اتالعان ءىس-شاراعا استانا قالاسىنىڭ ءماسليحات دەپۋتاتى, الەۋمەتتىك-مادەني دامۋ جونىندەگى تۇراقتى كوميسسيانىڭ مۇشەسى جاندوس راحمەت, ءماسليحات دەپۋتاتى ازامات ايتحوجين, سارىارقا اۋدانىنىڭ اكىمى باۋىرجان ەرالى, جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب جانە «Amanat» پارتياسىنىڭ الماتى اۋداندىق فيليالى توراعاسىنىڭ ورىنباسارى يگور نەسەن قاتىسىپ, قوعامدىق بىرلەستىكتىڭ لەنتاسىن قيدى.
– پرەزيدەنت قاسىم-جومارت توقاەۆتىڭ جولداۋىندا تسەرەبرالدى سال اۋرۋىنا شالدىققان بالالارعا مەديتسينالىق جانە الەۋمەتتىك قولداۋ كورسەتۋ ساپاسىن جاقسارتۋ ماسەلەسى ايتىلعان. ونىڭ ىشىندە ەرەكشە قاجەتتىلىگى بار بالالارعا ارنالعان شاعىن جانە ورتاشا وڭالتۋ ورتالىقتارى جەلىسىن ارتتىرۋ ماسەلەسى ايرىقشا تاپسىرىلعان ەدى. سوعان سايكەس قازىر ەلىمىزدىڭ ءبىراز جەرىندە وڭالتۋ ورتالىقتارى اشىلىپ جاتىر. سونىڭ ءبىرى – مۇمكىندىگى تومەن بالالارعا ارنالعان «بەرەكە استانا» مۇگەدەكتەردى دامىتۋ جانە ولاردى وڭالتۋ رەسپۋبليكالىق ورتالىعى, – دەدى ي.نەسەن.
ءوز كەزەگىندە سارىارقا اۋدانىنىڭ اكىمى باۋىرجان ەرالى بار ىنتا-شىنتاسىن ارناپ, ەرەكشە قاجەتتىلىگى بار بالالاردى تاربيەلەپ جاتقان بارلىق مامانعا ايرىقشا العىس ءبىلدىردى.
– ءبىز ءۇشىن ءاربىر بالدىرعاننىڭ دەنساۋلىعى مەن ءومىرى وتە ماڭىزدى. وڭالتۋ ورتالىقتارىنىڭ اشىلىپ جاتقانىنا وتە قۋانىشتىمىز, قايىرلى, قۇتتى بولسىن! بالدىرعانداردىڭ وسى ورتالىقتان ءبىلىم الۋىنا, دامىپ جەتىلۋىنە تىلەكتەسپىز. ءاربىر بالا ءوز وتانىنىڭ ىستىق الاقانىن سەزىنىپ ءوسۋى كەرەك. سونداي-اق اكىمدىك ورتالىقتىڭ جۇمىسىن ارقاشان قولداۋعا ءازىر ەكەنىن بىلدىرەمىن, – دەدى قۇتتىقتاۋ سوزىندە.
«بەرەكە استانا» بالالاردى دامىتۋ جانە وڭالتۋ ورتالىعىندا لوگوپەد, دەفەكتولوگ, فيزيوتەراپەۆت, ماسساجيست قاتارلى ءتۇرلى ماماندار قىزمەت كورسەتەدى.
– مۇمكىندىگى تومەن بالالاردى تاربيەلەپ وتىرعان كوپتەگەن اتا-انانىڭ جاعدايى مەن ءومىر ءسۇرۋ دەڭگەيى ءارتۇرلى. سوندىقتان ولار مامانداردىڭ ەڭبەگىن اقىلى تۇردە پايدالانۋى قيىن. ماسەلەن, قازىر لوگوپەد, دەفەكتولوگ, فيزيوتەراپيالىق جاتتىعۋلار مەن ماسساجدىڭ اقىلى قىزمەتتەرى قىمبات. وسى جاعدايلاردى ەسكەرىپ, ەرەكشە قامقورلىققا مۇقتاج بالالاردى قولداۋ ماقساتىندا ءبىز استانا قالاسى سارىارقا داڭعىلى, 48 مەكەنجايىندا مۇمكىندىگى تومەن بالالارعا ارنالعان «بەرەكە استانا» بالالاردى دامىتۋ جانە وڭالتۋ ورتالىعىن اشتىق, – دەيدى رەسپۋبليكالىق قوعامدىق بىرلەستىكتىڭ باسشىسى ايگۇل بولاتوۆا.
ايگۇل راحىمقىزىنىڭ ايتۋىنشا, ورتالىق قازىردىڭ وزىندە 300-دەن اسا مۇمكىندىگى شەكتەۋلى بالالارعا قولداۋ كورسەتىپ وتىر.
– ءبىزدىڭ ورتالىقتىڭ ماقساتى – مۇمكىندىگى تومەن بالالاردى ءساتتى وڭالتۋ جانە قوعامدىق ورتاعا بەيىمدەۋ. ول ءۇشىن دەفەكتولوگ, لوگوپەد, پسيحولوگ, الەۋمەتتىك پەداگوگ, جاتتىعۋ تەراپياسىنىڭ نۇسقاۋشىلارى, ەرگوتەراپەۆت, اۆا-تەراپەۆتەردىڭ قىزمەتتەرىن تەگىن ۇسىنامىز. ءبىزدىڭ ورتالىقتىڭ بۇگىن رەسمي اشىلۋ سالتاناتى بولىپ جاتقانىمەن, جۇمىسىن بۇدان ءبىراز بۇرىن باستاپ كەتكەن ەدى. باستاعان جۇمىسىمىزعا ساي قازىردىڭ وزىندە بالالار جاقسى ناتيجە بەرە باستادى. ولار العاشقى سوزدەرىن ايتىپ, العاشقى قادامدارىن باستى. بالالاردىڭ قارىم-قاتىناس داعدىلارى دا جاقسارىپ كەلەدى, – دەيدى ول.
جيىنعا قاتىسقان اتا-انالاردىڭ دا ورتالىققا دەگەن العىسى ەرەكشە. اسىرەسە, التىناي ەسەنعابىل ەسىمدى اتا-انا ورتالىقتىڭ العاشقى اياق الىسى, قىزمەت كورسەتۋ ساپاسى كوڭىلدەن شىعىپ كەلە جاتقانىن ايتادى.
– «بەرەكە استانا» ورتالىعى اشىلعالى ءتۇرلى مامانداردىڭ كومەگىنە جۇگىنۋ قيىن ەمەس. قازىر اپتاسىنا ەكى رەت الەۋمەتتىك پەداگوگ مامانى ۇيگە كەلىپ, بالامىزعا ءبىلىم بەرىپ ءجۇر. ورتالىقتان مەرەكە كەزدەرىندە بالالارعا سىيلىقتار بەرىلىپ تۇرادى. ونىڭ بالالار ءۇشىن ورنى ەرەكشە ەكەنىن ايتىپ جەتكىزۋ مۇمكىن ەمەس. ەلىمىزدە ەرەكشە بالالارعا ەرەكشە قامقورلىق كورسەتىلىپ جاتقانىنىڭ ءبىر كۋاسى – وسى. بارلىعى تەگىن, بىراق تەگىن بولعانىمەن قىزمەت كورسەتۋ ساپاسى دا جامان ەمەس. سوندىقتان ورتالىقتاعى ماماندارعا العىس ايتامىز, – دەيدى التىناي بولاتكىزى.
