جاڭاتاسقا جاڭا ۆاگوندارمەن باراسىز

تارازدان شولاققورعانعا شىعاتىن ۇزىن جولدىڭ بويىن­داعى قاراتاۋ قالاسى وبلىس ورتالىعىنان 100, جاڭاتاس 170 شاقىرىم قاشىقتىقتا جاتىر. قاتار جاتقان قوس شاعىن قالاعا بيلىكول ارقىلى باراتىن جول ءبىرشاما جاقسى, ال اقكول ارقىلى بارساڭىز, اجەپتاۋىر ازاپقا تۇسەتىنىڭىز انىق. سارىسۋدىڭ سارى دالاسىندا ۇشارىن جەل, قونارىن ساي ءبىلىپ, اپپاق بوپ قاتىپ جاتقان كادىمگى كوك تۇزدى توننالاپ تاسيتىن اۋىر جۇك كولىكتەرى بۇل جولدىڭ كوپ جەرىن ەزىپ, ويدىم-ويدىم ەتىپ تاستاعان. سوندىقتان بۇل جاقتىڭ تۇرعىندارى وبلىس ورتالىعىنا ءبىر جاعى شويىن جولمەن قاتىناعاندى قولايلى كورەدى. جول-جونەكەي جامبىل, تالاس, سارىسۋ اۋداندارىنىڭ بىرقاتار ەلدى مەكەندەرىن باسىپ ءوتىپ, جاڭاتاسقا بارىپ ءبىر-اق توقتايتىن بۇل تەمىرجول راس بولسا, كەزىندە قاسيەتتى تۇركىس­تانعا توتەسىنەن تارتىپ, ەكى ارانى جاقىنداتپاق جوسپارمەن سالىنعان كورىنەدى. بىراق و باستا ويعا العان ءىستى قانداي جاعدايدىڭ بۇزعانىن قايدام, ازىرگە قوس رەلس ءوندىرىستى قالامەن تۇيىقتالىپ تۇر. ايتسە دە, وسىناۋ پويىز بۇل جاقتاعى ەلدىڭ ەرتتەۋلى اتى سياقتى, ءتۇسىپ-مىنۋگە دە, قالاعا قاتىناۋعا دا ىڭعايلى. ەل ايگىلى ء«ترانسسىبىر ەكسپرەسى» ءفيلمىنىڭ كەيبىر سيۋجەتتەرى وسى جولدىڭ بويىندا تۇسىرىلگەنىن جىر قىلىپ ايتادى. قايبىر جىلدارى تاراز بەن جاڭاتاستىڭ اراسىندا قاتىنايتىن وسىناۋ پويىزدىڭ ءبىراز ۋاقىت توقتاپ قالعان كەزدەرى دە بولدى. تەمىرجول باسشىلارى ونسىز دا القام-سالقامى شىققان ءبىر ۆاگوننىڭ ءوزىن كوپ كوردى مە, قاڭ­تارىپ قويىپ, جەرگىلىكتى بيلىك ارەڭ دەگەندە كەمشىلىكتى تۇزەگەن-ءدى. مىنە, ول كۇندەردىڭ قيىندىعى كەلمەسكە كەتكەندەي. قازىر وبلىستىڭ قورجىنى توق, ەلدىڭ تۇرمىسى تۇزەلە باستادى. ارنايى مەملەكەتتىك باعدارلامانىڭ ارقاسىندا شاعىن قالالار دا ەڭسەسىن تىكتەپ كەلەدى. جاڭا زامانعا ساي ەل دە جاڭا دۇنيەنى تالاپ ەتەدى. وسىعان وراي تاراز شاھارى مەن ءوندىرىستى كەنتتەردىڭ اراسىنا جۇرەتىن پويىز قۇرامى قوسىمشا ۆاگوندارمەن تولىقتى. بۇعان دەيىن ەكى ورتانى جول قىلىپ, ابدەن توزىعى جەتكەن جالعىز ۆاگون سۋ جاڭا ءۇش ۆاگونمەن الماستىرىلدى. جولاۋشىلارعا بارىنشا قولايلى جاعداي جاسالعان بۇل ۆاگوندار 165 جولاۋشىعا ارنالعان. ءتىپتى, بارلىعىنا تەلەديدار مەن سالقىنداتقىش ورنا­تىلىپتى. سونداي-اق, جول ءجۇرۋ ۇزاقتىعى دا ايتارلىقتاي قىسقاردى. پويىزدىڭ ءارى-بەرى تۇراقتى قاتىناۋى ءۇشىن وبلىس قازىناسىنان 280 ملن. تەڭگەدەي قارجى ءبولىندى. – «گازەل», اۆتوبۋسقا قارا­عاندا پويىز وتە ءتيىمدى. كەيبىر ەلدى مەكەندەر ۇلكەن تاس جولدان الىس, پويىز جولدىڭ بويىندا ورنالاسقان. ونداي اۋىلدارعا اۆتوبۋستار كىرە بەرمەيدى. ءبىر جاعى بۇل پويىز حالىقتىڭ قالتاسىنا دا ءتيىمدى. قاراتاۋدان تارازعا دەيىن نەبارى 155 تەڭگە تولەيسىڭ, – دەيدى قاراتاۋ قالاسىنىڭ تۇرعىنى كەنجەبەك ساپاروۆ. جامبىل وبلىسى اكىمىنىڭ ورىنباسارى بەكبولات ورىنبەكوۆ جاڭا ۆاگونمەن ساپارعا شىققان جولاۋشىلارعا ءسات-ساپار تىلەپ, تاراز بەن جاڭاتاستىڭ اراسىن جاقىنداتا تۇسكەن بۇل پويىزعا جەرگىلىكتى بيۋدجەتتەن بارلىق جاعدايدىڭ جاسالاتىنىن جەتكىزدى. ورالحان ءداۋىت, «ەگەمەن قازاقستان». جامبىل وبلىسى. سۋرەتتى تۇسىرگەن اقادىل رىسماحان.