شايبالى حوككەيدىڭ ەڭسەسىن تىكتەيمىز دەپ, ەلىمىزگە كوپتەگەن لەگيونەردى شاقىرتتىق. ستاتيستيكاعا مىقتاپ دەن قويىپ, جىلىك مايىن شاعىپ جۇرگەن بەلگىلى سپورت ءجۋرناليسى قانات بايۇزاقوۆتىڭ پايىمداۋىنشا, 1992-2022 جىلدار ارالىعىندا الىس-جاقىن شەت مەملەكەتتەردىڭ 68 ويىنشىسى قازاقستاننىڭ ازاماتتىعىن الىپ, الەمدىك دودادا ونەر كورسەتكەن ەكەن. ولاردى بىرنەشە توپقا بولۋگە بولادى. العاشقى لەگى – وسكەمەندە تۋىپ, رەسەيگە قونىس اۋدارعاندار بولسا, كەلەسى ءبىر توبى – «قازاقمىس» كلۋبىندا ويناعاندار. ودان كەيىنگىلەرى – «بارىستا» جەيدەسىن كيە ءجۇرىپ, قازاقستاننىڭ نامىسىن قورعاۋعا نيەت بىلدىرگەندەر.
ۇلتتىق كوماندامىزدىڭ ساپىنداعى العاشقى لەگيونەرلەر – يگور زەمليانوي مەن كونستانتين شافرانوۆ. ولار 1992 جىلى الەم چەمپيوناتىنىڭ ىرىكتەۋ تۋرنيرىنە قاتىستى. كوپ ۇزاماي قاتارىمىز لەونيد شيلياەۆ, اندرەي سوكولوۆ, ۆلاديمير انتيپين, سەرگەي كيسليتسىن, يگور بەلياەۆسكي, اندرەي سولوۆەۆ, پاۆەل كامەنتسەۆ, ەۆگەني نابوكوۆ, يگور نيكيتين, ولەگ كرياجەۆ, ميحايل بورودۋلين, اناتولي فيلاتوۆ, ۆلاديمير انتيپين, يگور دوروحين, ۆاديم گلوۆاتسكي جانە دميتري دۋدارەۆپەن تولىقتى. 1998 جىلى قازاقستان العاش رەت ەليتالىق توپتا كۇش سىناسۋ قۇرمەتىنە يە بولدى. جوعارىدا ەسىمدەرى اتالعان ويىنشىلاردىڭ ءبىرازى شۆەيتساريادا جارىس كورىگىن قىزدىردى. ودان كەيىن دە رەسەيدەن كەلگەن كەلىمسەكتەردىڭ قاتارى كوبەيمەسە ەش كەمىگەن جوق.
2014 جىلدان باستاپ كانادا, اقش ازاماتتارى دا ەلگە كوپتەپ كەلە باستادى. بۇل كوشتى ۇيەڭكى جاپىراقتار ەلىنىڭ وكىلى كەۆين داللمەن باستادى. ءىزىن سۋىتپاي نايدجەل دوۋس, داستين بويد, مارتەن سەن-پەر, دجەسسي بلەكەر, امەريكالىق برەندون بوچەنسكي, شۆەتسيالىق حەنريك كارلسسون مەن ۆيكتور سۆەدبەرگ جانە تاعى باسقا ساڭلاقتار جالعاپ, قازاقستاننىڭ تۋى استىندا شايباعا تالاستى. دەسەك تە, بىزگە لەگيونەرلەردەن ەش پايدا بولمادى. ولار 10 الەم چەمپيوناتىندا ويقاستاسا دا, 10-ورىننان اسا المادىق. ءبىزدىڭ كومانداعا ۇزدىك سەگىزدىكتىڭ ساناتىنان كورىنىپ, پلەي-وففقا شىعۋ باقىتى بىردە-ءبىر رەت بۇيىرعان جوق.
بيىل جاعداي كۇرت وزگەردى. لاتۆيا مەن فينليانديا بيلىگى بايراقتى باسەكە بارىسىندا رەسەي مەن بەلارۋس ازاماتتارىن ءوز ەلدەرىنە كىرگىزگەن جوق. ونىڭ ۇستىنە, 2004 جىلى قازاقستاننىڭ زاڭىندا ەكى ەلدىڭ ازاماتتىعىن الۋعا رەسمي تۇردە تىيىم سالىنعانى ءمالىم. بۇعان دەيىن وعان ءمان بەرمەي كەلگەن ەدىك. وسى جولى بەلسەندىلەر دۇرە كوتەرىلىپ, وسى ماسەلەنى بيلىكتىڭ قۇلاعىنا جەتكىزدى. سودان رەسپۋبليكالىق حوككەي فەدەراتسياسىنىڭ باسشىلارىنىڭ لەگيونەرلەردەن باس تارتۋدان باسقا امالى قالمادى.
