«اگروقالاشىق ەلدى مەكەنىنىڭ (سارىارقا اۋدانى) تۇرعىندارىمەن ناتيجەلى كەزدەسۋ وتكىزدىك. تۇرعىندار جولدار مەن تروتۋارلار, ينجەنەرلىك جەلىلەر سالۋ, جارىقتاندىرۋ, بەينەباقىلاۋ كامەرالارىن ورناتۋ, توزىعى جەتكەن تۇرعىن ۇيلەردى بۇزۋ, گازداندىرۋ سەكىلدى ت.ب. ماسەلەلەردى كوتەردى.
سۇراقتار جەتكىلىكتى, ولار شەشىمىن تابادى. تۇرعىندارمەن بىرگە ەڭ الدىمەن ورىندالۋى ءتيىس مىندەتتەردى بەلگىلەيمىز. اگروقالاشىق ەلدى مەكەنىن كەستەگە سايكەس كەزەڭ-كەزەڭىمەن دامىتامىز», دەپ جازدى جەڭىس قاسىمبەك.
اكىمنىڭ ايتۋىنشا, تۇرعىندار گازداندىرۋ ماسەلەسىن كوتەرگەن.
«اگروقالاشىق ەلدى مەكەنى گازداندىرىلعان. كەيبىر جەكەلەگەن تۇستارى بويىنشا بيىل جۇمىس جوباسى اياقتالادى, ال كەلەر جىلى جەلى قۇرىلىسى باستالادى. قالعان ۇيلەر دە گازعا قوسىلادى. سول سياقتى اپاتتى ۇيلەردى بۇزۋ بويىنشا دا سۇراقتار بار. كەلەسى جىلى اتالعان ەلدى مەكەندە ءۇش ءۇيدى بۇزۋدى جوسپارلاپ وتىرمىز. قالا بويىنشا بارلىعى 200-دەن استام اپاتتى ءۇي بار. الداعى 3 جىلدا توزىعى جەتكەن ۇيلەردىڭ تۇرعىندارى ءۇشىن 2,5-3 مىڭعا جۋىق پاتەر سالۋدى جوسپارلاپ وتىرمىز.
سونداي-اق سۋمەن جابدىقتاۋ بويىنشا سۇراقتار بار: جاڭا اۋىز سۋ ستانتسياسى (سسس-3) ارقىلى وسى ماسەلەنى بيىل ماۋسىم ايىندا ءىشىنارا شەشەمىز, ال تامىز ايىندا تاۋلىگىنە 100 مىڭ تەكشە مەتردەن استام سۋ بەرىلەدى.
اباتتاندىرۋ ماۋسىمىن ەسكەرە وتىرىپ, اۋدانداردا جولدار, تروتۋارلار, اۋلالار مەن قوعامدىق كەڭىستىكتەر سالۋ جۇمىسى ءجۇرىپ جاتىر», دەپ جازدى ەلوردا اكىمى.
