرعانىن ايتادى. ء«بىزدىڭ جىگىتتەردى وسى ىرىكتەۋدەگى ەڭ ماڭىزدى ءارى ەڭ قيىن ويىندار كۇتىپ تۇر. سان-مارينو جانە سولتۇستىك يرلانديامەن وتەتىن ماتچتاردا جيناقى ويىن كورسەتۋ كەرەك. سان-مارينونى اۋتسايدەر دەپ مەنسىنبەي قاراۋعا بولمايدى. وزدەرىڭىز بىلەسىزدەر, ناۋرىز ايىندا دانيالىقتار ءبىزدى مەنسىنبەي ويناپ, ناتيجەسىندە وزدەرى سودان وپىق جەپ, بۇكىل الەم الدىندا ماسقارا بولدى. سوندىقتان بىزگە بارىنشا بايقاپ ويناعان دۇرىس. ءبىرىنشى ماتچتا قازاقستان قۇراماسى فاۆوريت سانالعانىمەن, سولتۇستىك يرلانديامەن وتەتىن ەكىنشى ماتچ ودان دا قيىن بولادى. ويتكەنى ولار دا ەۋروپا چەمپيوناتىنا جولداما العىسى كەلەدى. ءبىزدىڭ جىگىتتەر سان-مارينونى جەڭىپ, سولتۇستىك يرلانديامەن تەڭ تۇسسە, ءبىز ءۇشىن كەرەمەت ناتيجە بولار ەدى. ەگەر, ءبىزدىڭ قۇراما وسى ەكى ويىندا ءتورت ۇپاي جينايتىن بولسا, وندا ەۋروپا چەمپيوناتىنا شىعۋ مۇمكىندىگىمىزدى ساقتاپ قالامىز», دەيدى ب.ەسماعامبەتوۆ.
قازاقستان قۇراماسى بۇل ىرىكتەۋدە «H» توبىندا دانيا (3:2), فينليانديا, سلوۆەنيا (1:2), سولتۇستىك يرلانديا جانە سان-مارينومەن ەۋروپا چەمپيوناتىنىڭ جولداماسىن ساراپقا سالىپ جاتىر. ال كەلەسى جىلعى كارى قۇرلىق بىرىنشىلىگى 14 ماۋسىم مەن 14 شىلدە ارالىعىندا گەرمانيانىڭ بەرلين, كەلن, دورتمۋند, ديۋسسەلدورف, فرانكفۋرت, گەلزەنكيرحەن, گامبۋرگ, لەيپتسيگ, ميۋنحەن جانە شتۋتگارت قالالارىندا وتەدى دەپ جوسپارلانعان.
ال چەمپيوناتقا ىرىكتەۋ كەزەڭدەرىندە ءوز توپتارىندا ءبىرىنشى جانە ەكىنشى ورىن العان قۇرامالارعا تىكەلەي جولداما بەرىلەدى.
