ەسكە سالا كەتسەك, 18 مامىردا باستالعان باس ەمتيحان 5 شىلدەگە دەيىن وتەدى.
ۇبت-نىڭ العاشقى 5 كۇنىندە شىعىس قازاقستان وبلىسى مەن الماتى قالاسىندا وقيتىن ەكى تالاپكەر ەڭ جوعارى ناتيجە كورسەتتى. ولار جالپى 140 بالدىڭ 133-ءىن جينادى.
بيىلعى تەستىلەۋ فورماتىندا وزگەرىستەر جوق ەكەنىن ايتا كەتۋ كەرەك. پاندەر سانى وزگەرىسسىز قالادى, ياعني ءۇش مىندەتتى جانە ەكى بەيىندىك پاندەر, بارلىعى 120 تەست تاپسىرماسى. ونىڭ ىشىندە, قازاقستان تاريحى – 20, وقۋ ساۋاتتىلىعى – 15, ماتەماتيكالىق ساۋاتتىلىق – 15 جانە ەكى بەيىندىك ءپان بويىنشا 35 تەست تاپسىرماسى ۇسىنىلادى. ەڭ جوعارى ۇپاي – 140. تەستىلەۋدىڭ جالپى ۋاقىتى – 4 ساعات (240 مينۋت).
شەكتى بالل دا وزگەرىسسىز قالدى: «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 بالل, «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» كەمىندە 60 بالل; ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل, باسقا جوعارى وقۋ ورىندارىنا كەمىندە 50 بالل جيناۋ كەرەك.
تالاپكەرلەردىڭ ىڭعايى ءۇشىن ۇبت-نىڭ كۇنىن, ۋاقىتىن, ورنى مەن بەيىندىك پاندەرىن ەسكە سالاتىن SMS-حابارلاما جولدانادى. حابارلاما ۇبت-عا قاتىسۋشىلاردىڭ وزدەرىنە, سونداي-اق كامەلەتكە تولماعان تەستىلەنۋشىلەردىڭ اتا-انالارىنا نەمەسە زاڭدى وكىلدەرىنە جىبەرىلەدى.
