قازاقستان ستۋدەنتتەرى اليانسىنىڭ توراعاسى ۇلان ناۋكەننىڭ ايتۋىنشا, ستۋدەنتتەر سلەتى – جاستاردىڭ تاجىريبە مەن ءبىلىم الماسىپ, بايلانىستى نىعايتاتىن الاڭى. سوندىقتان جاستار ونى اسىعا كۇتەدى.
– ستۋدەنتتەر اليانسى 2005 جىلى قۇرىلعان بولاتىن. سودان بەرى ستۋدەنتتەر سلەتى جىل سايىن وتكىزىلىپ كەلەدى. وكىنىشكە قاراي, تەك پاندەميا كەزىندە عانا ۇيىمداستىرىلعان جوق. اۋقىمدى ءىس-شارانى ءار وڭىردە وتكىزەمىز. ماسەلەن, وسىعان دەيىن تاراز, پاۆلودار, تۇركىستان قالالارىندا ۇيىمداستىرىلعان جيىندار كوپشىلىكتىڭ ەسىندە دەپ ويلايمىن. بىلتىرعى جانە بيىلعى سلەتتى استانادا وتكىزۋ تۋرالى شەشىم قابىلداندى. بيىلعى ءىس-شاراعا اليانستىڭ مۇشەلەرىنەن بولەك, ستۋدەنتتىك ءوزىن-ءوزى باسقارۋ ۇيىمدارىنىڭ دا وكىلدەرى شاقىرىلدى. بۇرىن اليانسقا جوعارى وقۋ ورىندارىنىڭ ستۋدەنتتەرى عانا مۇشە بولسا, ەندى كوللەدج ستۋدەنتتەرىن دە قاتارعا قوسپاقپىز. سوندىقتان بيىلعى ءىس-شاراعا كوللەدج ستۋدەنتتەرى دە قاتىسىپ وتىر, – دەدى ۇلان ناۋكەن.
بيىلعى سلەتتىڭ اشىلۋ سالتاناتى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ۇيىمداستىرىلدى. وعان پارلامەنت ءماجىلىسىنىڭ دەپۋتاتتارى, قوعام بەلسەندىلەرى قاتىستى. استانا قالالىق جاستار ساياساتى ماسەلەلەرى باسقارماسىنىڭ باسشىسى قايرات قامباروۆ پەن اقپارات جانە قوعامدىق دامۋ مينيسترلىگى جاستار ساياساتىن ۇيلەستىرۋ كوميتەتىنىڭ باسقارما باسشىسى اقۇلان تاستەمىر قاتىسۋشىلارعا ساتتىلىك تىلەپ, جاستاردىڭ قوعامداعى رولىنە توقتالدى. سونداي-اق بۇل كۇنى TEDx فورماتىندا ءىس-شارا ۇيىمداستىرىلدى. وعان قاتىسقان جۋرناليست دانا نۇرجىگىت, «Jaidarman»-نىڭ نەگىزىن قالاۋشى ەسەن ەلەۋكەن, الەۋمەتتىك جەلىلەردىڭ بەلسەندى قولدانۋشىسى نۇرلان يمام بايجىگىت ۇلى, اكتەر داستان ورازاەۆ, اقىن-جۋرناليست رامازان ەسماعامبەتوۆ ءوز ويلارىن ورتاعا سالدى.
ستۋدەنتتەر سلەتىندە قازاقستان ستۋدەنتتەرى اليانسىنىڭ بىرجىلدىق جۇمىسى قورىتىندىلانىپ, جاڭا جوبا-جوسپارلار پىسىقتالدى. ولار وسى كۇندەرى ءبىلىم, مادەنيەت, سپورت سايىستارىندا سىنعا تۇسەدى. سونداي-اق جىل قورىتىندىسى بويىنشا ۇزدىك ستۋدەنتتەر ماراپاتتالادى. ءىس-شارا اياسىندا عىلىم جانە جوعارى ءبىلىم ءمينيسترى ساياسات نۇربەكپەن جانە وقۋ-اعارتۋ ءمينيسترى عاني بەيسەمباەۆپەن كەزدەسۋ جوسپارلانعان.
