– انە-مىنە بىتەدىمەن كەلە جاتىرمىز. كەزەگىمىزدى سارعايىپ, ساعاتتاپ كۇتەمىز. دارىگەرگە ازەر جەتكەنىمىزدە بازا ىستەمەي قالادى. ءسويتىپ جۇيكەمىز جۇقارۋدا. استانادان كوشىپ كەلگەنىمە 4 جىلعا جۋىقتادى. ول جاقتا مۇنداي قيىندىقتى كورمەگەن ەدىك. تىنىس جولى اۋرۋىمەن ەسەپتە تۇراتىن كۇيەۋىمنىڭ دارىلەرىن الا المايمىن. استانادا بار ءدارى اۋىلدا جوق دەگەن جاۋاپ الدىق. الماتىعا جاقىن ماڭداعى اۋىلداردىڭ كۇيى وسى بولسا, شالعايداعى ەلدى مەكەندەردەگى مەديتسينانى ەلەستەتۋ مۇمكىن ەمەس شىعار, دەگەن نازگۇل ەسىمدى ءتورت بالانىڭ اناسى جوندەۋدەن ءوتىپ جاتقان امبۋلاتوريانىڭ تسيفرلاندىرىلىپ, ەلەكتروندى كەزەكتىڭ جولعا قويىلۋىن كۇتەدى.
دارىگەرگە كەزەگىن كۇتكەن بەسىنشى بالاعا جۇكتى جاريا اقجولتاەۆا مەكەمەنىڭ قولايسىزدىعىمەن قوسا, تەراپەۆت, گينەكولوگتەن باسقا تۇرعىندارعا اسا قاجەت نەۆروپوتولوگ, پۋلمانولوگ, كوز, ءتىس دارىگەرلەرىنىڭ جوقتىعىن, ولارعا قارالۋ ءۇشىن قالاداعى اقىلى ەمحانالارعا سابىلاتىندارىنا رەنىشىن ءبىلدىردى.
– اينالايىن-اۋ, مىنا جەردە سيستەما الىپ ءبىز جاتامىز, اناۋ بۇرىشتى كولەگەيلەپ قويىپ, ايەلدەردى تەكسەرىپ جاتادى. كوز الدىمىزدا بالا-شاعا مەن ناۋقاستارعا ۋكول سالىپ, ەكپە جۇمىستارىن جاسايدى. سىرت كيىمنىڭ ءۇيىلىپ, اياق كيىمنىڭ ءتىزىلىپ تۇرىسى اناۋ. ەشقانداي سانيتارلىق نورما ساقتالماعان. ەمشارا, تاڭۋ جۇمىستارى ستەريلدى كابينەتتە جاسالۋى كەرەك ەمەس پە؟ اۋاسى تار, ادام اينالمايتىن اياداي جەردە بۇكىل جۇمىس اتقارىلادى. بۇل نە ماسقارا؟ ورتالىقتان جەتۋ دە وڭاي ەمەس. تاياعىمىزدى سۇيرەتىپ, ۇلكەن جولدان وتەمىز. باسىندا ەكى ايعا دەگەندى ەستىپ ەدىك, ەكىنشى جىلعا كەتىپ بارادى. مۇنداعى مەديتسينا ماماندارىنا ەش وكپەمىز جوق. ولار وسىنداي قيىندىققا قاراماستان ءوز ىستەرىن مۇلتىكسىز اتقارىپ ءجۇر. ءبارى تاجىريبەلى, مەيىرىمدى, قايىرىمدى. تەك ءوزىمىزدىڭ عيماراتقا تەزىرەك كوشىرسە دەگەن تىلەگىمىز بار, دەدى 75 جاستاعى ەم الۋشى اۋىل تۇرعىنى قىزجىبەك تالعاربايقىزى.
تويحانا عيماراتىنا 2021 جىلدىڭ قازان ايىندا كوشىپ كەلگەن مەديتسينالىق مەكەمەدە 8 700 ادام تىركەۋدە تۇرسا, ولارعا بەس ۋچاسكە بويىنشا 3 جالپى تاجىريبەلىك دارىگەر قىزمەت كورسەتەدى. ياعني ەكى دارىگەر جەتىسپەيتىن كورىنەدى.
– تۇرعىندار رەنىشى ورىندى. ويتكەنى ۇلكەن-كىشىنى, جۇكتى ايەلدەردى, قىزۋى مەن قان قىسىمى كوتەرىلگەن ناۋقاستاردى دا دارىگەرلەر وسى زالدا قابىلدايدى. ەرتەدەن كەشكە دەيىن ابىر-سابىر بولامىز. اراسىندا بالالار جىلايدى. كىسى اياعى ءسال سايابىرسىعان ءساتتى پايدالانىپ, ەكى كۆارتستى قوسامىز. دارىلەردى ساقتايتىن ورىن دا تالاپقا ساي بولماعاندىقتان از-ازدان امالداپ, تاسىمالداۋعا ءماجبۇرمىز. دەسەك تە ءوز ورنىمىزعا كوشەتىن ۋاقىت تاياپ قالعان سياقتى. سوندىقتان تۇرعىندارعا شىدامدىلىق تانىتۋدان باسقا امال جوق, – دەدى اعا مەيىربيكە ايگۇل داۋرەنبەكوۆا.
