«ورمان ءورتىنىڭ جاعدايى قازىرگى تاڭدا ەرەكشە باقىلاۋدا, ءورتتى ءسوندىرۋ ءۇشىن جەدەل شتاب جۇمىلدىرىلدى. ءورت وشاقتارىن ءسوندىرۋ بويىنشا جۇمىس جۇرگىزىلىپ جاتىر, الايدا جەلدىڭ ەكپىنى مەن باتپاقتى جەرلەر جۇمىستى قيىنداتىپ جاتىر», دەدى وبلىس اكىمى نۇرلان ۇرانحاەۆ.
ءوڭىر باسشىسىنىڭ ايتۋىنشا, ءورت شارپىعان اۋماقتىڭ اۋدانى 3,5 مىڭ گا قۇرايدى. ءورتتى سوندىرۋگە 201 تەحنيكا, 8 تىكۇشاق, 1 ءورت ءسوندىرۋ پويىزى جانە جەكە قۇرامنىڭ 852 ادامى جۇمىلدىرىلعان.
«ەلدى مەكەندەرگە قاۋىپ ءتونىپ تۇرعان جوق, الايدا قاۋىپسىزدىك ماقساتىندا قوسىمشا 277 ادام ءوز بەتىنشە تۋىستارىنا ەۆاكۋاتسيالانعان. توناۋ فاكتىلەرىنىڭ الدىن الۋ ءۇشىن ەۆاكۋاتسيالاۋ ورنىندا پوليتسيا قىزمەتكەرلەرىنىڭ كەزەكشىلىگى ۇيىمداستىرىلعان. سونىمەن قاتار بۇگىن بورودۋليحا اۋدانىندا توتەنشە جاعداي جاريالانادى. توتەنشە جاعدايلار ءبىرىنشى ۆيتسە-ءمينيسترى گەنەرال-مايور يبراگيم كۇلشىمباەۆ حابارلاعانداي, ءورتتى سوندىرۋگە تجم, ءىىم, ەترم, قتج, جاو جانە وبلىستىڭ كوممۋنالدىق قىزمەتتەرىنىڭ كۇشتەرى مەن قۇرالدارى جۇمىلدىرىلعان. جاعداي باقىلاۋدا, ءورتتى وقشاۋلاۋ جانە جويۋ بويىنشا بارلىق مۇمكىن شارالار قابىلدانىپ جاتىر», دەدى اكىم.
پرەمەر-مينيستر وڭىرلەردىڭ ءورت قاۋىپسىزدىگىنە دايىندىق ماسەلەسى وتكەن ۇكىمەت وتىرىسىندا عانا قارالعانىن ەسكە سالدى.
«كورىپ وتىرعانىمىزداي, قاۋىپ وتە جوعارى. ەڭ باستىسى, ەلدى مەكەندەرگە قاتەر ءتونىپ تۇرعان جوق. ءورت تولىق باقىلاۋعا الىندى. ەندى ونى وقشاۋلاپ, تولىعىمەن ءسوندىرۋ كەرەك. بۇل – اكىمدىك پەن توتەنشە جاعدايلار جانە ەكولوگيا مينيسترلىكتەرىنىڭ ورتاق مىندەتى», دەدى ءاليحان سمايىلوۆ.
ول سونداي-اق اباي وبلىسىنا ءورت ءسوندىرۋ كۇشتەرى مەن تەحنيكالارىن جىبەرىپ, كومەك كورسەتكەن وڭىرلەرگە ۇكىمەتتىڭ اتىنان العىسىن ءبىلدىردى.
«ەكولوگيا مينيسترلىگى توتەنشە جاعدايلار مينيسترلىگىمەن بىرلەسىپ, ءورت وشاقتارىن تولىعىمەن جويىپ, كەلتىرىلگەن زالالدى باعالاۋ ءۇشىن «سەمەي ورمانى» رەزەرۆاتىنىڭ اۋماعىنا تەكسەرۋ جۇمىستارىن جۇرگىزۋى قاجەت», دەپ اتاپ ءوتتى ۇكىمەت باسشىسى.
