– قانشا تولەيسىڭدەر؟ دەدى الگى.
بۇرىن مۇندايدى كورمەگەن ءبىز اۋزىمىزعا ءسوز تۇسپەي, اڭىرىپ قالساق كەرەك, جولدا قالعان جولاۋشىدان اقشا دامەتەتىن بوزبالا بۇرىلىپ تا قاراعان جوق. لايساڭ جەردە تولارساقتان ساز كەشىپ, ناعاشىمىزعا باردىق. بالاسى اتقا جايداق ءمىنىپ شىقتى. ءبىزدىڭ كوكساۋ كولىكتى قىل ارقانمەن بەستىنىڭ قۇيرىعىنا بايلاپ, سۋىرىپ الدى. ەس كەتىپ, جان شىقتى دەگەندە ناعاشىمىزدىڭ داستارقانىنان ءدام تاتقانبىز. بالىق اسىپتى. ىرگەدەگى قامىساقتى وزەنىندەگى بىقىعان بالىقتى كورشى سەلونىڭ ورىستارى كەلىپ اۋلاپ, ءبىزدىڭ اۋىلدىڭ تۇرعىندارىنا ساتىپ كەتەدى ەكەن. تاڭسىق اسقا جەرىك تۇتىنۋشى جىرتىلىپ ايىرىلادى. بالىق سورپاسىن ءىشىپ وتىرىپ, جاڭا عانا ەل شەتىندە كورگەن ەرسى كورىنىستى تىلگە تيەك ەتكەنبىز. سول-اق ەكەن, اڭگىمەنىڭ اۋجايى كوپتەن كەلمەگەن اۋىل تىنىسىنا باعىتتالدى. ەرتەدەگى اۋىل ادامدارىنىڭ اق پەيىلى, كول-كوسىر نيەتى تۇزدىعى تاتىمدى تاقىرىپقا اينالعان.
– بۇرىن ءبىزدىڭ اۋىلدا ادەمى ءداستۇر كوپ ەدى, دەيدى ناعاشىمنىڭ كورشىسى ەسەنباي اقساقال, – اۋىلداعى ادامنىڭ ۋايىمى قىسقا قامدانۋ عوي. كورشى-قولاڭ وتىن-ءشوپ اكەلسە, بۇكىل ەل بولىپ جۇمىلا كەتىپ, بار جۇمىستى ءاپ-ساتتە ءبىتىرۋشى ەدى. اسكەرگە كەتىپ بارا جاتقان بالالاردى اۋىلدىڭ بار ءۇيى كەزەك-كەزەك قوناققا شاقىرىپ, اق باتالارىن بەرىپ, اتتاندىرىپ سالاتىن. ءۇي سالعاندا دا بىلەكتەرىن سىبانىپ, جۇمىلا كەتەتىن جانە وسى ىستەرىنە ەشكىم اقى سۇرامايتىن.
ءتىپتى اۋىلدىڭ ۇلكەندەرى بىرەۋ وتىن اكەلىپ, بىرەۋ ءشوپ اكەلىپ قاربالاسىپ جاتقاندا ەشكىم كومەككە شاقىرماسا دا, بالا-شاعاسىنىڭ قولىنا ايىر, بالتاسىن ۇستاتىپ, بارىپ كومەكتەسىڭدەر دەپ جىبەرەتىن. مىنە – تاربيەنىڭ كوكەسى.
– قوي, جاتىڭدار, دەدى ناعاشىم, – تاڭەرتەڭ ەرتە تۇرۋ كەرەك, قوي قىرقاتىن بريگادا كەلەدى.
– ونىسى نەسى؟ دەپ تاڭىرقادىق ءبىز بۇرىن-سوڭدى ەستىمەگەن جوسىققا.
–قازىر, دەدى ناعاشىم, – قوي قىرقۋدىڭ ءوزى ماسەلەگە اينالعان. كورشى ورىس سەلوسىنان ارنايى بريگادا كەلىپ, ءبىر قويدى 800 تەڭگەگە قىرقىپ بەرەدى. ونى ايتاسىڭ, قويدى كەزەكپەن باعامىز عوي. ۇيىندە قوي باعۋعا جارايتىن ادامى جوق وتباسىلار كىسى جالدايدى. ءبىر كەزەگى – ون مىڭ تەڭگە. بىراق اۋىلدا جاستار بولعانىمەن, قويشى تابا المايسىز. بۇرىنعىداي كورشى-قولاڭ بىرىگىپ, كوكتەم مەن كۇزدە قوي قىرقۋ, قاز جۇلۋ ءتارىزدى شارۋالار وسىلاي اتقارىلاتىن بولعان.
تاڭەرتەڭ كەرى اتتانعانبىز. اۋىلدان شىعا بەرە جۇرەگىم سىزداپ قويا بەرگەنى. بۇرىنعى اۋىل قوتانى مەيىرىمگە تۇنىپ تۇرۋشى ەدى.