جوعارىداعى جاعداي بۇعان دەيىن كولەڭكەدە قالىپ كەلگەن ەلىمىزدىڭ تۇلەكتەرىنە داڭعىل جول اشتى. ءوزىمىزدىڭ ىشكى بىرىنشىلىكتەرىمىزدە تابىستى ونەر كورسەتىپ جۇرگەن ءبىر شوعىر دارىندى جاستارعا ۇلتتىق كوماندامىزدىڭ جەيدەسىن كيۋگە مۇمكىندىك تۋدى. شىنى كەرەك, العاشىندا «كوپتى كورگەن كانىگى حوككەيشىلەرسىز جاعدايىمىز مۇشكىل بولاتىن شىعار» دەپ ويلادىق. كوڭىلدە كۇمان مەن سەكەم باسىم بولدى. بىراق ءبارى بەكەر ەكەن. باس كوماندامىزدىڭ تىزگىنىن ۇستاعان عالىم مامبەتاليەۆ قىسقا عانا مەرزىم ارالىعىندا جاقسى قۇراما جاساقتاي الدى.
بالتىق جاعالاۋىندا ءبىزدىڭ جىگىتتەر ەڭ جاس (ويىنشىلاردىڭ ورتا جاسى – 24,72) كوماندالاردىڭ ءبىرى رەتىندە اتتانعانىمەن, ءتاپ-ءتاۋىر وينادى. سولاردىڭ قاتارىندا 58 ۇپاي جيىپ, ەل بىرىنشىلىگىنىڭ ەڭ ۇزدىك سۇرمەگەنى اتانعان ماكسيم مۇحامەتوۆ, ەل چەمپيوناتىنىڭ پلەي-وففىندا 15 ۇپايدى قورجىنعا سالىپ, ەڭ ۇزدىك ويىنشى رەتىندە تانىلعان باتىرلان مۇراتوۆ, «بارىستىڭ» ساپىندا 62 كەزدەسۋ وتكىزگەن دىنمۇحامەد قايىرجان, ماكسيم مۋسوروۆ, ءادىل بەكەتاەۆ, ۆالەري ورەحوۆ, تاعى باسقا سايىپقىراندار ايشىقتى ونەرلەرىمەن كوزگە ءتۇستى. تاجىريبەلى نيكيتا ميحايليس پەن رومان ستارچەنكونىڭ دا ەڭبەگىن ەرەكشە اتاپ وتۋگە ءتيىسپىز. الەمدىك دودا بارىسىندا ءادىل كانادانىڭ قاقپاسىنا گول سالسا, باتىرلان سلوۆەنيانىڭ قورعانىس شەبىنەن ساڭلاۋ تاپتى. سونىمەن قوسا, ول ءوز ارىپتەستەرىنە ءۇش رەت ناتيجەلى پاس بەردى. ال ماكسيم بولسا, وسى جارىستا ءۇش مارتە نىسانانى ءدال كوزدەدى.
لاتۆيانىڭ استاناسىندا جەرلەستەرىمىز جەتى باسەكەنىڭ ۇشەۋىن ءوز پايداسىنا شەشىپ, جەتى ۇپايعا يەلىك ەتتى. ناتيجەسىندە, 16 كوماندانىڭ اراسىنان 11-ساتىعا تابان تىرەدىك. وسىلايشا, قاتارىنان ءتورتىنشى رەت ەليتالىق ديۆيزيوندا ونەر كورسەتەتىن بولدىق. وسىعان قاراپ, ءبىزدىڭ جىگىتتەر دە حوككەي ويناي الاتىنىنا انىق كوز جەتكىزدىك. ويىندارىنا «و كەي» دەپ باعا بەردىك. ولاي بولسا, الداعى ۋاقىتتا قىرۋار قارجى شىعىنداپ, سىرتتان ويىنشىلار شاقىرتۋدىڭ ەش قاجەتى جوق. ودان دا ءوز ورەندەرىمىزگە سەنىم ارتايىق. كەلەسى الەم چەمپيوناتى ءدال ءبىر جىلدان كەيىن چەحيانىڭ پراگا مەن وستراۆا قالالارىندا وتەدى. سول جارىستا جەرلەستەرىمىز بۇدان دا جاقسى كورسەتكىشكە قول جەتكىزەتىنىنە سەنىمدىمىز.
