بىلتىرعى قىركۇيەكتە اباي وبلىسىنا بارعان ساپارىندا مەملەكەت باسشىسى قاسىم-جومارت توقاەۆ «سەمەي – ۇلتتىق عىلىم مەن ءبىلىمنىڭ, ونەر مەن مادەنيەتتىڭ تاريحي ورتالىعى» دەگەن بولاتىن. سوندىقتان جاڭا جاتاقحانانىڭ اشىلۋى ءوڭىردىڭ ەلدىڭ دامۋىنا سەرپىن بەرەتىن قۋاتتى ايماققا اينالۋ جولىنداعى العاشقى قادامدارىنىڭ ءبىرى دەسە دە بولادى. سونداي-اق بۇل پرەزيدەنتتىڭ «قايتا شاڭىراق كوتەرگەن وبلىستىڭ كوركەيۋى ءۇشىن بارلىق جاعدايدى جاسايمىز» دەگەن ۋادەسىنىڭ ورىندالا باستاۋىنىڭ دالەلىندەي.
شىنىندا دا, جوعارى بىلىمگە تالپىنعان تالاپتى جاستاردىڭ جارقىن بولاشاعىنا قانات بىتىرەتىن ستۋدەنتتەر ءۇيىنىڭ اشىلۋى ءوڭىر ومىرىندەگى ەلەۋلى وقيعالاردىڭ ءبىرى بولدى. عىلىم جانە جوعارى ءبىلىم ءمينيسترى ساياسات نۇربەكتىڭ اشىلۋ سالتاناتىنا ارنايى قاتىسىپ, ستۋدەنتتەرمەن كەزدەسۋىن دە ەرەكشە جاعدايعا بالار ەدىك. جاڭا جاتاقحانالاردىڭ پايدالانۋعا بەرىلۋى – سالاداعى وڭ وزگەرىستەردىڭ باستاماسى.
400 ورىنعا شاقتالعان ءاليحان بوكەيحان ۋنيۆەرسيتەتىنىڭ جاڭا «ستۋدەنتتەر ءۇيى» – حوستەلدىك تيپتە سالىنعان زاماناۋي ستۋدەنتتىك باسپانا. مۇندا ستۋدەنتتەرگە قاجەتتى دۇنيەلەردىڭ بارلىعى ەسكەرىلگەن. بۇل بيىل 25 جىلدىق مەرەيتويى اتالىپ وتىلەتىن ۋنيۆەرسيتەت ءۇشىن زور جەتىستىك. ۋنيۆەرسيتەتتىڭ ءوز قاراجاتىنا جاتاقحانانىڭ (1,5 ملرد تەڭگە) سالىنعانى دا وقۋ ورداسىنىڭ زامان تالابىنا ساي ىزدەنىستەرگە قول جەتكىزىپ كەلە جاتقاندىعىن اڭعارتسا كەرەك.
قۇرىلىسى 2021 جىلدىڭ كۇزىنە باستالعان 6 قاباتتى «ستۋدەنتتەر ءۇيىنىڭ» جالپى اۋدانى – 6 مىڭ شارشى مەتر. مۇندا 136 بولمە بار. جاتاقحانا عيماراتى بارلىق زاماناۋي تالاپتارعا ساي جابدىقتالعان. جارىق ءارى كەڭ, قۇرىلىس بارىسىندا ىڭعايلىلىق پەن ەكولوگيالىلىق تالاپتاردىڭ ساقتالۋىنا دا باسا ءمان بەرىلگەن. جاتىن بولمەلەرمەن قاتار, جاستار باسپاناسى زاماناۋي اس ۇيلەرىمەن, كوۆوركينگ-ايماقتارمەن, مەديتسينالىق كابينەتتەرمەن, Wi-Fi جەلىسىنە قوسىلعان كىتاپحانامەن, فيتنەس زالمەن, كىر جۋاتىن بولمەمەن جانە باسقا دا تۇرمىستىق, قوسالقى جايلارمەن جابدىقتالعان.
