وتكەن عاسىردىڭ 1968 جىلى قۇرىلىپ, تەك قازاقستاندا عانا ەمەس, جاھاننىڭ وزگە مەملەكەتتەرىندە اتاعى اسقان «گۇلدەر» ءانسامبلى اڭىزعا اينالعالى قاشان. گاۆانادا وتكەن ءىى دۇنيەجۇزىلىك ستۋدەنت جاستار فەستيۆالىنەن كەيىن مارتەبەسى بيىكتەپ, حالىقارالىق دەڭگەيدەگى جۇلدەلەرگە يە بولعان انسامبل تاريحتا وشپەس ورنىن قالدىرعان بولاتىن.
قازاقستاننىڭ بەلگىلى ارتىستەرى سارا تىنىشتىعۇلوۆا, روزا رىمباەۆا, قاپاش قۇلىشەۆا, قايرات بايبوسىنوۆ, ايجان نۇرماعامبەتوۆا, ماقپال ءجۇنىسوۆا, ناعيما ەسقاليەۆا, مايرا نۇركەنوۆا, جەڭىس ىسقاقوۆا, باقىت شاداەۆا, باقتيار تايلاقباەۆ, سەمبەك جۇماعاليەۆ, گۇلنار سيقىمباەۆا, قانات جانە ايتكۇل قۇدايبەرگەنوۆ سىندى ونەر مايتالماندارى شىعارماشىلىعىن «گۇلدەردە» باستادى. العاشقى جەتەكشىسى قازاقستاننىڭ حالىق ءارتىسى گۇلجيحان عاليەۆا.
تاياۋدا «گۇلدەر» ءانسامبلىنىڭ جاڭا قۇرامى الماتى كورەرمەندەرى ءۇشىن رەسپۋبليكا سارايىندا ارنايى كونتسەرتتىك باعدارلاما كورسەتتى.
كورەرمەن ىقىلاسى ەرەكشە بولىپ, زالدا ينە شانشار بوس ورىن قالمادى. كەش بارىسىندا ءانسامبلدىڭ تاريحى مەن ونەر مايتالماندارى تۋرالى بەينەروليك كورسەتىلىپ, «گۇلدەردىڭ» ونەردەگى باعىندىرعان بيىك بەلەستەرى تانىستىرىلدى. كوپشىلىككە «گۇلدەر» ءانسامبلىنىڭ شىعارماشىلىق مۇراسىنان ەڭ ۇزدىك قويىلىمدارى مەن ءتۇرلى جانرداعى جاڭا مۋزىكالىق-حورەوگرافيالىق كومپوزيتسيالارى ۇمىتىلماس اسەر سىيلادى.
ەسكە سالا كەتەيىك, بىلتىر تامىز ايىندا روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى اتى الەمگە جايىلعان شىعارماشىلىق ۇجىمدى جاڭعىرتۋ جوباسىن قولعا العان. ۇجىمعا شىعارماشىلىق وقۋ ورىندارىنىڭ تۇلەكتەرى الىنىپ, تاجىريبەلى تالىمگەرلەر – باس بالەتمەيستەر رەتىندە انۆارا سادىقوۆا جانە جوبانىڭ كوركەمدىك جەتەكشىسى ءارى ديريجەرى سەرىك داۋلەتوۆ شاقىرىلعان-تىن.
ايتا كەتەيىك, 1 ناۋرىز كۇنى استانا قالاسىندا ءانسامبلدىڭ جاڭا قۇرامىنىڭ تۇساۋكەسەر كونتسەرتى بولىپ ءوتتى. كەشكە قازاق ەستراداسىنىڭ جۇلدىزدارى, «گۇلدەر» ءانسامبلىنىڭ العاشقى سوليستەرىنىڭ ءبىرى, قازاقستاننىڭ حالىق ءارتىسى روزا رىمباەۆا, ماقپال ءجۇنىسوۆا, جاس انشىلەر ءمادي سىزدىقوۆ, زارينا بوجاكوۆا, ديدار ابدىحالىق جانە سالتانات مەڭدىعاليەۆا, «TURAN» فولكلورلى-ەتنوگرافيالىق ءانسامبلى مەن «Steppe Sons» التەرناتيۆ-فولكلورلىق توبى قاتىستى.
