اۋىل شارۋاشىلىعى مينيسترلىگى ۇسىنعان دەرەكتەرگە سايكەس, جىل باسىنان بەرى جەر رەسۋرستارىن باسقارۋ كوميتەتىنىڭ رەسپۋبليكا بويىنشا اۋماقتىق بولىمشەلەرى جەر پايدالانۋشىلارعا قاتىستى 486 مىڭ گا الاڭدا جوسپاردان تىس 381 تەكسەرۋدى تىركەدى, ناتيجەسىندە 304,7 مىڭ گا الاڭدا 152 نۇسقاما ەنگىزىلدى.
سونىمەن قاتار, 891,7 مىڭ گا بوس جاتقان اۋىل شارۋاشىلىعى جەرلەرى مەملەكەتكە قايتارىلدى. بۇدان باسقا, اكىمدىكتەرگە قاتىستى 65 تەكسەرۋ جۇرگىزىلىپ, اۋىل شارۋاشىلىعى ماقساتىنداعى جەر ۋچاسكەلەرىن بەرۋ تۋرالى 117 زاڭسىز شەشىم انىقتالدى.
«بۇل باعىتتاعى جۇمىس قارقىندى ءجۇرىپ جاتىر. ەكى جىل ىشىندە قايتارىلۋعا جاتاتىن 10 ملن گەكتاردىڭ ىشىندە مەملەكەت مەنشىگىنە بارلىعى 6,3 ملن گەكتار جەر بەرىلدى. بۇل رەتتە مەملەكەتكە قايتارىلعان اۋىل شارۋاشىلىعى جەرلەرى حالىقتى جايىلىمدارمەن وڭتايلى قامتاماسىز ەتۋ ماقساتىندا باستاپقى كەزدە اۋدانداردىڭ رەزەرۆىنە قويىلاتىنىن اتاپ وتەمىز. ياعني, جوعارىدا اتالعان جەر ۋچاسكەلەرى سول ماڭداعى اۋىل تۇرعىندارى پايدالانىلاتىن ورتاق جەرلەرمەن قامتاماسىز ەتكەننەن كەيىن عانا كونكۋرستارعا شىعارىلاتىن بولادى», دەلىنگەن ۆەدومستۆو حابارلاماسىندا.
