فينليانديانىڭ تامپەرە مەن لاتۆيانىڭ ريگا قالالارىنداعى مۇزايدىنداردا وتكەن الەم چەمپيوناتىندا ەل نامىسىن 18-19 جاستاعى ماكسيم مۋحامەتوۆ, باتىرلان مۇراتوۆ, ماكسيم مۋسوروۆ, ءمادي ديحانبەك, دانيل بۋتەنكو, ءاليحان ومىربەكوۆ, ارتەم كورولەۆ, اباي ماڭعىسباەۆ, تاميرلان گايتاميروۆ, دىنمۇحامەد قايىرجان سەكىلدى جاس جىگىتتەر قورعاپ, بارشاعا قازاقتار دا حوككەي ويناي الاتىنىن دالەلدەدى. ال بۇل جىگىتتەردىڭ باسىم بولىگى ەلوردالىق «بارىس» جۇيەسىنىڭ تاربيەلەنۋشىلەرى ەكەنى بەلگىلى.
وسى الەم چەمپيوناتىندا ولار ناتيجەلى ويىندارىنىڭ ارقاسىندا «بارىستاعى» لەگيونەرلەردى كوماندادان ىعىستىرىپ, قۇرلىقتىق حوككەي ليگاسىنىڭ الداعى ماۋسىمىندا ويناي الاتىندارىنا بارشانىڭ كوزىن جەتكىزدى. الايدا «بارىس» باسشىلىعى بۇل جىگىتتەردەن وپ-وڭاي باس تارتىپ جاتىر. ماسەلەن, الەم چەمپيوناتىنان كەيىن استانالىق كوماندادان قاقپاشى ماكسيم پاۆلەنكو, قورعاۋشىلار دانيل بۋتەنكو, ارتيوم كوروليوۆ, شابۋىلشىلار ماكسيم مۋحامەتوۆ پەن نيكيتا ميحايليس كەتتى. بۇل – ءالى تەك باسى عانا.
نيكيتا ءميحايليستىڭ كوماندادان كەتۋى تۇسىنىكتى. ول بۇعان دەيىن دە كوماندا اۋىستىرعىسى, جاڭا ۇجىمدا باق سىناپ كورگىسى كەلەتىنىن ايتىپ جۇرگەن بولاتىن. ال بولاشاعىنان ۇلكەن ءۇمىت كۇتتىرەتىن جاس شابۋىلشى ماكسيم مۋحامەتوۆتى «بارىس» باسشىلىعى نە ءۇشىن وزدەرىندە ساقتاپ قالماعانى مۇلدە تۇسىنىكسىز. ءتىپتى, وعان كوماندادا قالۋ تۋرالى ۇسىنىس تا جاسالماعان ەكەن. مۋحامەتوۆ الەم چەمپيوناتىندا ءۇش مارتە مەرگەندىگىمەن كوزگە ءتۇسىپ, قازاقستان قۇراماسىنىڭ ەڭ ۇزدىك شابۋىلشىسى اتانعان بولاتىن. ەندى شابۋىلشى الداعى ءبىر ماۋسىم ماگنيتوگورسكىنىڭ «مەتاللۋرگ» كومانداسىندا ونەر كورسەتەدى.
شايبا.kz ينتەرنەت باسىلىمىنىڭ مالىمەتى بويىنشا, ەل نامىسىن قۇرلىقتىق حوككەي ليگاسىندا (قحل) قورعايتىن «بارىس» كلۋبىنىڭ باسشىلىعى بيىلعى الەم چەمپيوناتىندا ويناعان بىرنەشە حوككەيشىگە ايلىق جالاقىسى 250-300 مىڭ تەڭگە كولەمىندەگى كەلىسىمشارت ۇسىنعان ەكەن. ال وعان دەيىن بۇل حوككەيشىلەرگە جوعارى جالاقى تولەۋگە دايىن شەتەلدىك كوماندالاردان ۇسىنىس تۇسكەن. بىراق وتانداستارىمىز وزدەرىن تاربيەلەپ شىعارعان كوماندانىڭ ۇسىنىسىن كۇتكەنىمەن, كوڭىلدەگى جالاقى ۇسىنىلماعان.
