دەپۋتاتتار ساپار بارىسىندا جەرگىلىكتى اتقارۋشى ورگانداردىڭ باسشىلارىمەن, اۋىل شارۋاشىلىعى وكىلدەرىمەن كەزدەستى. اۋىلدىق اۋماقتار مەن اۋىل شارۋاشىلىعىن دامىتۋ ماسەلەلەرىمەن تانىسۋ ماقساتىندا ەسكەلدى, كەربۇلاق جانە پانفيلوۆ اۋداندارىنداعى اۋىلدىق ەلدى مەكەندەردە بولدى.
دەپۋتاتتار «اۋىل - ەل بەسىگى» جانە «اۋىل اماناتى» جوبالارىنىڭ ىسكە اسىرۋ بارىسىمەن تانىستى, سونداي-اق «اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىن» ودان ءارى ىسكە اسىرۋ ماسەلەسى بويىنشا شارۋا قوجالىقتارىنىڭ وكىلدەرىمەن پىكىر الماستى.
«سىزدەر اۋىل شارۋاشىلىعىنىڭ ءبىزدىڭ ەلىمىزدىڭ ەكونوميكاسى مەن حالقىمىزدىڭ الەۋمەتتىك جاعدايى ءۇشىن ماڭىزى زور ەكەنىن جاقسى بىلەسىزدەر. سەبەبى اۋىل شارۋاشىلىعى ءبىزدىڭ ەلىمىز ءۇشىن ەكونوميكانىڭ نەگىزگى باسىم باعىتى, سونداي-اق ازىق-ت ۇلىك قاۋىپسىزدىگىنىڭ باستى كەپىلى بولىپ تابىلادى جانە الەۋمەتتىك تۇرعىدان ەرەكشە ماڭىزعا يە. اۋىل – قازاق حالقىنىڭ جۇرەگى. سوندىقتان اۋىلدىق اۋماقتاردى دامىتۋ – ءبىزدىڭ مەملەكەتىمىزدىڭ العا قويعان ماڭىزدى ماسەلەلەردىڭ ءبىرى. بۇگىنگى كەزدەسۋلەردىڭ باستى ماقساتى – وسى سالالارداعى وزەكتى ماسەلەلەردى اشىق تالقىلاۋ جانە شەشۋ جولدارىن قاراستىرۋ», دەدى سەناتور ءالي بەكتاەۆ.
جەتىسۋ وبلىسىنىڭ تۇرعىندارى مەن اگرارلىق بيزنەس وكىلدەرى ءوز كەزەگىندە سەناتورلارعا ەگىس داقىلدارى مەن مال شارۋاشىلىعىن سۋبسيديالاۋعا, سونداي-اق اۋىل تۇرعىندارىنىڭ تابىسىن ارتتىرۋعا قاتىستى بىرقاتار ماسەلە تۋرالى ايتىپ بەردى.
دەپۋتاتتار كەزدەسۋلەر قورىتىندىسى بويىنشا وڭىردەگى وزەكتى ماسەلەلەر تۋرالى ۇكىمەتكە ءتيىستى ۇسىنىستار ەنگىزەتىنىن جانە قويىلعان مىندەتتەردىڭ ورىندالۋ بارىسىن باقىلاۋدا ۇستايتىنىن اتاپ ءوتتى.
