اۋداندىق مادەنيەت سارايىنىڭ دا «قوزى كورپەش بايان سۇلۋ» اتالۋى دا بايقاۋ ءمانىن ارتتىرا تۇسكەنىنە كۇمان جوق. 7 اۋدان مەن 2 قالادان باق سىناعان جاس جۇپتاردىڭ وتاۋ قۇرعاندارى دا, شاڭىراق قۇرۋعا نيەتتەنىپ جۇرگەندەرى دە بار ەكەن.
بەس كەزەڭنەن بويىنشا وتكىزىلگەن سايىستا ادەمىلىك, عاشىقتىقتى سيپاتتاۋ عانا ەمەس, ۇلتتىق سالت-ءداستۇرىمىزدى ناسيحاتتاۋدىڭ دا تاماشا ۇلگىلەرى كورىنىس تاپتى. «جىگىتكە جەتپىس ونەر دە از» دەگەندەي سەگىز قىرلى, ءبىر سىرلى بولۋدى ماقسات ەتكەن ازاماتتار كۇش-جىگەرىنىڭ مىقتىلىعىمەن سىنالسا, قىز-كەلىنشەكتەر قازاقتىڭ ۇلتتىق كيىم ۇلگىلەرىمەن كورەرمەندى ءتانتى ەتتى.
«وسى بايقاۋدى وتكىزۋ بارىسىندا ءبىر بايقالعانى قاي اۋداندا بولسىن, جاستار ساياساتىنىڭ جۇرگىزىلۋى جاقسى ءۇردىس العان ەكەن. ويتكەنى, قاتىسۋشى قىز-جىگىتتەر قازاقتىڭ وتكەن تاريحىن, سالت-ءداستۇرىن, ۇلتتىق قۇندىلىقتارىن قاستەرلەۋگە وتە زور جاۋاپكەرشىلىكپەن قاراعانى قۋانتتى. الداعى ۋاقىتتا دا جاستار ءومىرىنىڭ دۇرىس جالعاسىپ, التىن ۋاقىتتارىن قوعامعا پايدالى ىسپەن اينالىسۋعا جۇمساۋىنا جەتە ءمان بەرۋىمىز كەرەك دەپ ويلايمىن», دەيدى قازىلار القاسىنىڭ مۇشەسى, م.اۋەزوۆ اتىنداعى سەمەي پەداگوگيكالىق كوللەدجىنىڭ ديرەكتورى شاعانگۇل جاناەۆا.
قازىلار القاسىنىڭ باعالاۋى بويىنشا, سان قىرلى ەرەكشەلىكتەرىمەن دارالانىپ, اقسۋات اۋدانىنان سىنعا تۇسكەن مەرەي مەيرامبەكوۆ پەن اياۋلىم باياحمەتوۆا باس جۇلدەگە لايىق بولىپ شىقتى. وتكەن جىلى عانا شاڭىراق كوتەرگەن ەرلى-زاۋىپتىلار «قوزى كورپەش – بايان سۇلۋ – 2023» اتاعىنىڭ يەگەرى اتاندى.
ء«بىز وتكەن جىلدىڭ تامىز ايىندا وتباسىن قۇردىق. مەن ويشىلىك اۋىلىنداعى توعاس باتىر اتىنداعى مەكتەپتە مۋزىكا پانىنەن ساباق بەرەمىن. اياۋلىم اقسۋات اۋداندىق مادەنيەت ۇيىندە قىزمەت اتقارادى. ول ءداستۇرلى اننەن وتكەن بايقاۋلاردىڭ بىرنەشە مارتە جەڭىمپازى بولدى», دەيدى مەرەي مەيرامبەك ۇلى.
اباي اۋدانىنان كەلگەن باقىتجان زەينەلوۆ پەن جادىرا جۇلدىزبەكقىزى 1 ورىن يەگەرى اتانسا, 2 ورىندى بورودۋليحالىق رينات حاسەنوۆ پەن اياۋلىم اسيموحانوۆا ەنشىلەدى. 3 ورىن جارمالىق جاستار اكەجان قاسىمباي مەن ديانا عالىمبەكوۆاعا بۇيىردى.
