بيىل «بولاشاق» باعدارلاماسى اياسىندا 555 ستيپەنديا ءبولىندى. ونىڭ ىشىندە 395 ستيپەنديا ماگيستراتۋرا جانە رەزيدەنتۋراعا, 50 ستيپەنديا دوكتورانتۋراعا, 110 ستيپەنديا تاعىلىمداما باعدارلامالارى بويىنشا ۇلەستىرىلگەن. باسىم ماماندىقتار تىزىمىندە 262 ماماندىق بار.
– وسى جىلى «بولاشاق» ستيپەندياسى اياسىندا ۇمىتكەرلەردى ىرىكتەۋ قاعيدالارى جەتىلدىرىلدى. ەندى كونكۋرسقا شەتەلدىك جوعارى وقۋ ورنى نەمەسە ۇيىمنان اكادەميالىق وقۋعا گرانتى بار ۇمىتكەرلەر دە قاتىسا الادى. بۇل رەتتە «بولاشاق» باعدارلاماسى تۇرۋ, تاماقتانۋ, مەديتسينالىق ساقتاندىرۋ, ۇشۋ, ۆيزالىق الىمدار, وقۋ ماتەريالدارىن ساتىپ الۋ شىعىندارىن وتەيتىن بولادى. سونداي-اق ەڭبەكپەن وتەۋ مەرزىمى ءبىر جىلعا قىسقارادى, – دەپ اتاپ ءوتتى «حالىقارالىق باعدارلامالار ورتالىعى» اق باسقارما توراعاسى ولجاس ساكەنوۆ.
«بولاشاق» ستيپەندياسىن تاعايىنداۋ كونكۋرسىنا جەڭىلدىگى بار ۇمىتكەرلەردى قوسپاعاندا, جەتەكشى شەتەلدىك جوعارى وقۋ ورنىنان شارتسىز شاقىرۋى بار ۇمىتكەرلەر عانا قاتىسا الادى.
وسى جىلدىڭ تاعى ءبىر جاڭالىعى – «بولاشاق» باعدارلاماسىنىڭ كونكۋرستىق ىرىكتەۋ ەرەجەلەرى جەتىلدىرىلدى. ەندى كانديداتتار ءوتىنىم بەرگەن كەزدە شەت تىلىنەن ەمتيحان تاپسىرعانى تۋرالى سەرتيفيكات ۇسىنادى. ماسەلەن, اعىلشىن تىلىندە ماگيستراتۋراعا تۇسۋشىلەر ناتيجەسى كەمىندە 9.0-دان 6.0 IELTS, PBT 677-دەن 498, IBT 120-دان 60 TOEFL سەرتيفيكاتتارىن, تاعىلىمدامادان وتۋشىلەر – IELTS 5.0, PBT-417, IBT-35 TOEFL, DET 75 سەرتيفيكاتتارىن ۇسىنۋعا ءتيىس.
مەملەكەت باسشىسىنىڭ «بولاشاق» باعدارلاماسىن قايتا باعدارلاۋ جونىندەگى تاپسىرماسى بويىنشا ينجەنەرلىك-تەحنيكالىق كادرلاردى دايارلاۋعا باسىمدىق بەرىلەدى. ۇمىتكەرلەردى قولداۋ ءۇشىن «ينجەنەرلىك-تەحنيكالىق قىزمەتكەرلەر» جاڭا جەڭىلدىك ساناتى ەنگىزىلگەن. سونىمەن قاتار حالىقارالىق باعدارلامالار ورتالىعىنىڭ باستاماسىمەن مەديتسينالىق قىزمەتكەرلەردى ىرىكتەۋ قاعيدالارى جەتىلدىرىلدى. اتالعان وزگەرتۋلەردىڭ ناتيجەسىندە جەرگىلىكتى دارىگەرلەر مەن تەحنيكالىق قىزمەتكەرلەر 12 ايعا دەيىنگى تەگىن تىلدىك دايىندىقتان وتە الادى.
