پرەمەر-مينيستر ەكى ەل باسشىلارىنىڭ بەلسەندى ساياسي ديالوگى قازاقستان-رەسەي ىنتىماقتاستىعىنىڭ بارلىق سپەكترى بويىنشا جوعارى ديناميكانى قامتاماسىز ەتەتىنىن اتاپ ءوتتى. وسى رەتتە قر مەن رف ۇكىمەتتەرىنىڭ باستى مىندەتى - كەلىسىمدەردى جوعارى دەڭگەيدە تولىق كولەمدە جۇزەگە اسىرۋ.
ءاليحان سمايىلوۆ رەسەي – قازاقستاننىڭ نەگىزگى ساۋدا-ەكونوميكالىق سەرىكتەسى ەكەنىن اتاپ ءوتتى. وتكەن جىلدىڭ قورىتىندىسى بويىنشا تاۋار اينالىمى 6%-عا ارتقان. ال بيىلعى جىلدىڭ ءبىرىنشى توقسانىنىڭ قورىتىندىسى بويىنشا ءوزارا ساۋدا-ساتتىق تاعى 10%-عا ءوستى.
ء«بىز بۇل وڭ ءۇردىستىڭ ءارى قاراي دامۋىن كۇتەمىز», دەدى ۇكىمەت باسشىسى.
سونداي-اق ول ەلدەر اراسىنداعى ينۆەستيتسيالىق ءوزارا ءىس-قيمىلدىڭ جوعارى دەڭگەيىن اتاپ ءوتتى. سوڭعى 17 جىلدا رەسەيدەن قازاقستانعا تىكەلەي ينۆەستيتسيا كولەمى $20 ملرد-قا جۋىقتادى. ال رەسەيدەگى قازاقستاندىق ينۆەستيتسيا شامامەن $6 ملرد قۇرادى.
ءاليحان سمايىلوۆتىڭ ايتۋىنشا, بۇل ديناميكاعا ونەركاسىپتىك كووپەراتسيا دا ىقپال ەتتى. اتاپ ايتقاندا, قازاقستاندا «ەۆروحيم», «لۋكويل», «ەفكو», «تاتنەفت» جانە باسقا دا رەسەيلىك جەتەكشى كومپانيالار تابىستى جۇمىس ىستەپ جاتىر.
«قازاقستاندىق جانە رەسەيلىك كاسىپورىندار جاڭا يننوۆاتسيالىق وندىرىستىك جوبالاردى جۇزەگە اسىرۋعا دايىن. بۇعان بىلتىر قول قويىلعان, 12,5 مىڭعا جۋىق جۇمىس ورنىن اشۋعا مۇمكىندىك بەرەتىن, جالپى قۇنى $9 ملرد 29 جاڭا جوبا بويىنشا بىرلەسكەن ءىس-قيمىلدار باعدارلاماسى دالەل. جالپى ەكى ەل اراسىندا قۇنى $22 ملرد-تان اساتىن 100-دەن استام ونەركاسىپتىك كووپەراتسيالىق جوبا بار. جىل سايىن ونداعان جاڭا جوبالار قوسىلىپ وتىرادى», دەدى پرەمەر-مينيستر.
ءوز كەزەگىندە ميحايل ميشۋستين رەسەي مەن قازاقستان اراسىنداعى قارىم-قاتىناس كوپ عاسىرلىق دوستىققا نەگىزدەلگەنىن جانە ۇلتتىق ەكونوميكالاردى دامىتۋعا, سونداي-اق ەكى ەل حالقىنىڭ ءال-اۋقاتىن ارتتىرۋعا باعىتتالعانىن اتاپ ءوتتى.
«قازاقستانمەن ىنتىماقتاستىق ءبىز ءۇشىن ەرەكشە ماڭىزدى, مەن مۇنى باستى باسىم باعىت دەر ەدىم. ءبىزدىڭ ساۋدا-ەكونوميكالىق ىنتىماقتاستىعىمىز تابىستى دامىپ كەلەدى. بىلتىر ءوزارا ساۋدا-ساتتىق رەكوردتىق دەڭگەيگە جەتتى. بۇگىندە ونەركاسىپ, ماشينا جاساۋ, ەنەرگەتيكا جانە كولىك ينفراقۇرىلىمىندا جاڭا وندىرىستىك تىزبەكتەردى قۇرۋدى جەدەلدەتۋ ماڭىزدى. بۇعان رەسەي مەن قازاقستاننىڭ ەكونوميكالىق, وندىرىستىك جانە تەحنولوگيالىق الەۋەتتەرىنىڭ ءوزارا تولىقتىراتىنى جاقسى نەگىز بولادى», دەدى ميحايل ميشۋستين.
