قوستاناي وبلىسى بويىنشا مەملەكەتتىك كىرىستەر دەپارتامەنتى قوستاناي وبلىسى بويىنشا شەكارا قىزمەتى دەپارتامەنتىمەن بىرلەسىپ «وباعان» اۆتوموبيل وتكىزۋ بەكەتىندە رەسەيدەن بيداي اكەلۋدىڭ كەزەكتى ارەكەتىنىڭ جولىن كەستى.
«بيدايدى اكەلۋگە تىيىم سالىنعانىنا قاراماستان, شەكتەۋدى «اينالىپ ءوتۋ» ماقساتىندا سىرتقى ەكونوميكالىق قىزمەتكە قاتىسۋشىلار تاعى دا 30 توننا بيدايدى باسقا تاۋارمەن جاسىرىپ, جالعان قۇجاتتارمەن وتكىزۋگە تىرىستى», دەلىنگەن مەملەكەتتىك كىرىستەر دەپارتامەنتىنىڭ حابارلاماسىندا.
ەستەرىڭىزگە سالا كەتەيىك, 21 ساۋىردە «قايراق» وتكىزۋ بەكەتىندە جالپى سالماعى 60 توننادان اساتىن بيداي اكەلۋدىڭ 2 ارەكەتى توقتاتىلعان بولاتىن.
قوستاناي وبلىسى بويىنشا مەملەكەتتىك كىرىستەر دەپارتامەنتى سىرتقى ەكونوميكالىق قىزمەتكە قاتىسۋشىلاردى قازاقستان رەسپۋبليكاسىنىڭ قولدانىستاعى زاڭناماسىن ساقتاۋعا شاقىردى. وسى باعىتتاعى جۇمىس ءارى قاراي جالعاسادى.
