جۋرناليستەر وقۋ-اعارتۋ ءمينيسترى عاني بەيسەمباەۆتان14 جاستاعى وقۋشىنى زورلاماق بولعان 53 جاستاعى دەنە شىنىقتىرۋ مۇعالىمىنە قاتىستى تەرگەۋ امالدارى جايلى سۇرادى. بۇل وقيعا الەۋمەتتىك جەلى قولدانۋشىلارى اراسىندا قىزۋ تالقىلانعان ەدى.
ءمينيستردىڭ ايتۋىنشا, اتالعان ىسكە قاتىستى تەرگەۋ امالدارى ونىڭ جەكە باقىلاۋىنا الىنعان. سونداي-اق بۇل ءىستى مينيسترلىككە قاراستى بالالاردىڭ قۇقىقتارىن قورعاۋ كوميتەتىنىڭ باسشىسى ناسىمجان وسپانوۆا قاداعالايتىنى قوسا ايتىلدى.
«بۇل جاعداي ەرەكشە باقىلاۋعا الىندى. مۇعالىم جۇمىستان شەتتەتىلدى, قازىرگى ۋاقىتتا تەرگەۋ جۇرگىزىلۋدە. بۇل ءىس ىشكى ىستەر مينيسترلىگىنىڭ باقىلاۋىنا دا الىنعان», دەدى ناسىمجان وسپانوۆا.
ونىڭ ايتۋىنشا, تەرگەۋ قۇقىقتىق سالادا ءجۇرىپ جاتىر, مۇعالىمدى جۇمىستان شىعارۋ ماسەلەسىن سوت شەشەتىن بولادى.
«ەڭ باستىسى – ول بالالاردان وقشاۋلاندى», دەدى ۆەدومستۆو باسشىسى عاني بەيسەمباەۆ.
ەسكە سالا كەتسەك, الماتى وبلىسىنداعى اۋىلداردىڭ بىرىندە 14 جاستاعى مەكتەپ وقۋشىسى 53 جاستاعى دەنە شىنىقتىرۋ ءپانى مۇعالىمىنىڭ ۇستىنەن شاعىمدانعان. قىزدىڭ ايتۋىنشا, مۇعالىم قىزدى جۇمىس كابينەتىنە كىرگىزىپ تيىسكەن.
