قازىرگى تاڭدا مۋزەي اۋماعىنا قوس قاپتالدان كىرۋگە ارنالعان بيىكتىگى جەتى مەتردەن اساتىن كىرەبەرىس قاقپا مەن بەكىنىس قابىرعالارىنىڭ قۇرىلىسى باستالدى. كىرەبەرىس پەن بەكىنىستەگى مۇنارالار سول كەزەڭدەگى تەحنولوگيا بويىنشا ارنايى جاسالعان قۇرىلىس ماتەريالدارىمەن قاپتالادى.
جوبانىڭ نەگىزگى ماقساتى – اشىق اسپان استىنداعى مۋزەيدە دالا وركەنيەتىنىڭ وزىق جەتىستىكتەرىن كورسەتۋ. مۇندا بوزوق قالاشىعىمەن قاتار, ەنەوليت داۋىرىنەن ورتا عاسىرلارعا دەيىنگى تاريحي كەشەندەردىڭ تاريحي رەكونسترۋكتسياسى بوي كوتەرەدى.
ءار كەشەندە ماتەريالدىق جانە رۋحاني مادەنيەتتىڭ قالىپتاسۋ تاريحى كورسەتىلەدى. ولار – ساراي كەشەندەرى, عيباداتحانالار, تۇرعىن ۇيلەر, مەتاللۋرگيالىق جانە قىش پەشتەر, ۇستاحانالار مەن شەبەرحانالار, قولونەرشىلەر ورامى, ورتاعاسىرلىق بازار, پەتروگليفتەر جانە تاعى باسقالار.
– بۇگىنگى جاستار كوزبەن كورىپ, قولمەن ۇستاۋعا بولاتىن اقپاراتتى جاقسى قابىلدايدى. جاڭا فورماتتاعى مۋزەي ولارعا سول ءداۋىردىڭ اتموسفەراسىن, حالىقتىڭ تۇرمىسىن تولىق سەزىنۋگە جانە دالا وركەنيەتىنىڭ وزىق مادەنيەتىمەن تانىسۋعا مۇمكىندىك بەرەدى. بۇل جوبا بولاشاقتا ەلىمىزدىڭ تانىمال تۋريستىك برەندتەرىنىڭ بىرىنە اينالاتىنى انىق. مۋزەي-قورىق اشۋ ءتۋريزمدى دامىتۋعا مۇمكىندىك بەرەدى. ەلوردا ءوڭىرىنىڭ ينۆەستيتسيالىق تارتىمدىلىعىن جاقسارتادى. ەلىمىزدىڭ ەۋرازيا دالالىق تاريحىنىڭ ساقتاۋشىسى رەتىندەگى حالىقارالىق ءيميدجىنىڭ وسۋىنە وڭ ىقپال ەتەتىن بولادى, – دەدى «بوزوق» مەملەكەتتىك تاريحي-مادەني مۋزەي-قورىعىنىڭ ديرەكتورى ساۋلە بورىباەۆا.
بولاشاقتا اشىق اسپان استىنداعى مۋزەي يننوۆاتسيالىق جوبا رەتىندە ەلوردانىڭ عانا ەمەس, ەلىمىزدىڭ تۋريستىك كارتاسىندا مادەني ينفراقۇرىلىمعا اينالىپ, شاعىن جانە ورتا بيزنەستى دامىتۋ مەن جاڭا جۇمىس ورىندارىن قۇرۋعا سەرپىن بەرەدى دەپ جوسپارلانعان.
