فوتو: www.08info.kz
قۇلاننىڭ قوڭىر اۋەنىن بويىنا ءسىڭىرىپ وسكەن ونەر يەسىن ەسكە الۋعا ارنالعان «ساعىنىش-2» كونتسەرتىنە كەلۋشىلەردىڭ قاراسى قالىڭ. رەتروعا اينالعان جاڭبىرشىنىڭ اندەرى ادىپتەلگەن كەشكە ءار بۋىن وكىلدەرى جينالىپ-اق قالىپتى. اراسىندا جاسى الپىستى القىمداپ قالعان ۇستازدىڭ وقۋشىلارى دا بار...
الاتاۋ باۋرايىنداعى كوكدونەن اۋىلىندا بەلگىلى كومپوزيتور مەلس وزبەكوۆپەن بىرگە ونەر ساپارىنا قاتار شىققان تالانتتىڭ ەكەۋى دە بۇگىندە ارامىزدا جوق. الايدا جۇرەكتەرگە جارىق ساۋلە ءتۇسىرىپ كەتكەن كومپوزيتور اندەرى مەلس وزبەكوۆ اتىنداعى مادەنيەت ۇيىندە ءجيى شىرقالادى. شىن ونەردىڭ ولمەيتىنىن كومپوزيتوردىڭ ليريكالىق اندەرىن تىڭداعاندا تۇسىنەسىڭ.
اۋىلدا ءجۇرىپ-اق «تاڭ سامالى» ءانسامبلىن قۇرعان جاڭبىرشى ۇسەيىنوۆتىڭ «قۇداشا», «اعايىندار», «دوسىما حات» سەكىلدى وزگە اندەرى ونەرسۇيەر قاۋىمنىڭ جۇرەگىنە جەتتى.
مارقۇمنىڭ قىزى, ارىپتەسىمىز ارداق ۇسەيىنوۆا اكەسىنىڭ اندەرىن قاتارداعى كونتسەرتتەگىدەي انشىلەردىڭ بىرىنەن سوڭ ءبىرىن ورىنداۋىنا مۇمكىندىك بەرمەدى. ستۋدەنتتەردەن قۇرالعان اكتەرلىك قۇرام ءار ءاننىڭ تاريحىن قويىلىم تۇرىندە جەتكىزىپ جاتتى. كوڭىلدى اۋىل كەشى, اۋىل ادامدارىنىڭ مىنەزى, تاپقىرلىعى, اڭعالدىعى سەكىلدى قاسيەتتەر جاس اكتەرلەردىڭ شەبەرلىگى ارقىلى كورەرمەنگە ءدوپ جەتتى. جاس رەجيسسەر دارىن داۋىموۆتىڭ شەشىمدەرى دە كوكەيگە قوندى.
كونتسەرت بارىسىندا جاڭبىرشى ۇسەيىنوۆتىڭ «دوسىما حات», «جاستىعىمنىڭ جالىنى», «جىگىت سىرى», «اعايىندار», «ساعىنىش» سەكىلدى ليريكالىق اندەرىن جاس انشىلەر جەتەر جەرىنە جەتكىزە ورىندادى. البەتتە, كومپوزيتوردىڭ ءبىردى-ەكىلى ءانىن جاس تالانتتارمەن بىرگە شىرقاعان, كولوراتۋرالىق سوپرانا داۋىستى ءانشى گاۋحار مىرزاحمەتوۆا كوپشىلىكتىڭ قوشەمەتىنە بولەندى.
ساحناداعى اكتەرلەردىڭ قيمىلى, كيىم كيىسى, ءجۇرىس-تۇرىسى, ءتىپتى بيىنە دەيىن رەترولىق سيپاتتا بولعانى قۋانتتى. سول ارقىلى ءبىز سازگەر عۇمىر كەشكەن ۋاقىتتىڭ تىنىسىن سەزىندىك. كونتسەرت سوڭىندا كومپوزيتوردىڭ زامانداستارى مەن ءىنى-قارىنداستارى بىرىنەن كەيىن ءبىرى ساحناعا شىعىپ, «ساعىنىش-2» كەشىندە ونەر يەسىنە دەگەن ساعىنىشتارىن اقتارىپ جاتتى. قىسقاسى, ساعىنىش سازىمەن ادىپتەلگەن ءان كەشى قۇلاندىق ونەرسۇيەر قاۋىمعا ۇناعانى انىق.
جامبىل وبلىسى,
تۇرار رىسقۇلوۆ اۋدانى