– جاسىراتىنى جوق, ەلىمىزدەگى كوپتەگەن وقۋ ورىندارىندا جاتاقحانا جەتىسپەيدى. بۇل سوڭعى جارتى عاسىر شاماسىندا كۇن تارتىبىنە شىققان پروبلەما. ماسەلەن, قازاق ۇلتتىق ۋنيۆەرسيتەتىنىڭ جانىنداعى اكادەميالىق قالاشىقتىڭ ءوزى 1974-1975 جىلدارى سالىنعان. اقتوبە ۋنيۆەرسيتەتىنە جاتاقحانا سالۋعا 1985 جىلى ينۆەستيتسيا بولىنگەن. سودان بەرى ەشقانداي وقۋ ورنى ءۇشىن ستۋدەنتتەر تۇراتىن جاڭا جاتاقحانا سالىنعان ەمەس. ال قازىر قازاقستاندا دەموگرافيالىق ءدۇمپۋ ءجۇرىپ جاتىر. جاستار سانى قارقىندى ارتىپ كەلەدى. سوڭعى ءۇش جىلدا 1,5 ملن بالانىڭ دۇنيەگە كەلۋى – سونىڭ دالەلى. ولاردى تۋعان ساتىنەن باستاپ بالاباقشامەن قامتۋ, جايلى مەكتەپتەردە ءبىلىم الۋىنا جاعداي جاساۋ, وقۋعا تۇسسە, جاتاقحاناعا ورنالاسۋىنا مۇمكىندىك بەرۋ سياقتى ماسەلەلەر تولاسسىز تۋىنداپ وتىرادى. وقۋ بىتىرسە, ماماندىعىنا ساي جۇمىس تابۋى دا قازىردەن ويلاندىراتىنى شىندىق. سەمەيدە جاڭا ۇلگىدەگى جاتاقحانانىڭ پايدالانۋعا بەرىلۋى ستۋدەنتتەر ءۇشىن تەڭدەسسىز يگىلىك ەكەنى انىق, – دەدى ساياسات نۇربەك.
مينيستر سونداي-اق جاستار ءۇشىن ماماندىق تاڭداۋدىڭ ماڭىزى ايرىقشا ەكەنىن اتاپ ءوتتى. ويتكەنى عالامدىق وزگەرىستەردىڭ جاندانىپ, تەحنولوگيالاردىڭ دامي ءتۇسۋى ستۋدەنت تاڭداعان ماماندىقتىڭ قانشالىقتى ومىرشەڭ بولاتىنىنا تيگىزەر اسەرى بار. سول سەبەپتى ەڭبەك نارىعىندا قانداي ماماندىقتار ترانسفورماتسياعا ۇشىرايتىندىعىن ۇنەمى قاداعالاپ وتىرۋ قاجەت.
– قازاقستاننىڭ كەلەشەكتە قىتايمەن ۆيزالىق شەكتەۋلەردى الىپ تاستاۋى دا جاستار قاۋىمىن قازىردەن ويلانتۋعا ءتيىس. ويتكەنى سەرىكتەستىك ماقساتتا قىتايدىڭ ەركىن بايلانىس ورناتۋى ولاردىڭ وزىق كومپانيالارىنىڭ, بيزنەس ورتالىقتارىنىڭ ەلىمىزدىڭ بارلىق ايماعىنا كەلۋىنە جول اشادى. سول كەزدە اۋدارماشى ىزدەۋى, باسقا دا جۇمىس ورىندارىن اشۋى مۇمكىن. قىتاي ءتىلىن يگەرۋ قاجەتتىگى تۋىندايتىندىقتان, قازىردەن باستاپ وقۋ ورىندارىنان قىتايدى زەرتتەۋ ورتالىقتارى اشىلۋعا ءتيىس, – دەدى مينيستر.
س.نۇربەك ۋنيۆەرسيتەت رەكتورى شىرىن قۇرمانباەۆاعا اتالعان ۇسىنىستى جان-جاقتى قاراستىرۋ كەرەكتىگىن ەسكە سالدى.
سەمەي
