ەۋروپا فۋتبول قاۋىمداستىقتارى وداعىنىڭ (ۋەفا) ەرەجەسى بويىنشا كارى قۇرلىقتاعى الەم چەمپيوناتىنىڭ ىرىكتەۋ باسەكەلەرى بەس ساتىدان تۇرادى. بۇل سوڭعىسى. جەرلەستەرىمىز الەم بىرىنشىلىگىنىڭ ىرىكتەۋىن نەگىزگى كەزەڭنەن باستادى. وندا ۋەفا-عا مۇشە 36 ەلدىڭ قۇراماسى ءۇش كوماندادان 12 توپقا ءبولىنىپ باق سىنادى. ءار توپتىڭ جەڭىمپازدارى مەن ەكىنشى ورىن العان ەڭ ۇزدىك ءتورت قۇراما تىكەلەي كەلەسى كەزەڭگە شىقتى. ال ەكىنشى ورىنعا يە بولعان تاعى سەگىز كوماندا ەليتالى كەزەڭنىڭ ءتورت جولداماسىن ساراپقا سالدى. نەگىزگى كەزەڭنىڭ بەسىنشى توبىندا سلوۆەنيا جانە چەرنوگوريا قۇرامالارىمەن ويناعان جەرلەستەرىمىز ءبىرىنشى ورىنمەن ەليتالى كەزەڭگە قينالماي ءوتتى.
ءسويتىپ, نەگىزگى كەزەڭدە ىرىكتەلىپ شىققان 20 كوماندا ەليتالى كەزەڭدە ءتورت قۇرامادان بەس توپقا ءبولىندى. ەرەجە بويىنشا ءار توپتىڭ جەڭىمپازدارى كەلەسى جىلى جالاۋى جەلبىرەيتىن الەم چەمپيوناتىنا تىكەلەي جولداما السا, ەكىنشى ورىنعا يە بولعان ەڭ ۇزدىك ءتورت قۇراما تاعى ەكى جولداما ءۇشىن ءبىر-بىرىمەن ەلەكتىك ماتچ وتكىزەدى. جالپى, ەۋروپا ايماعىنان الەم بىرىنشىلىگىنە جەتى قۇراما قاتىسا الادى. ال ەگەر الەم چەمپيوناتى ەۋروپانىڭ ءبىر مەملەكەتىندە وتەر بولسا (الەم چەمپيوناتىن قابىلدايتىن مەملەكەت ءالى انىقتالعان جوق), ەكىنشى ورىن العان ەڭ ۇزدىك ءتورت قۇراما ەمەس, ەكى قۇراما ءبىر جولداماعا تالاسادى. ەكىنشى جولداما جارىستى وتكىزەتىن مەملەكەتكە بەرىلەتىنى ايتپاسا دا تۇسىنىكتى.
ەليتالى كەزەڭنىڭ ويىندارى وسى جىلدىڭ قىركۇيەگىندە باستالىپ, جەلتوقسانىندا مارەسىنە جەتەدى. جالپى, قۇرامالار بۇل كەزەڭدە ءبىر-بىرىمەن ۇيدە جانە سىرت الاڭدا ءبىر-ءبىر ويىن وتكىزەدى, جالپى التى تۋر وينايدى. ياعني 11-20 قىركۇيەكتە 1-2-تۋر, 2-1 قازاندا 3-4-تۋر جانە 11-20 جەلتوقساندا 5-6-تۋر ويىندارى وتەدى. ال ەلەكتىك ويىندار 2024 جىلدىڭ ءساۋىر ايىنا جوسپارلانعان.
جەرەبە قورىتىندىسى بويىنشا وزگە توپتاردا مىنا كوماندالار وينايدى: ۆ توبىندا – ۋكراينا, پولشا, سەربيا, بەلگيا, C توبىندا – حورۆاتيا, سلوۆاكيا, فرانتسيا, گەرمانيا, D توبىندا – يسپانيا, يتاليا, سلوۆەنيا, چەحيا, E توبىندا – قازىرگى الەم چەمپيونى پورتۋگاليا, سونىمەن قاتار گرۋزيا, ارمەنيا جانە فينليانديا. تاعى ءبىر ايتا كەتەرلىگى, ارمەنيا مەن گەرمانيا قۇرامالارى ەۋروپا ايماعىنىڭ ءبىرىنشى ىرىكتەۋ كەزەڭىنەن باستاپ سوڭعى كەزەڭگە دەيىن سۇرىنبەي جەتىپ وتىر.
2021 جىلى ليتۆانىڭ ءۇش قالاسىندا – ۆيلنيۋس, كاۋناس, كلايپەدادا وتكەن الەم چەمپيوناتىندا قازاقستان قۇراماسى تابىستى ونەر كورسەتىپ, فينالعا ءبىر قادام قالعاندا سۇرىنگەن ەدى. جەرلەستەرىمىز توپتىق كەزەڭدە كوستا-ريكا (6:1) مەن ليتۆادان (3:0) باسىم ءتۇسىپ, سوڭعى تۋردا ۆەنەسۋەلامەن تەڭ (1:1) ويناعان-دى. 1/8 فينالعا ءوز توبىندا ءبىرىنشى ورىنمەن شىققان قازاقستان قۇراماسى العاش تايلاند فۋتزالشىلارىن جارىس جولىنان ىعىستىرسا (7:0), شيرەك فينالدا يراندى تىزە بۇكتىردى – 3:2. ال جارتىلاي فينالدا بولاشاق الەم چەمپيونى پورتۋگاليامەن تەڭ ويناپ (2:2), ماتچ سوڭىنداعى پەنالتي سەرياسىندا عانا ەسە جىبەردى. ءۇشىنشى ورىن ءۇشىن وتكەن كەزدەسۋدە الەمنىڭ بەس دۇركىن چەمپيونى برازيليادان 4:2 ەسەبىمەن جەڭىلىپ, الەم بىرىنشىلىگىن ءتورتىنشى ورىنمەن تۇيىندەدى. فينالدا پورتۋگاليا قۇراماسى 2016 جىلعى الەم چەمپيونى – ارگەنتينانى جەڭىپ, جاھاندىق دودانىڭ باس جۇلدەسىن جەڭىپ الدى.
