سۋرەتتەردى تۇسىرگەن ەرلان ومار, «EQ»
قازاقستاننىڭ «قىزىل كىتابىنا» ەنگەن قىزعىلت قوقيقازدار – جىلى جاققا قونىس اۋدارىپ, ۋاقىتى كەلگەندە كەرى قايتاتىن جىل قۇستارى. ولار جازدا اقمولا وبلىسىنداعى قورعالجىن قورىق ايماعىن مەكەندەسە, قىستا يراك نەمەسە تۇرىكمەنستاننىڭ جىلى ايماقتارىنا كوشەدى. ال كوكتەمدە جانە كۇزدە جول بويى ماڭعىستاۋ ايماعىنا تىنىعۋ ءۇشىن قوناقتايدى, ناقتىراق ايتساق, بۇل قۇستاردىڭ ميگراتسياسى بەينەۋ اۋدانى اۋماعىنان وتەدى. وسى قيىن ساپار بارىسىندا وسىمەن ەكىنشى رەت قوقيقازداردىڭ ولەكسەلەرى ماڭعىستاۋ دالاسىندا شاشىلىپ قالدى.
بيىل قىزىلاسكەر اۋىلىنىڭ ماڭايىنان بەس قوقيقازدىڭ ولەكسەسى قۇم اراسىندا جاتقانىن سول اۋماقتا مال قاراپ جۇرگەن 7-سىنىپ وقۋشىسى عيزات ورىنباي كورىپ, ۆيدەوعا ءتۇسىرىپ العان. وتكەن جىلى قوقيقازدار ولىمىنە ماماندار ايماقتاعى قولايسىز اۋا رايى سەبەپ بولۋى مۇمكىن دەگەن پىكىر ايتقان ەدى. كوكتەم باستالىسىمەن الاپات جەل مەن شاڭدى داۋىل كوز اشتىرماي تۇرعان ماڭعىستاۋدا قۇستاردىڭ شىعىنىنا اۋا رايى اسەر ەتتى دەۋگە نەگىز بار.
– قولايسىز اۋا رايىندا قۇستاردىڭ السىزدەرى ءارى قاراي سولتۇستىك باعىتقا ۇشا الماي ورتا جولدا قونىپ, اۋا رايى جانە السىزدىك سالدارىنان ءولۋى مۇمكىن دەپ بولجاۋعا بولادى. سەبەبى شولەيت اۋماقتا سۋ كوزدەرى جوق. ەندىگى جەردە ۆەتەرينارلىق قىزمەت تاراپىنان ءتيىستى سىنامالار الىنادى دەپ كۇتەمىز, – دەيدى تابيعات جاناشىرى ن.وقۋوۆ.
ماڭعىستاۋ وبلىسى
