مۇندا كەشەندى مەديتسينالىق-الەۋمەتتىك, پسيحولوگيالىق-الەۋمەتتىك جانە الەۋمەتتىك-پەداگوگيكالىق جاعىنان وڭالتۋ جۇزەگە اسادى. اتالعان نىسان 1 گەكتار اۋماقتا ورنالاسقان. وندا 54 قىزمەتشى ەڭبەك ەتەدى. مەكەمەدە ءبىر مەزگىلدە 40 مۇگەدەك بالاعا قىزمەت كورسەتىلەدى.
ورتالىق 2 كورپۋستان تۇرادى, ونىڭ العاشقىسىندا ارقايسىسى 6 مۇگەدەك بالاعا ارنالىپ جابدىقتالعان 6 جاتىن جانە ويىن بولمەسى بار. ەكىنشى عيمارات بالالاردىڭ ەم-دوم قابىلداۋىنا ارنالعان. مۇندا مۇگەدەكتىگى بار بالالاردىڭ اياق, قول, تىرەك مۇشەلەرىن ەمدەپ, جاتتىقتىراتىن جابدىقتارمەن قامتاماسىز ەتىلگەن زال, شومىلۋ باسسەينى, مونشا, دۋش, لوگوپەد, دەفەكتولگ, مونتەسسوري, سەنسورلىق, سىلاپ-ۋقالاۋ, تۇزدى شاحتا, ەڭبەككە باۋلۋ بولمەلەرى مەن اكت زالى بار. ەكى كورپۋس اراسىن 100 مەترلىك جابىق ءدالىز جالعايدى.
«وبلىس باسشىلارى ەرەكشە كۇتىمدى قاجەت ەتەتىن جاسوسپىرىمدەرگە جان-جاقتى كەشەندى وڭالتۋ شارالارى قاجەت ەكەنىنە ءمان بەرىپ, زاماناۋي ستاندارتتاردى ەسكەرە وتىرىپ, بۇرىن وبلىس اكىمىنىڭ رەزيدەنتسياسى بولعان وسى كەشەندى وڭالتۋ ورتالىعىنا تارتۋ ەتتى. وڭىردە مۇمكىندىگى شەكتەۋلى 600-دەن اسا ءجاسوسپىرىم بار. ولاردىڭ ءبارىن ورتالىقتىڭ قامقورلىعىنا بىردەن الۋ مۇمكىن ەمەس. سوندىقتان ءبىز 1,5 جاس پەن 18 جاس ارالىعىنداعى 40 جاسوسپىرىمگە كەزەكپەن بەلگىلەنگەن مەرزىمگە وڭالتۋ شارالارىن جاسايمىز», دەيدى مەكەمە ديرەكتورى گۇلناز قىبراەۆا.
وڭالتۋ ورتالىعى مۇگەدەكتىگى بار بالالاردى كۇندەلىكتى تاسىمالداۋعا قاجەتتى ترانسپورت تاۋقىمەتىن تارتىپ وتىر. قازىر مۇندا ورتالىققا كەلەتىن بالالاردى تاسىمالداۋعا ارنالعان ءبىر عانا شاعىن اۆتوبۋس بار. ونىمەن بۇكىل اۋدان اۋماعىن ارالاپ, مۇگەدەك بالالاردى كۇندەلىكتى تاسىمالداۋ مۇمكىن ەمەس. سوندىقتان كەزەكتى كورشىلەس ەلدى مەكەندەردىڭ ورنالاسۋ جاعدايىنا قاراي تۇزۋگە تۋرا كەلەدى.
بۇگىندە جاركەنت قالاسىنىڭ شىعىس بەتكەيىندەگى كۇرەجولدىڭ بويىنا ورنالاسقان اۋىلدارداعى, قالانىڭ ءوز باسىنداعى 40 مۇگەدەك ءجاسوسپىرىم ەم-دوم الىپ جاتىر. ولار كەشەندەگى جاتىن بولمەسىنە قيمىلداۋ قابىلەتىنە, پسيحولوگيالىق جاعدايىنا قاراي ورنالاستىرىلادى. ولارعا ورتالىقتاعى ارنايى مامانداردان باسقا 6 تاربيەشى قىزمەت ەتەدى. بالالارعا 5 ۋاقىت تاماق بەرىلىپ, كۇنى بويى ەم شارالارى جاسالادى.
ورتالىق باسشىسى گۇلناز مۇقاتايقىزى «شىركىن, وقيتىن مۇگەدەكتىگى بار بالالارعا وسى مەكەمەدە ءبىلىم الۋعا جاعداي جاسالسا, ءتىپتى جاقسى بولار ەدى», دەگەن ارمان-تىلەگىن دە ايتىپ قالدى. كوبىنە قاشىقتان ءبىلىم الاتىن وقۋشىلاردى ساباق كەزىندە ۇيىنە نە مەكتەپكە اپارىپ-الىپ كەلۋ تاماقتانۋى مەن ەم الۋ كەستەسىنىڭ بۇزىلۋىنا اسەر ەتەتىن كورىنەدى.
ورتالىقتا مۇمكىندىگى شەكتەۋلى جاسوسپىرىمدەرگە ەم شارالارىن جاسايتىن 8 كابينەت بار. ولاردىڭ ارقايسىندا ارنايى ماماندار جۇمىس ىستەيدى. مىسالى, دەفەكتولوگ جۇلدىز شۇكەيىتوۆا الدىنا كەلگەن مۇگەدەكتىگى بار بالانىڭ تانىمدىق ارەكەتىن قالىپتاستىرىپ, سوزدىك قورىن, ويلاۋ قابىلەتىن ارتتىرسا, مونتەسسوري بولمەسىندەگى پسيحولوگ نۇرگۇل قياسبەكوۆا بالانىڭ ەركىن ويناپ, ءوز بەتىمەن قيمىل-قارەكەت جاساۋىنا جول اشادى. لوگوپەد گۇلنۇر ارىنوۆا بالانىڭ ءتىلىن جەتىلدىرىپ, سويلەۋ قابىلەتىن وڭالتادى. باقىت كوكەەۆ ەڭبەك ەتۋگە باۋليدى, جاتتىقتىرۋشى ەردوس بالابەكوۆ سۋدا ءجۇزدىرىپ, رۇستەم تۋىسباەۆ ارنايى قوندىرعىلار ارقىلى قيمىل-تىرەك مۇشەلەرىن, اياق, قول بۋىندارىن جەتىلدىرۋ جاتتىعۋلارىن جۇرگىزەدى.
ءيا, تۋعانىنان تاعدىردىڭ تاۋقىمەتىن تارتىپ, ءارتۇرلى دەرتتىڭ تىرناعىنا ءىلىنىپ جاتاتىندار كۇننەن-كۇنگە ارتىپ كەلەدى. وكىنىشتى. سوندىقتان قوعامدا مۇمكىندىگى شەكتەۋلى دەپ اتالاتىن بۇل جاندارعا, اسىرەسە بالالارعا جاعداي جاساۋ – مىندەت. سول سەبەپتى پرەزيدەنت قاسىم-جومارت توقاەۆتىڭ باستاماسىمەن ۇيىمداستىرىلعان «يگى ىستەر مارافونى» جالپىۇلتتىق جوباسى اياسىندا اشىلعان مەكەمە بالالاردى قۋانتىپ كەلەدى. ەندى ەل يگىلىگىنە قىزمەت ەتىپ, بالالاردىڭ دەنساۋلىعىن قالىپقا كەلتىرۋگە سەپ بولىپ جاتسا, قۇبا-قۇپ.
جەتىسۋ وبلىسى
