سودان بەرى بايقاۋدىڭ ۇيىمداستىرۋشىلارى حورەوگرافيالىق وقۋ ورىندارى اراسىندا كەڭ تاجىريبە الماسۋدى جۇزەگە اسىرىپ, كلاسسيكالىق بي ونەرى باعىتىنداعى جاس دارىنداردىڭ ەسىمىن انىقتاپ, كلاسسيكالىق, حالىق جانە زاماناۋي ءبيدىڭ ەڭ وزىق ءداستۇرىن دامىتىپ, ورىنداۋ شەبەرلىگىن ارتتىرۋدى باستى مىندەت ەتىپ بەلگىلەدى. سونداي-اق ەلدىڭ حورەوگرافيالىق ونەرى مەن ءبىلىم بەرۋ ءىسىنىڭ باسەكەگە قابىلەتتىلىگىن ارتتىرىپ, ءيميدجىن قالىپتاستىرۋ ءۇشىن دە بۇل بايقاۋدىڭ ءمانى زور. 2018 جىلى بۇل بايقاۋ يۋنەسكو-نىڭ قامقورلىعىنا الىنعان اتى اڭىزعا اينالعان ايگىلى يۋري گريگوروۆيچ جەتەكشىلىك ەتەتىن حالىقارالىق بالەت بايقاۋلارى فەدەراتسياسىنىڭ مۇشەسى مارتەبەسىن يەلەندى. ءداستۇرلى تۇردە ءوتىپ كەلە جاتقان حالىقارالىق بايقاۋ 150-دەن اسا قاتىسۋشىنىڭ باسىن قوسىپ, گەوگرافيالىق اۋقىمىن جىل سايىن كەڭەيتىپ كەلەدى. بيىلعى بايقاۋدا قىرعىزستان, وزبەكستان, رەسەي, وڭتۇستىك كورەيا ەلدەرىنىڭ ۇمىتكەرلەرى باق سىنادى.
«ورلەۋ» بايقاۋى حورەوگرافيالىق ءبىلىم بەرۋ سالاسىندا ديداكتيكالىق-ادىستەمەلىك مىندەت ارقالايدى. بيىلعى VIII ماۋسىم قازاقستاننىڭ حالىق ءارتىسى, كورنەكتى بالەت ءبيشىسى سارا كوشەرباەۆانىڭ 90 جىلدىق مەرەيتويىنا ارنالىپ وتىر. بۇعان قوسا, «سەلەزنەۆ وقۋلارى» حالىقارالىق عىلىمي-زەرتتەۋ كونفەرەنتسياسى «قازاق حورەوگرافيالىق ونەرى مەن ءبىلىم بەرۋ ءىسىنىڭ كورنەكتى قايراتكەرلەرى» جانە «ۇلتتىق حورەوگرافيالىق ونەر جانە ءبىلىم بەرۋ ءىسىنىڭ وزەكتى ماسەلەلەرى» اتتى تاقىرىبىنا ارنالىپ, بالەت ونەرىنىڭ مايتالمان ماماندارى داۋرەن ءابىروۆ پەن بولات ايۋحانوۆ سەكىلدى ۇلتتىق بالەت ونەرى بىرەگەي تۇلعالارىنىڭ شىعارماشىلىعىن جان-جاقتى تالداپ, ەڭبەگىنە باعا بەردى. «قازاق, قىرعىز جانە وزبەك بيلەرىنىڭ ۇلگىسىندەگى تۇركى حالىقتارى حالىق بيلەرىنىڭ ۇقساستىعى مەن ەرەكشەلىگى» اتتى تاقىرىپپەن كونفەرەنتسيانىڭ كورنەكىلىك ءبولىمى الماتى, بىشكەك جانە تاشكەنت حورەوگرافيالىق ۋچيليششەلەرىنىڭ پەداگوگ ماماندارىنىڭ قاتىسۋىمەن ءوتتى. بايقاۋ اياسىندا قازاقستان جانە شەتەل حورەوگرافيالىق ونەرىنىڭ جەتەكشى ماماندارى شەبەرلىك ساباقتارىن ۇيىمداستىردى. فرانتسيانىڭ «Ruée des Arts» بي ۇجىمىنىڭ زاماناۋي حورەوگرافيا بويىنشا كورسەتكەن شەبەرلىك ساباعىن وسى سالا ساڭلاقتارى جوعارى باعالادى.
بايقاۋ تاريحىندا ءبىرىنشى رەت سوڭعى تۋر, سونداي-اق اۋقىمدى گالا-كونتسەرت Almaty Theatre-دىڭ ساحناسىندا ءوتىپ, وعان الماتىلىق كورەرمەندەر مەن قالا قوناقتارى قاتىستى. «كلاسسيكالىق بي», «حالىق ءبيى», «زاماناۋي بي» اتالىمى بويىنشا ۇلكەن, ورتا, كىشى توپ لاۋرەاتتارى انىقتالىپ, «سارا كوشەرباەۆا اتىنداعى ۇزدىك ورىنداۋشى», «داۋرەن ءابىروۆ اتىنداعى ۇزدىك ورىنداۋشى» جۇلدەسى جانە «بولات ايۋحانوۆ اتىنداعى ارنايى جۇلدە», «جەڭىسكە دەگەن جىگەرى ءۇشىن», «كورەرمەندەر كوزايىمى», ادام مەن گۇلنارا قاپانوۆتاردىڭ ارنايى جۇلدەسى ايرىقشا تالانتىمەن توپ جارعان جاس دارىندارعا تابىستالدى.
الماتى
