ءا.قۋانتىروۆ ءوز سوزىندە اتاپ وتكەندەي, قازاقستان مەن امەريكالىق ءىرى كومپانيالاردىڭ ىنتىماقتاستىعى 30 جىل بويى جالعاسىپ كەلەدى جانە ولاردىڭ سانى جىل سايىن ءوسىپ جاتىر.
قر مەن اقش اراسىنداعى تاۋار اينالىمى 2022 جىلى پاندەمياعا دەيىنگى دەڭگەيدەن اسىپ, $3,1 ملرد. قۇرادى, بۇل وتكەن جىلمەن سالىستىرعاندا 37%-عا ارتىق. قازاقستاننان اقش-قا ەكسپورت 32% - عا ءوسىپ, $1,2 ملرد قۇرادى, بۇل رەتتە امەريكالىق تاۋارلاردىڭ يمپورتى 40% - عا ۇلعايىپ, $1,9 ملرد قۇرادى.
«قر ۇكىمەتىنىڭ قولايلى ينۆەستيتسيالىق جاعداي جاساۋ بويىنشا جۇرگىزىپ جاتقان ەكونوميكالىق رەفورمالارىنىڭ ناتيجەسىندە قازاقستانداعى امەريكالىق ينۆەستيتسيالار مەن كومپانيالاردىڭ سانى ءبىر جىلدا 9%-عا ءوستى», دەدى ۇەم باسشىسى.
سونداي-اق مينيستر ەلىمىزدە جۇرگىزىلىپ جاتقان سالىق-بيۋدجەت ساياساتى, بيزنەس-كليماتتى جاقسارتۋ بويىنشا رەفورمالار تۋرالى ايتىپ بەردى جانە ينۆەستورلاردى اعىمداعى جىلدىڭ 8-9 ماۋسىمىندا وتەتىن استانا حالىقارالىق فورۋمىنا قاتىسۋعا شاقىردى. وسى ۋاقىتتا اقش-تىڭ ساۋدا ميسسياسىنىڭ قازاقستانعا كەلۋى كۇتىلۋدە.
سونىمەن قاتار, ءا.قۋانتىروۆ Citigroup بانكىنىڭ ۇكىمەتتەر مەن مەملەكەتتىك سەكتور جونىندەگى جاھاندىق بلوگىنىڭ باسشىسى دجۋلي موناكومەن كەزدەستى. تاراپتار الەمدىك ەكونوميكانىڭ وزەكتى ماسەلەلەرىن, قارجى نارىعىنداعى نەگىزگى ۇردىستەردى, سونداي-اق بانك سەكتورىنداعى پروبلەمالاردى تالقىلادى. د.موناكو حانىم بانكتىڭ قارجىلىق كورسەتكىشتەرىمەن ءبولىسىپ, دامۋ ستراتەگياسى تۋرالى ايتتى.
كەزدەسۋ قورىتىندىسى بويىنشا دجۋلي موناكو استانا حالىقارالىق فورۋمىنا قاتىسۋعا جانە قازاقستان ۇكىمەتىمەن ىنتىماقتاستىقتى جالعاستىرۋعا مۇددەلىلىگىن ءبىلدىردى.
