ءىس-شاراعا وتاندىق انيماتسيا ارداگەرلەرى مەن قازاق انيماتسياسىنىڭ دامۋىنا ەلەۋلى ۇلەس قوسقان وتاندىق مادەنيەت قايراتكەرلەرى جينالدى. كوپشىلىك نازارىنا 1967 جىلى جارىق كورگەن قازاق مۋلتيپليكاتسياسىنىڭ العاشقى تۋىندىسى «قارلىعاشتىڭ قۇيرىعى نەگە ايىر؟» ءفيلمىنىڭ تسيفرلاندىرىلعان نۇسقاسى ۇسىنىلىپ, ارنايى كورمە ۇيىمداستىرىلدى. كورمەگە انيماتسيا اتاسىنىڭ ءوزى تۇتىنعان بۇيىمدارى, شىعارماشىلىعىنا پايدالانعان جەكە زاتتارى قويىلدى.
امەن قايدار – قازاق انيماتسياسىنىڭ نەگىزىن قالاۋشى. ول كينەماتوگرافيستەر وداعىنىڭ حاتشىسى, كەيىن سۋرەتشىلەر وداعىنىڭ توراعاسى قىزمەتىن اتقاردى. «قۇرمەت بەلگىسى», «پاراسات» وردەنىنىڭ, III دارەجەلى «بارىس» وردەنىنىڭ, «التىن ادام» سىيلىعىنىڭ يەگەرى, قازاق كسر مەملەكەتتىك سىيلىعىنىڭ لاۋرەاتى.
قازاق مۋلتيپليكاتسياسىنىڭ تاريحى قويۋشى-رەجيسسەر امەن قايداردىڭ 1967 جىلى تۇسىرگەن «قارلىعاشتىڭ قۇيرىعى نەگە ايىر؟» اتتى تۇڭعىش فيلمىنەن باستاۋ الدى. مۋلتفيلم 48 ەلدە كورسەتىلىپ, لەنينگرادتاعى ءىىى بۇكىلوداقتىق كينوفەستيۆالدىڭ لاۋرەاتى اتانىپ, مۋلتفيلمدەر كينوفەستيۆالىندە قۇرمەتتى ورىنعا يە بولدى. سونداي-اق امەن قايداردىڭ تانىمال انيماتسيالىق جۇمىستارى قاتارىندا «اقساق قۇلان», «قۇيىرشىق», «قوجاناسىر – قۇرىلىسشى», «كۇن شاعىلىسى», «سيقىرلى كىلەم» مۋلتفيلمدەرى بار.
وتكەن جىلى قازاق انيماتسياسىنا 55 جىل تولدى. وسى جىلدار ىشىندە ەكى جۇزگە جۋىق مۋلتفيلم ءتۇسىرىلىپ, وتىزدان استام انيماتسيالىق ستۋديا ومىرگە كەلدى. 2018 جىلى انيماتسيالىق كينوستۋديالار قاۋىمداستىعى قۇرىلىپ, ءوز كەزەگىندە بۇل ۇيىم رۋحاني-مادەني ماڭىزى بار يگىلىكتى ءىس-شارالاردىڭ باسىنان تابىلدى. سونىڭ ىشىندە جىل سايىن ۇيىمداستىرىلاتىن حالىقارالىق «Amen animation film festival» ايرىقشا ورىن الادى.
سونىمەن قاتار قازاق انيماتسيالىق كينو ونەرىنىڭ اتاسى امەن قايداردىڭ تۋعانىنا ءبىر عاسىر, ياعني 100 جىل تولۋىنا وراي «قازاقانيماتسيا» شىعارماشىلىق بىرلەستىگىندە مادەنيەت جانە سپورت مينيسترلىگىنىڭ تاپسىرماسىمەن, ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن «امەن اعانىڭ بايتەرەگى» اتتى قىسقامەتراجدى ءمۋلتفيلمىنىڭ العاشقى كورسەتىلىمى ءوتتى.
الماتى
