وبلىس اكىمى ءباسپاسوز قىزمەتىنىڭ مالىمەتىنشە, ونىڭ ماتەريالدىق-تەحنيكالىق بازاسىن نىعايتۋعا جەرگىلىكتى بيۋدجەتتەن 14 ملن تەڭگە بولىنبەك. قۇرامىندا ىشەكتى, ۇرمەلى, ۇرمالى اسپاپتاردا وينايتىن 30 مۋزىكانتى بار ۇجىم كۇنى كەشە ونەرسۇيەر قاۋىمعا تالدىقورعاندا كونتسەرتتىك باعدارلاماسىن ۇسىندى. جەتىسۋلىقتاردى وسى قۋانىشتى وقيعامەن وبلىس اكىمى بەيبىت يساباەۆ قۇتتىقتادى.
«بۇگىن جەتىسۋ وبلىسىنىڭ مادەنيەتىندە ۇلكەن جاڭالىق. ەكى ايدىڭ ىشىندە ەسترادالىق-سيمفونيالىق وركەستر قۇرۋ وڭاي ەمەس. بۇگىنگى العاشقى كونتسەرتتە مۋزىكانتتار مەن جەكە ورىنداۋشىلار كورەرمەنگە تالانتتارىن كورسەتتى. ونەرلى ۇجىمعا ۇلكەن العىسىمدى ايتامىن. تالدىقورعاندا قۇرىلعان وركەستر بولاشاقتا الەمنىڭ ۇلكەن ساحنالارىندا ونەر كورسەتىپ, دۇنيە ءجۇزى حالقىن ءتانتى ەتسىن دەپ تىلەيمىن», دەدى ب.يساباەۆ.
كونتسەرتتە جاياۋ مۇسانىڭ, ءشامشى قالداياقوۆتىڭ, نۇرعيسا تىلەنديەۆتىڭ, نۇرلان بايگوزوۆتىڭ, فرانچەسكو ءسارتوريدىڭ, ءالي الپىسباەۆتىڭ شىعارمالارى ورىندالدى.
اتالعان ونەر ۇجىمى وبلىستىق فيلارمونياداعى «Big band» ەسترادالىق وركەسترىنىڭ بازاسىندا جاساقتالدى. وركەستردى ساپالى كادرلارمەن قامتاماسىز ەتۋ ءۇشىن وبلىستىڭ تالانتتى مۋزىكانتتارى تارتىلىپ, قۇرمانعازى اتىنداعى ۇلتتىق كونسەرۆاتوريانىڭ, چايكوۆسكي اتىنداعى مۋزىكا كوللەدجىنىڭ بيىلعى تۇلەكتەرى قاتارىنداعى جاس مۋزىكانتتار وڭىرگە شاقىرتىلىپ وتىر. وركەستردىڭ كوركەمدىك جەتەكشىسى – مادەنيەت سالاسىنىڭ ۇزدىگى دانيار جاقيانوۆ, ديريجەرى – قايرات حالىقوۆ, كومپوزيتورى – تالانتتى مۋزىكانت يليا باشكاتوۆ.
جەتىسۋ وبلىسى
