ۆەدومستۆو وكىلى حالىقتى سۋمەن قامتاماسىز ەتۋ جۇمىستارى تۋرالى ايتا كەلە الدا اتقارىلاتىن مىندەتتەرگە دە توقتالدى. سپيكەردىڭ سوزىنە سەنسەك, سولتۇستىك قازاقستان, ماڭعىستاۋ, اتىراۋ, جەتىسۋ, باتىس قازاقستان, قىزىلوردا وبلىستارىنىڭ حالقى (قالالاردا) سۋمەن 100% قامتىلعان.
– ال ەڭ تومەنگى دەڭگەي جامبىل (91,9%), قوستاناي (80,4%), اقمولا (89,8%) جانە سولتۇستىك قازاقستان وبلىستارىنىڭ (85%) قالالارىندا بايقالىپ وتىرعانىن ايتا كەتكەن ءجون. وسىعان بايلانىستى بۇل ايماقتاردا سۋمەن قامتۋ جۇمىستارىن جاقسارتۋ ءۇشىن قاجەتتى قاراجاتتى ءبولۋ قاراستىرىلماق, – دەيدى ول.
ازىمبەك پازىلبەك ۇلىنىڭ ايتۋىنشا, سۋدى كوممەرتسيالىق جانە تەحنيكالىق ماقساتتا ۇنەمدەپ, اپاتتى جانە ينۆەستيتسيالىق شىعىنداردى ازايتۋ ءۇشىن رەسپۋبليكالىق بيۋدجەت ەسەبىنەن سۋ ارنالارىن اۆتوماتتاندىرۋ جوبالارىن قارجىلاندىرۋ جوسپارلانعان. اتاپ ايتقاندا, جەلىلەردەگى سۋدىڭ تۇراقتى قىسىمىن رەتتەۋ ءۇشىن سورعى ستانسالارىن مودەلدەپ, باسقارۋعا مۇمكىندىك بەرەتىن بارلىق وندىرىستىك ۇردىسكە بايلانىستى سۋ رەسۋرستارىن ەسەپكە الۋدىڭ تولىق كەشەنىن قامتاماسىز ەتۋ كوزدەلگەن. بۇل سۋمەن قامتۋ جانە سۋ قۇبىرى جۇيەسىن جاڭعىرتۋعا ارنالعان شىعىنداردى ازايتۋعا سەپتىگىن تيگىزەدى.
بۇعان قوسا ۆەدومستۆو وكىلى مينيسترلىكتىڭ اۋىز سۋدى ارزانداتۋعا باعىتتالعان جۇمىستارى جونىندە ايتتى. ماسەلەن, سۋ كودەكسىنە سايكەس مەملەكەتتىك ماڭىزدى توپقا جاتاتىن جانە دەربەس جەرگىلىكتى سۋمەن قامتۋ جۇيەلەرى ارقىلى تاراتىلاتىن تازا سۋ قىزمەتتەرىنىڭ قۇنىن ءىشىنارا سۋبسيديالايدى. ياعني جەرگىلىكتى اتقارۋشى ورگاندار ءوڭىردىڭ الەۋمەتتىك-ەكونوميكالىق دامۋى مەن تاريفتەرىنە ساي 1 تەكشە مەتر اۋىز سۋدىڭ باعاسىن بەلگىلەيدى. وسى ارقىلى تاريف پەن تولەم كولەمى اراسىنداعى ايىرماشىلىقتى مەملەكەت سۋبسيديا بەرۋ ارقىلى رەتتەيدى.
– الايدا ەلىمىزدە قاجەتتى ەسەپتەۋ قۇرىلعىلارى بولعان جاعدايدا ءبىر ادامعا سۋبسيديالاۋدىڭ نورماتيۆتىك شەكتەۋى (قۇرىلىس نورمالارى مەن ەرەجەلەرىنە (قنجە) سايكەس تاۋلىگىنە 140 ليترگە دەيىن) بەلگىلەنگەنىن ەسكەرگەن ءجون. بۇل تىرشىلىك نارىنە ۇنەمدەپ قاراۋعا باعىتتالعان امال بولىپ وتىر. ال سۋدى تۇتىنۋ كولەمى بەلگىلەنگەن نورمادان اسىپ كەتكەن جاعدايدا كەز كەلگەن ازامات ونىڭ اقىسىن تاريف بويىنشا تولىق تولەۋگە ءتيىس, – دەيدى ۆەدومستۆو وكىلى.
