ءىس-شارانىڭ باستى ماقساتى – ەرەكشە ءبىلىمدى قاجەت ەتەتىن بالالاردىڭ شىعارماشىلىق قابىلەتىن ارتتىرۋ, ولاردىڭ دارىنى مەن مادەني ەرەكشەلىگىن دامىتا وتىرىپ, ينكليۋزيۆتى قوعامدا تاۋەلسىز ءومىر سۇرۋىنە ىقپال ەتۋ. فەستيۆالگە ءتۇرلى ورتالىقتار مەن قوعامدىق بىرلەستىكتەردەن, ارنايى مەكتەپتەردەن 80-نەن اسا بالا قاتىستى. مۋزەيدىڭ پەداگوگيكا ءبولىمىنىڭ قىزمەتكەرلەرى ءار بالانىڭ قابىلەتىنە ساي «كيىز باسۋ ونەرى», ء«ۇي تۇمارىن جاساۋ», «ەرمەكسازبەن سۋرەت», «بىرگە سۋرەت سالامىز», «قولسومكەسىن بوياۋ», «سازتەراپيا» شەبەرلىك ساباقتارىن وتكىزدى.
– «مەيىرىم» بالالار فەستيۆالى – ەلىمىزدەگى ەڭ ماڭىزدى ءىس-شارالاردىڭ ءبىرى. ۇلتتىق مۋزەي بۇل فەستيۆالدى مۇمكىندىگى شەكتەۋلى بالالاردىڭ شىعارماشىلىعىن شىڭداۋ ماقساتىندا بەسىنشى جىل قاتارىنان وتكىزىپ كەلەدى. ونى ۇيىمداستىرۋعا دەمەۋشىلەر قولداۋ كورسەتتى. زاعيپ جاندار ءۇشىن ارنايى كورمە ۇيىمداستىردىق. قۇندى ەكسپوناتتار قويىلدى. بالالار ولاردى قولمەن ۇستاپ, سەزىنە الادى. ەستۋ قابىلەتى ناشار بالالار ءۇشىن سۋردواۋدارمالار جاسادىق. مۇمكىندىگى شەكتەۋلى بالالاردىڭ قوعامعا بەيىمدەلۋى ءۇشىن بارىنشا قولداۋ كورسەتۋىمىز كەرەك. ەگەر جىلىلىق پەن ماحاببات سىيلاي الساق, ولاردىڭ ءومىرى جارقىن بولارى انىق, – دەدى ۇلتتىق مۋزەي ديرەكتورىنىڭ مىندەتىن اتقارۋشى اقمارال يبراەۆا.
فەستيۆالگە قاتىسۋشىلارىنىڭ ءبىرى – مارات راحىم. اناسى اسىل اياشەۆانىڭ ايتۋىنشا, ول 7-سىنىپتا وقيدى. ساباق ۇلگەرىمى دە جاقسى. بىراق تسەرەبرالدى سال اۋرۋىمەن, ياعني دتسپ-مەن اۋىرادى.
– ءبىز بۇل فەستيۆالگە العاش رەت قاتىستىق. ءىس-شارا ەرەكشە ۇنادى. بالالار بي بيلەپ, ءان ايتىپ, سازبەن ءتۇرلى بۇيىمدار جاسادى. مۇمكىندىگى شەكتەۋلى بالالارعا ارنالعان وسىنداي ءىس-شارالار ءجيى ۇيىمداستىرىلسا دەيمىز. ولار ءبىر ءسات ۇيدەن شىعىپ, كوڭىل كۇيىن كوتەرەدى, – دەيدى اسىل اياشەۆا.
بالالار فەستيۆالگە بەلسەنە قاتىستى. ولاردى ىنتالاندىرۋ ءۇشىن العىس حاتتار مەن سىيلىقتار بەرىلدى. مۇمكىندىگى شەكتەۋلى بالالارعا ارنالعان فەستيۆال الداعى ۋاقىتتا دا جالعاسىن تابادى.
مەرەي اۋعالي,
ل.ن.گۋميلەۆ اتىنداعى ەۇۋ ستۋدەنتى
