سۋرەتتى تۇسىرگەن يۋري كيم
جالپى, ەڭبەك ءوتىلى ەكى عاسىردان اساتىن دارىگەرلەر اۋلەتى ۋماروۆتار, ازاماتتىق قورعاۋ ورگانىنىڭ وكىلدەرى اقساقالوۆتار جانە ۇستازدار وتباسى اريشەۆتەر دە مەرەكەلىك ءىس-شارادا بەلسەندىلىك تانىتتى.
«اكەمىز سالعان جولدى ءبىز دە تاڭداعانبىز. بۇگىندە دەنساۋلىق ساقتاۋ سالاسىندا ءالى كۇنگە جەمىستى ەڭبەك اتقارىپ ءجۇرمىز. ىنىلەرىم, سىڭىلىلەرىم دە اقحالاتتى ابزال جاندار. سالاداعى تاجىريبەم وتىز جىلدان استى. ارينە كەز كەلگەن وتباسى باقىتتى بولۋى ءۇشىن ەڭ الدىمەن دەنساۋلىق مىقتى بولۋى قاجەت. سوندىقتان وتانىمىزداعى ءاربىر وتباسىنا دەنساۋلىق تىلەيمىن», دەيدى جوعارى ساناتتى دارىگەر, كارديولوگ گاۋحار ۋماروۆا.
بۇل كۇنى «وتباسى اعاشى» رەسپۋبليكالىق اكتسياسى اياسىندا ورتالىق ساياباققا تال-داراق وتىرعىزىلدى.
ءىس-شاراعا بەلسەنە قاتىسقان «مەرەيلى وتباسى-2022» ۇلتتىق بايقاۋىنىڭ وبلىستىق كەزەڭىنىڭ جەڭىمپازى, جەتىمدەر ۇيىنەن 16 ۇل-قىزدى اسىراپ الىپ, باۋىرىنا باسقان ساپۋرا ەرجانقىزى جاس وتباسىلارعا ىزگى تىلەگىن ارنادى.
مەرەكەلىك ءىس-شارا سپورتتىق جارىسپەن جالعاسىن تاپتى. سونداي-اق بۇلدىرشىندەر ءوز وتباسىلارىنىڭ سۋرەتىن سالىپ, توپقا ءتۇستى. ولارعا 500-دەن اسا تەگىن بالمۇزداق ۇلەستىرىلدى. سالتاناتتى ءىس-شارا سوڭى كونتسەرتتىك باعدارلامامەن قورىتىندىلاندى.
«وتباسى – ءبىز ءۇشىن قاي كەزدە دە ەڭ قاستەرلى ۇعىم. بۇگىن جارىم مادينا شاكيروۆا ەكەۋمىز ايتۋلى داتانى العاش رەت مەرەكەلەپ وتىرمىز. جاس وتباسىلار ءۇشىن ۇيىمداستىرىلعان ينتەللەكتۋالدى ويىندارعا بەلسەندى تۇردە قاتىستىق. ويىن بارىسىندا وتباسى قۇندىلىقتارىنا قاتىستى قىزىقتى ساۋالدار مەن تاپسىرمالار بەرىلدى. ۇلكەندەردىڭ باتاسىن الىپ, مارقايىپ قالدىق. قۇداي ءبىزدى سولاردىڭ جاسىنا جەتكىزسىن», دەيدى جاس شاڭىراقتىڭ يەسى نۇرمۇحاممەد سەيىتوۆ.
جامبىل وبلىسى