تالدىبۇلاق اۋىلدىق امبۋلاتورياسىندا جەدەل جاردەم كولىگى جوق. شاقىرتۋلارعا دارىگەرلەر «نيۆا» اۆتوكولىگىمەن بارادى. اناليز, ءدارى-دارمەك تە سونىمەن تاسىمالدانادى. ال ناۋقاستىڭ جاعدايى اۋىر بولسا, وعان اۋداندىق اۋرۋحانادان جەدەل جاردەم مەن دارىگەرلەر كەلىپ, قىزمەت كورسەتەدى. تويحاناداعى امبۋلاتوريادا ورىن تاپشىلىعىنا بايلانىستى ازىرگە 3 توسەكتە كۇندىزگى ستاتسيونارداعى ناۋقاستار ەم-دومىن الۋدا. نەگىزىندە 5 توسەك بەكىتىلگەن.
تالدىبۇلاق اۋىلىنداعى دارىگەرلىك امبۋلاتوريانىڭ جاعدايىن بىلمەككە «تالعار اۋداندىق ورتالىق اۋرۋحاناسىنىڭ» ديرەكتورى حاسەن داسىبەكوۆكە بارعان ەدىك.
– اۋدان بويىنشا 220 مىڭ حالىققا مەديتسينالىق قىزمەت كورسەتىلىپ جاتىر. 2021 جىلى 31 مەديتسينالىق نىسانعا كۇردەلى جوندەۋ جۇمىستارى جاسالدى. قازىرگى كۇنى جوندەۋ جۇمىسىن قاجەت ەتەتىن 3 نىسان بار. بۇل – نۇرا اۋىلدىق اۋرۋحاناسى, بەلبۇلاق جانە تالدىبۇلاق دارىگەرلىك امبۋلاتوريالارى. تالدىبۇلاقتاعى نىسانعا قۇرىلىس جۇمىستارىنىڭ 70-80 پايىزى جاسالىپ, بىتكەن. مەردىگەر كومپانيانىڭ قۇرىلىس جۇمىستارىن بەلگىلەنگەن مەرزىمدە اياقتاماۋى ءارى قۇرىلىس بارىسىندا جىبەرىلگەن كەمشىلىكتەرگە بايلانىستى سوت ءجۇرىپ جاتىر. ءىس اياقتالعان سوڭ, نۇرا مەن تالدىبۇلاقتاعى نىسانداردىڭ جۇمىسى تولىعىمەن اياقتالادى. سوتتىڭ قاشان اياقتالاتىنىن مەن دە بىلمەيمىن. ال بەلبۇلاق دارىگەرلىك امبۋلاتورياسى كۇردەلى جوندەۋ جاساۋعا كەلە مە, جوق پا, ول مەملەكەتتىك ساراپتامادان سوڭ بەلگىلى بولادى, دەگەن اۋداننىڭ باس دارىگەرى حاسەن اجىبەك ۇلى اتالعان ءۇش نىساننىڭ دا 2012-2013 جىلدارى بەرىلگەنىن ايتتى.
ون جىل بۇرىن عانا پايدالانۋعا بەرىلگەن بۇل نىسانداردىڭ بۇگىنگى ساپاسى جوعارىدا ايتقانىمىزداي سىن كوتەرمەيتىن كۇيدە. سونىڭ ءبىرى – بەلبۇلاقتاعى قۇلاۋعا شاق تۇرعان مەديتسينالىق مەكەمە. سەيسموقاۋىپتى نىسانعا كىرۋگە تۇرعىندار نارازىلىق بىلدىرگەن سوڭ, ونى جاۋىپ, ماماندار جانىنداعى ەسكى امبۋلاتوريادا جۇمىس ىستەپ جاتىر. ورتالىقتان شالعايداعى نۇرا اۋىلدىق اۋرۋحاناسىنىڭ دا 70 پايىزى جاسالىپ, تولىققاندى اياقتالۋىن كۇتۋدە. باس دارىگەردىڭ ايتۋىنشا, بۇل نىسانداردىڭ كۇردەلى جوندەۋ جۇمىستارى اياقتالىسىمەن ءوز قىزمەتىن جالعاستىرادى.
وسى ورايدا ايتا كەتەرلىك جايت, 2020 جىلى تالعار اۋداندىق ورتالىق اۋرۋحاناسى «ا-سlass-Medical» جاۋاپكەرشىلىگى شەكتەۋلى سەرىكتەستىگىنە سەنىمگەرلىك باسقارۋعا وتكەن.
الماتى وبلىسى