ەگەر «بارىس» كلۋبىنىڭ باسشىلىعى الداعى ۋاقىتتا جاس حوككەيشىلەرگە سەنىم ارتاتىنىن, قحل ويىندارىندا وزدەرىن كورسەتۋگە مۇمكىندىك بەرەتىنىن ايتىپ, ولاردان كوماندادا قالۋىن سۇراعاندا, اتالعان حوككەيشىلەر قارسىلىق تانىتپاس ەدى. ءتىپتى, ولاردى وزدەرىندە ۇستاپ قالۋ ءۇشىن اسا كوپ كولەمدەگى قاراجات تا قاجەت ەمەس. ماسەلەن, قحل-دىڭ بىلتىرعى ماۋسىمىندا ەلوردالىق ۇجىم ساپىندا مۇزايدىنعا شىعىپ, بىردە-ءبىر شايبا سوعا الماعان رەسەيلىك حوككەيشى كيريلل ماكسيموۆكە ءبىر جىلدا 75 ميلليون تەڭگە جالاقى تولەنگەن. ال كوماندادا نەبارى ءۇش-اق اي ونەر كورسەتكەن 28 جاستاعى كانادالىق قورعاۋشى كريستوفەر بيگراسكە «بارىس» 122 ميلليون تەڭگە شىعىنداعان. ياعني كيريلل اي سايىن 6 ميلليوننان اسا ايلىق الىپ وتىرسا, كريستوفەرگە 40 ميلليون تەڭگە كولەمىندە جالاقى تولەنگەن. شەتەلدىك ويىنشىعا جالاقى تولەگەندە ميلليونداپ شىعىندالۋعا دايىن «بارىس» ءوز شاكىرتتەرىنە كەلگەندە جىلىنا سولاردىڭ ءبىر ايداعى جالاقىسىن تولەۋگە ساراڭدىق تانىتىپ وتىر.
سونىمەن قاتار جاستاردىڭ «بارىستان» كەتۋىنە جالاقى ماسەلەسىنەن بولەك, كوماندانىڭ قازىرگى باس باپكەرى اندرەي سكابەلكانىڭ دا اسەرى بار ەكەنى ايتىلىپ جاتىر. سەبەبى, بەلارۋس مامانى قازاقستان حوككەي مەكتەبىنىڭ تۇلەكتەرىنە كوپ سەنىم ارتا بەرمەيدى. نەگىزىنەن ول لەگيونەرلەرمەن ويناعاندى قۇپ كورەدى. قحل-دىڭ بىلتىرعى ماۋسىمىندا سكابەلكا بيىلعى الەم چەمپيوناتىندا جاسىنداي جارقىلداپ, بۋلليتتەر سەرياسىندا مىقتىلىق تانىتقان قاقپاشى اندرەي شۋتوۆتى «نوماد» كلۋبىنا جىبەرىپ, ورنىنا جىلىنا 140 ميلليون تەڭگە جالاقى الاتىن سلوۆاكيالىق يۋليۋس گۋداچەكتى شاقىرتقان بولاتىن. ال شۋتوۆتىڭ جالاقىسى جىلىنا 5-6 ميلليون شاماسىندا. سونىمەن قاتار اندرەي سكابەلكا باتىرلان مۇراتوۆقا دا قحل-دا ءوزىن كورسەتۋگە مۇمكىندىك بەرگەن جوق.
وسىلايشا, باسشىلىقتان جانە باپكەرلەر قۇرامىنان قولداۋ تاپپاعان جاس حوككەيشىلەرىمىز «بارىس» كلۋبىنان كەتىپ جاتىر.
