كوسوۆونىڭ نەبارى 2 ميلليونعا جەتە-جەتپەس تۇرعىنى بار. جەر كولەمى بار-جوعى 10 887 شارشى شاقىرىمدى قۇرايدى. سوعان قاراماستان, بۇل ەلدىڭ سپورتشىلارى وتە مىقتى. اسىرەسە, دزيۋدوشى قىزدارىنىڭ تابىسى تولاعاي. اينالدىرعان 15 جىل ارالىعىندا اتالعان مەملەكەتتەن وليمپيا ويىندارىنىڭ ءۇش جەڭىمپازى شىقتى. ولاردىڭ بارلىعى دا ءتاتاميدىڭ حاس شەبەرلەرى. ارينە, بۇل ناتيجەگە تاڭدانباۋ مۇمكىن ەمەس.
اڭگىمەمىزدى مايليندا كەلمەنديدەن باستاعانىمىز ءجون. 1991 جىلدىڭ 9 مامىرىندا پەچ قالاسىندا دۇنيەگە كەلگەن بالۋاننىڭ پەشەنەسىنە ءوز ەلى تاريحىنداعى تۇڭعىش الەم جانە وليمپيادا چەمپيونى اتانۋ باقىتى بۇيىرعان ەكەن. 52 كيلو سالماق دارەجەسىندە بەلدەسكەن ول جاستايىنان تالانتىمەن دارالاندى. العاشىندا البانيانىڭ ساپىندا ونەر كورسەتىپ, بايراقتى باسەكەلەردە جۇلدە الىپ جۇرگەن كەزىندە كەلمەنديگە: ء«بىزدىڭ ەلدىڭ نامىسىن قورعاساڭ, ۇلدە مەن بۇلدەگە ورايمىز», دەگەن سىڭايدا كوپتەگەن ۇسىنىس ءتۇستى. بىراق ول باس تارتتى. ءجيى-ءجيى مازالاعان ءتۇرلى فەدەراتسيانىڭ باسشىلارى مەن باپكەرلەرىنە مايليندا: «ەرتەڭگى كۇنى كوسوۆو تاۋەلسىزدىگىن الادى. سول كەزدە مەن ءوز ەلىمنىڭ گيمنىن شىرقاتىپ, تۋىن كوكتە جەلبىرەتكىم كەلەدى. مەنىڭ ماقساتىم دا, ارمانىم دا سول», دەپ جاۋاپ قايتاردى.
ءوزىنىڭ سپورتتىق كارەراسىندا مايليندا ەۋروپا چەمپيوناتىن ءۇش رەت ۇتىپ, ءبىر رەت قولا مەدال الدى. 2013 جىلى ريو-دە-جانەيرودا, 2014 جىلى چەليابىدە ۇيىمداستىرىلعان الەم چەمپيوناتتارىندا قارسىلاس شاق كەلتىرمەدى. 2019 جىلى توكيودا ءۇشىنشى ساتىعا تابان تىرەدى. 2016 جىلى ريو وليمپياداسىندا التىننان القا تاقتى. 2019 جىلى مينسكىدە ەۋروپا ويىندارىنىڭ جەڭىمپازى اتاندى. كەلمەندي ءوز سالماق دارەجەسىندە ۇزاق ۋاقىت بويى الەمدىك رەيتينگتە جەكە-دارا كوش باستاپ تۇردى.
2021 جىلى توكيودا الاۋى تۇتانعان وليمپيا ويىندارىندا كوسوۆانىڭ ەكى دزيۋدوشىسى التىن تۇعىردان قول بۇلعادى. اۋەلى 48 كيلو سالماقتا باق سىناعان ديستريا كراسنيچي الدىنا جان سالمادى. 27 جاستاعى بالۋاننىڭ ودان بولەك, الەم چەمپيوناتىنىڭ ەكى دۇركىن قولا جۇلدەگەرى, ەۋروپا چەمپيونى جانە سول جارىستىڭ ءۇش دۇركىن جۇلدەگەرى دەگەن اتاعى بار. كوپ كەشىكپەي 57 كيلو سالماقتاعى نورا گياكوۆا باس جۇلدەنى ولجالادى. 30 جاستاعى تاتامي شەبەرى الەم مەن قۇرلىق بىرىنشىلىكتەرىندە جانە ەۋروپا ويىندارىندا بىرنەشە مارتە جۇلدەگەرلەر ساناتىنان كورىندى. ەۋروپا چەمپيوناتىندا التىن مەدالدى موينىندا جارقىراتتى.
كۇن وتكەن سايىن الەمدىك رەيتينگتە كوسوۆولىقتاردىڭ قاتارى كوبەيىپ كەلەدى. ماسەلەن, 52 كيلو سالماقتا ديستريا كراسنيچيدىڭ الدىنا ەشكىم تۇسە الار ەمەس. 57 كيلو سالماقتا كۇرەسىپ جۇرگەن نورا گياكوۆا جەتىنشى ورىندى يەلەنۋدە. 63 كيلولىق لورا فازليۋ سەگىزىنشى ساتىعا جايعاستى. ولاردىڭ ءىزىن باسىپ لوحا فلاكا (57 كيلو) مەن لوريانا كۋكا (78 كيلو) باستاعان ءبىر شوعىر دارىندى جاس ءوسىپ كەلەدى.
كەزىندە تەك مايليندا كەلمەنديگە عانا ەمەس, ديستريا كراسنيچي مەن نورا گياكوۆاعا دا جوعارىداعىداي ۇسىنىس تۇسكەن. ارينە, ءوز ورەندەرىن جاستايىنان جاقسىلاپ تاربيەلەپ, دۇرىستاپ باپتاپ, اسا ءىرى حالىقارالىق جارىستاردا ەل نامىسىن ابىرويمەن قورعايتىنداي دەڭگەيگە جەتكىزۋ وڭاي شارۋا ەمەس. سول سەبەپتى دە كوپتەگەن مامان جەڭىل جولمەن جۇرگەندى ءجون كورەدى. ولارعا كۇن دەمەي, ءتۇن دەمەي ەڭبەكتەنىپ, جاتتىعۋ زالىندا شەلەكتەپ تەر توگىپ, جۇيكەلەرىن جۇقارتقاننان گورى, دايىن سپورتشىنى قاتارعا قوسا سالۋ الدەقايدا ءتيىمدى. بىراق مايليندا دا, ديستريا دا, نورا دا اقشاعا قىزىعىپ, وتانىن تاستاپ كەتكەن جوق. ولار ءوز ەلىنىڭ مۇددەسى مەن حالقىنىڭ قالاۋىن بارىنەن جوعارى قويدى. مىنە, سونىڭ ارقاسىندا بۇگىنگى تاڭدا دزيۋدودان كوسوۆونىڭ ايەلدەر قۇراماسى الەمدەگى ەڭ ۇزدىك كوماندالار ساناتىنا ەركىن قوسىلىپ وتىر.
