الەم ەلدەرى تولەرانتتىلىقتىڭ تورگە وزۋى, قوعامدىق كەلىسىم مەن تۇراقتىلىقتىڭ سالتانات قۇرۋى ءۇشىن قانداي قادامدارعا بارۋعا ءتيىس؟ ۇلتتىق جانە ءدىني ديسكريميناتسيامەن جانە توزىمسىزدىكپەن قالاي كۇرەسەمىز؟ وسى سىندى وزەكتى ماسەلەلەردىڭ ءتۇيىنىن تارقاتۋ ءۇشىن بىرنەشە مەملەكەتتىڭ سالالىق ۆەدومستۆولار باسشىلارى ەل استاناسى ءابۋ دابيدە باس قوستى. عالامدىق تاقىرىپ ارقاۋ بولعان جيىنعا اقپارات جانە قوعامدىق دامۋ ءمينيسترى دارحان قىدىرالى ارنايى قاتىسىپ, كۇللى ادامزاتتىق باۋىرلاستىق پەن تاتۋلىق جايىندا وي قوزعاپ, ەلىمىزدەگى ۇلتارالىق جانە دىنارالىق كەلىسىم ۇلگىسىن كوپشىلىككە پاش ەتتى.
– وزدەرىڭىزگە بەلگىلى, XXI عاسىرداعى الەم جۇرتشىلىعىن دۇرلىكتىرىپ وتىرعان سىن-قاتەرلەرگە تويتارىس بەرۋدە تولەرانتتىلىق, ادامي باۋىرلاستىق, تاتۋلىق قۇندىلىقتارى ەرەكشە مانگە يە. ءبىز بۇل قاستەرلى قۇندىلىقتىڭ قادىر-قاسيەتى مەن ءمان-ماڭىزىن كۇنى كەشە دۇنيە ءجۇزىن ءاپ-ساتتە شارپىپ وتكەن كوروناۆيرۋس ىندەتى كەزىندە بايقادىق. ءبىر قوعامدا ءومىر سۇرە وتىرىپ, ءجۇرىس-تۇرىسى شەكتەلىپ, ۆيرتۋالدى بايلانىسقا تۇسكەن كەزدە, تانىس تا بەيتانىس ادامدار ءوزارا تۇسىنىستىك تانىتا وتىرىپ قانا وسى قيىندىقتى ەڭسەردى, – دەدى مينيستر.
ول قازاقستانداعى ەتنوسارالىق جانە كونفەسسياارالىق كەلىسىمدى نىعايتۋ ءۇشىن اتقارىلىپ جاتقان جۇمىستار تۋرالى كەڭىنەن باياندادى.
– بىرىككەن ۇلتتار ۇيىمىندا باسقارۋشى قىزمەت اتقارعان پرەزيدەنت قاسىم-جومارت توقاەۆ الەمنىڭ كۇن تارتىبىندەگى وزەكتى ماسەلەلەر مەن ەلدەگى تىنىشتىقتىڭ تۇراقتى بولۋىنا ۇنەمى نازار اۋدارىپ وتىر. بۇعان قوسا, قازاقستان الەمدىك جانە ءداستۇرلى دىندەر كوشباسشىلارىنىڭ ديالوگ الاڭىنا اينالدى. ءدىن قايراتكەرلەرىنىڭ باسىن قوساتىن ءتۇرلى دىندەر كوشباسشىلارىنىڭ سەزى 2022 جىلى استانادا جەتىنشى رەت وتكىزىلدى, – دەدى د.قىدىرالى.
سونداي-اق مينيستر تولەرانتتىلىقتى ناسيحاتتاۋدا بۇقارالىق اقپارات قۇرالدارىنىڭ ماڭىزىنا ەرەكشە توقتالدى. «مەديادا ارازدىق ءتىلىنىڭ قولدانىلماۋىن قاداعالاپ, كەرىسىنشە, ەلدى بىرلىككە, تاتۋلىققا ۇندەۋدە, حالىقتى رۋحاني جاقىنداستىرۋدا اقپارات قۇرالدارىنىڭ ءرولى زور. بۇگىنگى كونفەرەنتسيا دا وسى ماقساتتىڭ ورىندالۋىنا ءوز ۇلەسىن قوسادى دەپ سەنەمىن جانە ۇيىمداستىرۋشىلارعا العىس ايتامىن», دەدى مينيستر.
جيىن سوڭىندا اقپارات جانە قوعامدىق دامۋ ءمينيسترى د.قىدىرالى مەن ءباا-ءنىڭ تولەرانتتىلىق جانە قاتار ءومىر ءسۇرۋ ءمينيسترى ناحايان بەن مۋباراك ءال-ناحايان ءوزارا ىنتىماقتاستىقتى نىعايتۋ تۋرالى مەموراندۋمعا قول قويدى.
بۇل قۇجات قوعامداعى تولەرانتتىلىق پەن كەلىسىم قۇندىلىقتارىن ناسيحاتتاۋدى كوزدەيدى. اتاپ ايتقاندا, جاستاردىڭ بويىندا تولەرانتتىلىقتى قالىپتاستىرۋ, ءدىني ەكسترەميزمگە قارسى كۇرەس جانە ادامي قۇندىلىقتاردى ىلگەرىلەتۋ ماسەلەلەرى بويىنشا بىرىگىپ جۇمىس ىستەۋ جايى قارالعان.
