ەلورداداعى اباي قۇنانباي ۇلى اتىنداعى №87 مەكتەپ-گيمنازيانىڭ قولداۋىمەن وتكەن تۋرنيرگە 2012-2013 جىلى دۇنيەگە كەلگەن بالالاردان قۇرالعان التى كوماندا قاتىستى. بۇل جولعى ءتۋرنيردىڭ ەرەكشەلىگى – ارنايى چەلەندجدەن باستالۋى. ياعني ءبىر ۋاقىتتا استاناداعى بىرنەشە مەكتەپتە ءدال وسىنداي تۋرنير وتكىزىلدى. سونداي-اق قاتىسۋشى كوماندالارعا جۇلدەلەر مەن مەدالدار تاپسىرىلدى.
جارىس اينالمالى جۇيەمەن ءوتتى. ەرەجەگە ساي بارلىق كوماندا ءبىر-بىرىمەن ءوزارا كەزدەسىپ, جەڭىمپازدى انىقتادى.
«دەنساۋلىقتىڭ مىقتى بولۋىنا سپورتتىڭ پايداسى زور ەكەنى بەلگىلى. وسى ماقساتتا حالىقارالىق بالالاردى قورعاۋ كۇنىنە وراي فۋتبولدان قالالىق تۋرنير ۇيىمداستىرىپ وتىرمىز. بۇل كۇن – بالالار ءۇشىن مەيرام. سول سەبەپتى تۋرنيرگە قاتىسقانداردىڭ بارلىعى جۇلدەگە يە بولدى. مۇنداي جارىستار مەكتەبىمىزدە ءجيى ۇيىمداستىرىلىپ كەلەدى», دەيدى مەكتەپ ديرەكتورى ايگۇل قاشاەۆا.
تۋرنير قورىتىندىسى بويىنشا ەكى توپتان سۋىرىلىپ شىققان ءتورت كوماندا جارتىلاي فينالدا كەزدەسىپ, فينالدا قاي كوماندانىڭ وينايتىنىن انىقتادى. ناتيجەسىندە, فينالدىق ويىندا Alash كومانداسىن 5:3 ەسەبىمەن جەڭگەن Namys كومانداسىنان جاساقتالعان «اباي» مەكتەبى جەڭىمپاز اتانسا, ءۇشىنشى ورىندى «بىرلىك» كومانداسىنان 2:1 ەسەبىمەن باسىم بولعان «قازعارىش» مەكتەبى تۇيىندەدى.
– بىزگە وسىنداي تۋرنيرلەر ۇنايدى. سەبەبى بۇل تۋرنير جەڭىسكە, چەمپيون بولۋعا ىنتالاندىرادى. Abay CUP ءتۋرنيرىن ۇيىمداستىرۋشىلارعا راحمەت ايتامىن, – دەيدى «اباي» مەكتەبىنىڭ وقۋشىسى زاڭعار ابدىكەرىم.
سونداي-اق كوماندالاردان بولەك, جەكەلەي ويىنشىلاردىڭ دا شەبەرلىگى ەسكەرىلدى. «ەڭ ۇزدىك قاقپاشى» اتالىمى – ءانۋار جاقانعا (Namys), «ەڭ ۇزدىك قاقپاشى» – جالعاس سەرىككە (Alash), «ەڭ ۇزدىك قورعاۋشى» – دارحان شاكىرگە («بىرلىك»), «ەڭ ۇزدىك شابۋىلشى» – ءاليحان داۋلەتبەككە («قازعارىش»), «ەڭ ۇزدىك ويىنشى» مانسۇر امانگەلدىگە (Alash) بۇيىردى.
