ءبىرىنشى رەت قولعا الىنعان ءوڭىر چەمپيوناتىنا وبلىستىڭ ءار قيىرىنان كەلگەن جەتى كوماندا قاتىسىپ, ءوزارا كىم مىقتى دەگەن ساۋالعا جاۋاپ ىزدەدى. جەتى كوماندانىڭ نامىسىن قورعاعان ون التى بالىقشىنىڭ قاي-قايسىسى دا جەڭىستىڭ بيىك تۇعىرىنان كورىنۋگە كۇش سالدى.
چەمپيونات قورىتىندىسىندا قارسىلاستارىنان وق بويى وزىق بولعان, قۇرامىندا عابيت يگىلىكوۆ, ەلنۇر تايتەليەۆ سەكىلدى تاجىريبەلى بالىقشىلار توپتاسقان «King Carp» كومانداسى توپ جارسا, «carp NRG» كومانداسى كۇمىس جۇلدەگەر اتاندى. ال ۇزدىك ۇشتىكتى «Zhambyl carp club» كومانداسى تۇيىندەدى.
ۇيىمداستىرۋشى تاراپ دوداعا قاتىسقان كوماندالاردىڭ ىشىندە ەڭ ءىرى بالىق اۋلاعان كومانداعا «big fish» كۋبوگىن تاپسىردى. اتالعان كۋبوك سالماعى 10 كيلوگرامم 520 گرامدى قۇرايتىن الىپ بالىقتى قارماعىنا تۇسىرگەن «كing carp» كومانداسىنىڭ جىگىتتەرىنە بۇيىردى.
ءۇش كۇنگە سوزىلعان ءوڭىر چەمپيوناتىنىڭ قورىتىندىسىندا جالپى سالماعى 200 كيلوگرامم بالىق اۋلانسا, جارىس ەرەجەسىنە سايكەس قارماققا ىلىنگەن بالىقتىڭ بارلىعى دا كولگە قايتا جىبەرىلدى.
جامبىل وبلىسى
